وسىعان وراي, ەلوردادا استانا قالاسى تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن 14 قاراشادا ساعات 11:00-دە باس قالانىڭ بارلىق جوعارعى جانە ورتا ارناۋلى وقۋ ورىندارىنىڭ, مەكتەپكە دەيىنگى مەكەمەلەردىڭ, مەكتەپتەردىڭ وقۋشىلارى, ستۋدەنتتەرى, ۇستازدارى, سونىمەن قاتار مادەنيەت, سپورت, مەديتسينا, كوممۋنالدىق شارۋاشىلىق, ەنەرگەتيكا جانە باسقا دا سالالاردىڭ قىزمەتكەرلەرى جاپپاي ديكتانت جازاتىن بولادى. ديكتانت لاتىن گرافيكاسىندا جازىلادى.
شاراعا جاسى 15-تەن اسقان بارلىق ازاماتتار قاتىسادى. جالپىحالىقتىق ديكتانتقا استانا قالاسىنان 50 000 ادامنىڭ قاتىسۋى جوسپارلانعان. ديكتانت ءبىر كۇندە, ءبىر مەزەتتە جازىلادى. قازىرگى ۋاقىتتا ديكتانت جازۋ تۋرالى الدىن الا اقپاراتتاندىرۋ جۇمىستارى جۇرگىزىلىپ, ديداكتيكالىق ماتەريالدار (لاتىن گرافيكاسىنا نەگىزدەلگەن قازاق ءتىلى ءالىپبيى, ارنايى پاراقتار) تاراتىلۋدا.
بەكىتىلگەن ديكتانت ءماتىنى (80-90 ءسوز) اۋديوجازبالار ارقىلى تاراتىلىپ, «شالقار», «قازاق» راديولارىنان بەرىلەدى. ۇزاقتىعى 30 مينۋتقا سوزىلادى. ديكتانت جازۋ ارنايى بەلگىلەنگەن ورىنداردا جۇرگىزىلەدى.
ارنايى بەلگىلەنگەن ورىندارعا كەلىپ قاتىسا المايتىن تۇلعالار ءۇشىن ديكتانتتى نەگىزگى ۇيىمداستىرۋشىلار بەرگەن emle.kz, tilalemi.kz سايتتارىنىڭ باستى بەتىندە ورنالاسقان سىلتەمەمەن كومپيۋتەر نەمەسە ۇيالى تەلەفون (سمارتفون) ارقىلى كىرىپ, بەلگىلەنگەن ۋاقىتتا ديكتانت اۋديوسىن تىڭداي وتىرىپ جازۋعا مۇمكىندىك جاسالعان.
مۇنداي تۇلعالار ديكتانتتى سكانەرلەۋ نەمەسە فوتوعا ءتۇسىرۋ ارقىلى tilalemi.kz@gmail.com ەلەكتروندىق پوشتاسىنا جولداۋى قاجەت. سونداي-اق, ديكتانت اياقتالعان سوڭ اتالعان سايتتا ديكتانتتىڭ دۇرىس نۇسقاسى مەن ديكتانتتى باعالاۋ ولشەمشارتتارى شىعادى. ءاربىر پايدالانۋشى جۇمىسىن دۇرىس نۇسقامەن سالىستىرا وتىرىپ, ولشەمشارتتارعا سايكەس ءوزىن-ءوزى باعالايدى.
