سۋرەتتى تۇسىرگەن: رۋفينا تورپيششەۆا
بۇل كۇندەرى ۋنيۆەرسيتەتتىڭ ساۋلەت-قۇرىلىس فاكۋلتەتى باكالاۆريات, ماگيستراتۋرا ءبىلىم باعدارلاماسى بويىنشا ءبىلىم بەرەدى. بۇعان دەيىن «وندىرىستىك جانە ازاماتتىق قۇرىلىس», «بەتون جانە تەمىربەتون ءوندىرىسى» سالاسىندا ماماندار دايارلاپ كەلدى.
قازىر ستۋدەنتتەر قۇرىلىس, ساۋلەت, ديزاين, بەينەلەۋ ونەرى جانە سىزۋ, قۇرىلىس ماتەريالدارىن, بۇيىمدارىن جانە قۇراستىرىلىمدارىن ءوندىرۋ, قورشاعان ورتانى قورعاۋ جانە ءومىر تىرشىلىگىنىڭ قاۋىپسىزدىگى, كاسىپتىك وقىتۋ, كولىك قۇرىلىسى, قۇرىلىس سالاسىندا عىلىمي-تەوريالىق جانە تاجىريبەلىك جۇمىستار بويىنشا دايىندالۋدا.
وقۋ-تاربيە ۇدەرىسى ونەركاسىپتىك, ازاماتتىق جانە كولىك قۇرىلىس, ارحيتەكتۋرا جانە ديزاين, كاسىپتىك وقىتۋ جانە قورشاعان ورتانى قورعاۋ كافەدرالارىندا جۇرگىزىلەدى.
مىسالى, «ونەركاسىپتىك, ازاماتتىق جانە كولىك قۇرىلىسى» كافەدراسىندا «ونەركاسىپ قالدىقتارىن جويۋدىڭ ەكولوگيالىق اسپەكتىلەرى», «جۇقا قابىرعالى قۇرىلىمداردى ەسەپتەۋدىڭ ساندىق ادىستەرى», ء«ارتۇرلى دەڭگەيدەگى كوپ قاباتتى عيماراتتاردىڭ قابىرعالارىن زەرتتەۋ جۇمىسى», «قيىن ەكولوگيالىق جاعدايلاردا شوكپەلى نەگىزدىكتى پايدالاناتىن عيماراتتار ىرگەتاستارىنىڭ اسەر ەتۋى», «سۋمەن شوگۋ قاۋىپسىزدىگىن باعالاۋ» سياقتى تاقىرىپتاردا ستۋدەنتتەر عىلىمي-جۇمىستار جازۋدا.
فاكۋلتەتتەگى «كولىك قۇرىلىسى» ماماندىعىنا ءبىلىم العان ستۋدەنتتەر وڭىردەگى ماي رازەزى مەن دەگەلەن ستانساسى, قۇركول-كوكتوبە ارالىعىنداعى ءبىر جولاقتى جولدى ەكى جولاقتى ەتىپ سالۋ ءجۇمىستارىنا, وبلىس ورتالىعى اقسۋ - كوكتوبە - كۋرچاتوۆ قالاسى ارالىعىنداعى رەسپۋبليكالىق جولدىڭ ۇزىندىعى 10,69 شاقىرىم بولىگىن قايتا سالۋ, وبلىس ورتالىعىن باتىس جاعىنانا اينالىپ ءوتۋ سياقتى جوبالارىنا ۇلەس قوستى.
وقۋ ورنىنىڭ ءباسپاسوز قىزمەتىنىڭ مالىمەتىنشە, باربارا مارينو ءبىر ايدىڭ ىشىندە ونەركاسىپتىك, ازاماتتىق جانە كولىكتىك قۇرىلىس كافەدراسىنىڭ ستۋدەنتتەرىنە «وزەن جاعالاۋىنداعى تابيعات قورعاۋ نىساندارى مەن مەنەدجمەنت» تاقىرىبىندا دارىستەر وقيدى. بۇل تاقىرىپ ەرتىس وزەنى جاعاسىندا ورنالاسقان ءبىزدىڭ ءوڭىر ءۇشىن دە ماڭىزدى.
ال, شەتەلدىك پروفەسسوردىڭ ايتۋىنشا, الەمدەگى جاعالاۋلاردىڭ 70 پايىزى تابيعي قۇبىلىستاردىڭ اسەرىنەن زارداپ شەگۋدە.
-تابيعات قورعاۋ نىساندارىنىڭ ينجەنەر-قۇرىلىسشىسى تولقىننىڭ بيىكتىگىن, جەلدىڭ كۇشىن, اعىمداردى, جاعاداعى ەرروزيا قارقىنىن, جاعانىڭ تەرەڭدىگى مەن بولاشاق نىساننىڭ تەرەڭدىگى, سونداي-اق, قۇرىلىس ماتەريالدارىنىڭ بارىن دا (تاس, بەتون نەمەسە كۇم) ەسكەرۋ كەرەك. ەسكەرەتىن جايتتار وتە كوپ, - دەيدى باربارا مارينو.
شەتەلدىك مامان ەرتىس وزەنىنىڭ جاعاسىنداعى «قاز قوناق» پالەونتولوگيالىق ەسكەرتكىشىن سۋ شايۋدان قورعاۋ ماسەلەسىنە قاتىستى پىكىرىن دە ءبىلدىردى. پروفەسسور جاعانى بەتونمەن بەكىتۋ ءتيىمدى ەكەنىن ايتادى. سەبەبى قۇمنان جاسالعان نىساندار اعىنعا توتەپ بەرە الماۋى مۇمكىن.
فاريدا بىقاي
«ەگەمەن قازاقستان»
پاۆلودار
