مەملەكەت باسشىسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا ءبىرىنشى كەزەكتە حالىقتىڭ تابىسىن ارتتىرۋ مىندەتىن قويادى.
وتىرىستا ايتىلىپ وتكەن دەرەكتەرگە سايكەس, ەكونوميكانىڭ ءتۇرلى سالالارىندا كورسەتكىشتەردىڭ ءوسىمى قامتاماسىز ەتىلگەن. سونىمەن قاتار, پرەمەر-مينيستر وڭىرلەردەگى حالىقتىڭ ناقتى اقشالاي تابىسىنىڭ تومەنگى كورسەتكىشتەرىن اتاپ ءوتتى. ورىن العان جاعدايدىڭ سەبەپتەرى مەن جوسپارلانعان شارالار تۋرالى قىزىلوردا وبلىسىنىڭ اكىمى ق. كوشەرباەۆ, ماڭعىستاۋ وبلىسىنىڭ اكىمى ە. توعجانوۆ, الماتى قالاسىنىڭ اكىمى ب. بايبەك جانە الماتى وبلىسى اكىمىنىڭ ورىنباسارى ل. تۇرلاشوۆ باياندادى.
باياندامالاردى تىڭداعاننان كەيىن, ب. ساعىنتاەۆ ەڭبەك جانە حالىقتى الەۋمەتتىك قورعاۋ مينيسترلىگىنە, جەرگىلىكتى اتقارۋشى ورگاندارعا ەلىمىزدەگى حالىقتىڭ تابىسىنىڭ تومەن بولۋى بويىنشا قازىرگى جاعدايعا تالداۋ جاساۋدى تاپسىردى. حالىق تابىسىنىڭ اتاۋلى جانە ناقتى ماندەردەگى ءوسىمىنىڭ كورسەتكىشتەرى اراسىنداعى ايىرماشىلىق تۋرالى ءسوز قوزعالدى.
ۇلتتىق ەكونوميكا مينيسترلىگىنىڭ دەرەكتەرىنە سايكەس, 2018 جىلعى قاڭتار–تامىزدا حالىقتىڭ جان باسىنا شاققانداعى اقشالاي ورتاشا كىرىسى 707,9 مىڭ تەڭگەنى قۇراپ, 2017 جىلدىڭ ءتيىستى كەزەڭىمەن سالىستىرعاندا اتاۋلى ماندە 10%, ناقتى ماندە 3,5% ءوستى. ءىى توقساندا حالىقتىڭ ناقتى كىرىسىنىڭ ءوسۋى ءتورت وڭىردە ورتاشا رەسپۋبليكالىق دەڭگەيدەن (4,7%) جوعارى ەكەنى بايقالدى.
الەۋمەتتىك-ەكونوميكالىق دامۋ تۋرالى ەسەپتەردى ازىرلەگەندە ءبىرىنشى كەزەكتە حالىقتىڭ تابىسىنىڭ كورسەتكىشتەرىنە نازار اۋدارۋ تاپسىرىلدى, بۇل ورايدا اكىمدىكتەر ستاتيستيكالىق دەرەكتەردىڭ دۇرىس ەمەستىگىن نەمەسە باسقا دا سەبەپتەردى سىلتاۋ قىلماۋى ءتيىس. 11 ايداعى الەۋمەتتىك-ەكونوميكالىق دامۋ قورىتىندىسىنىڭ كەلەسى قارالۋى وسى ماسەلەدەن باستالۋى كەرەك.
