حالىقارالىق شارا بارىسىندا جامبىل وبلىسىنىڭ دا تۋريستىك الەۋەتى مەن نىساندارى تانىستىرىلدى. جاڭا نىسانداردى قابىلداۋ بويىنشا شەشىم كوميتەتتىڭ سەسسياسىندا قابىلدانادى ەكەن. ال حالىقارالىق كوميسسيا قۇرامىندا الەمنىڭ سەكسەن ەلىنىڭ ساراپشىلارى بولدى. حالىقارالىق كوميتەت نەگىزىنەن تۋريستىك تارتىمدى نىسانداردى تانىتۋ ماسەلەلەرىمەن اينالىسادى.
تۇركيا ەلىنە بارعان جامبىل وبلىستىق تۋريزم باسقارماسىنىڭ وكىلدەرى قازىلار قۇرامىنىڭ الدىندا اۋليەاتا ءوڭىرىنىڭ تۋريستىك الەۋەتكە يە ەكەندىگىن دالەلدەي ءبىلدى. جامبىل ءوڭىرىنىڭ عانا ەمەس, بۇكىل قازاق ەلىنىڭ تاريحي-مادەني قۇندىلىقتارىنىڭ قاتارىنا جاتاتىن ورتاعاسىرلىق «ايشا ءبيبى» كەسەنەسى مەن «اقىرتاس» ساراي كەشەنى وبلىستىق باسقارما قىزمەتكەرلەرىنىڭ تانىستىرۋىنان كەيىن ساراپشىلاردىڭ قولداۋىمەن الەمدەگى ەرەكشە تۋريستىك تارتىمدى نىسانداردىڭ تىزىمىنە ەندى.
ناتيجەسىندە سول ساناتتى رەسمي ناقتىلايتىن ارنايى سەرتيفيكات تاپسىرىلدى. ەندى بۇل نىسانداردى كوپشىلىككە الەۋمەتتىك جەلىلەر ارقىلى تانىمال ەتۋ ماقساتىندا «World List – Tourist Attraction» بەلگىسىن (لوگوتيپ) پايدالانۋعا رۇقسات ەتىلەتىن بولادى.
«سەسسيا كەزىندە مامانداردىڭ «ايشا ءبيبى» كەسەنەسى مەن «اقىرتاس» ساراي كەشەنىن مويىنداۋى – تۋريزم سالاسى بويىنشا وڭىرىمىزدە اتقارىلىپ جاتقان جۇمىستارعا بەرىلگەن جوعارى باعا», دەيدى جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆا.
حاميت ەسامان,
«ەگەمەن قازاقستان»
جامبىل وبلىسى
