مەملەكەت باسشىسىنىڭ 2018 جىلعى 7 قاراشادا قاۋىپسىزدىك كەڭەسىندە بەرگەن تاپسىرمالارىن ىسكە اسىرۋ ماقساتىندا مينيسترلىك بىرقاتار شارالار قابىلدادى.
قىسقا مەرزىمدى شارالار شەڭبەرىندە, بىرىنشىدەن, قر باس پروكۋراتۋراسىنىڭ ۇسىنىمىن ورىنداۋ اياسىندا مونوپوليستەردىڭ ەلەكتر ەنەرگياسىن بەرۋ جانە جابدىقتاۋ سالاسىنداعى قىزمەتتەرگە ارنالعان تاريفتەردى تومەندەتۋ بويىنشا جۇمىس جۇرگىزىلدى.
وسىلايشا, بۇگىندە تاريفتەر تومەندەتىلدى:
10 مونوپوليست بويىنشا جىلۋمەن جابدىقتاۋ قىزمەتتەرىنە 4,4 ملرد تەڭگە سوماعا (استانا جانە الماتى قالالارى, اقمولا, اقتوبە, الماتى, باتىس قازاقستان, جامبىل, قاراعاندى, شىعىس قازاقستان وبلىستارى);
14 مونوپوليست بويىنشا ەلەكتر ەنەرگياسىن تاراتۋ جانە جابدىقتاۋ قىزمەتتەرىنە 12,1 ملرد تەڭگە سوماعا (استانا, الماتى جانە شىمكەنت قالالارى, پاۆلودار, قاراعاندى, اتىراۋ, اقتوبە, اقمولا, شىعىس قازاقستان, الماتى, قىزىلوردا جانە باتىس قازاقستان وبلىستارى).
ەكىنشىدەن, حالىقپەن كەرى بايلانىستى ۇيىمداستىرۋ ءۇشىن بارلىق وبلىس ورتالىقتارىندا, استانا, الماتى جانە شىمكەنت قالالارىندا, سونداي-اق وبلىستىق ماڭىزى بار قالالاردا 2018 جىلعى 12 قاراشادا بۇقارالىق اقپارات قۇرالدارىنىڭ, جەرگىلىكتى اتقارۋشى ورگانداردىڭ, ۇلتتىق كاسىپكەرلەر پالاتاسىنىڭ, «نۇر وتان» پارتياسىنىڭ, قوعامدىق بىرلەستىكتەردىڭ جانە باسقا دا مۇددەلى تۇلعالاردىڭ قاتىسۋىمەن تۇرعىن ءۇي-كوممۋنالدىق شارۋاشىلىق سالاسىنداعى تۇيىتكىلدى ماسەلەلەر بويىنشا حالىقتى قوعامدىق قابىلداۋلار اشىلدى.
ت. سۇلەيمەنوۆ تەك قانا ءبىر كۇندە قاتىسۋشىلار سانى 617 ادامدى قۇراعانىن اتاپ ءوتتى. وسىنداي قوعامدىق قابىلداۋلار اپتا سايىنعى نەگىزدە وتكىزىلەتىن بولادى.
ۇشىنشىدەن, وتكىزىلگەن قوعامدىق قابىلداۋلار قورىتىندىلارى بويىنشا 2018 جىلعى 16 قاراشاعا دەيىن كەلىپ تۇسكەن شاعىمداردىڭ نەگىزىندە سۋمەن جابدىقتاۋ, سۋ بۇرۋ, جىلۋمەن جابدىقتاۋ جانە ەلەكتر ەنەرگياسى مەن گازدى بەرۋ, جابدىقتاۋ قىزمەتتەرىن كورسەتەتىن بازالىق مونوپوليستەر قىزمەتىنە جوسپاردان تىس تەكسەرىستەر جۇرگىزۋ ۇيىمداستىرىلاتىن بولادى.
سونىمەن قاتار, ۇلتتىق ەكونوميكا ءمينيسترى ورتا مەرزىمدى شارالارعا قاتىستى ءسوز قوزعادى. ماسەلەن, تاريفتەردى بەلگىلەۋ جانە مونوپوليستەردىڭ تاريفتىك سمەتالار مەن ينۆەستيتسيالىق مىندەتتەمەلەردى ورىنداۋدى باقىلاۋ اشىقتىعىن كۇشەيتۋ ءۇشىن قولدانىستاعى زاڭناماعا وزگەرىستەر ەنگىزىلۋدە.
ءبىرىنشى. قازىر قر پارلامەنتى ءماجىلىسىنىڭ قاراۋىنداعى «تابيعي مونوپوليالار تۋرالى» زاڭ جوباسى تاريفتىك سمەتالاردى جانە ينۆەستيتسيالىق باعدارلامالاردى ىسكە اسىرۋ بويىنشا مونوپوليستەردىڭ ەسەپتەرىن قاراۋ بارىسىندا تۇتىنۋشىلاردىڭ قۇقىقتارىن قورعاۋ جونىندەگى قوعامدىق بىرلەستىكتەردى تارتۋدى كوزدەيدى. مينيستر تۇتىنۋشىلاردىڭ مۇددەلەرى ءۇشىن بەلگىلى ءبىر بىلىكتىلىك تالاپتارعىنا نەگىزدەلگەن الەۋمەتتىك تاپسىرىس ەسەبىنەن مەملەكەتتىك بيۋدجەتتەن قارجىلاندىرۋدى ۇسىندى.
بۇدان باسقا, زاڭ جوباسىندا مونوپوليستەردىڭ تاريفتەردى بەكىتۋ جانە ماتەريالدارعا تولىق قولجەتىمدىلىكتى قامتاماسىز ەتۋ جانە بارلىق تۇتىنۋشىلار ءۇشىن تاريفتەردى ەسەپتەۋ ءۇشىن وتىنىشتەرىن قاراۋدىڭ ەلەكتروندىق فورماتىنا كوشىرۋ قاراستىرىلعان.
«ە-مونوپوليست اقپاراتتىق جۇيەسى وسى جىلدىڭ 1 شىلدەسىنەن باستاپ ەنگىزىلدى. بۇل دەرەكتەر بازاسى ارقىلى تۇتىنۋشىلار ەنگىزگەن ۇسىنىستار جۇيەلەندىرىلىپ, ءارى قاراي قوعامدىق تىڭداۋلاردا تالقىلانادى», — دەدى ت. سۇلەيمەنوۆ.
ەكىنشى. قر ۇەم اقپاراتىنا سايكەس, قازىرگى ۋاقىتتا «تابيعي مونوپوليالار تۋرالى» زاڭ جوباسىنا پارلامەنت ءماجىلىسى دەپۋتاتتارىنىڭ تۇزەتۋلەرىنە ارنالعان زاڭ جوباسى قارالىپ جاتىر. ول تومەندەگىنى قامتيدى:
مونوپوليستەردىڭ ينۆەستيتسيالىق باعدارلامالاردى ورىنداۋ ءىس-شارالارىنىڭ سىرتقى تەحنيكالىق ساراپتاماسىن ەنگىزۋ.
تۇرعىن ءۇي-كوممۋنالدىق شارۋاشىلىعى وبەكتىلەرىنە تىكەلەي بارۋمەن, باق, «اتامەكەن» پالاتاسىنىڭ وكىلدەرىنىڭ, قوعامدىق بىرلەستىكتەردىڭ, جەرگىلىكتى اتقارۋشى ورگاندار مەن مۇددەلى تۇلعالاردىڭ قاتىسۋىمەن ينۆەستيتسيالىق باعدارلامالاردى ورىنداۋدىڭ قوعامدىق مونيتورينگ ينستيتۋتىن ەنگىزۋ.
تابيعي مونوپوليالار سۋبەكتىلەرىنىڭ تاريفتىك سمەتالار مەن ينۆەستيتسيالىق باعدارلامالاردىڭ ورىندالۋى تۋرالى تۇتىنۋشىلاردىڭ الدىنداعى جاريا ەسەپتەرىن وتكىزۋدى جىل سايىنعى مەرزىمنەن جارتى جىل سايىن وتكىزىپ تۇرۋ.
«مونوپوليستەردىڭ قاراجاتتى ماقساتتى پايدالانۋىن تولىققاندى مەملەكەتتىك باقىلاۋ ماقساتىندا مينيسترلىك زاڭناماعا تابيعي مونوپوليالار جانە قوعامدىق ماڭىزى بار نارىق سۋبەكتىلەرىنە تەكسەرىس جۇرگىزۋ جۇيەسىن قايتا قاراۋدى جانە قاتاڭداتۋدى كوزدەيتىن جاڭا تۇزەتۋلەردى ازىرلەدى», — دەدى ت. سۇلەيمەنوۆ.
قر ۇلتتىق ەكونوميكا مينيسترلىگى زاڭناماعا ۇسىنىپ وتىرعان تۇزەتۋلەر:
مونوپوليستەر قىزمەتىن مەملەكەتتىك باقىلاۋدى كاسىپكەرلىك كودەكستە كوزدەلگەن تەكسەرىستەر جۇرگىزۋدى ۇيىمداستىرۋدىڭ جالپى تارتىبىنەن شىعارۋ. بۇل مونوپوليستەردى تەكسەرۋدى نەعۇرلىم ولاردىڭ سانىن كەڭ قامتۋمەن جۇيەلى نەگىزدە وتكىزۋگە مۇمكىندىك بەرەدى.
تاريفتىك رەتتەۋشىگە مەملەكەتتىك ورگانداردىڭ دەرەكتەر قورىنا قولجەتىمدىلىك ۇسىنۋ. بۇل تاريفتىك سمەتالار جانە ينۆەستيتسيالىق باعدارلامالار ءىس-شارالارىنىڭ ورىندالۋى تۋرالى ەسەپتەردى قارجىلاي قۇرالداردى, سالىقتىق تۇسىمدەردى جانە ءونىمدى وتكىزۋ كولەمدەرىمەن جالعان, زاڭسىز سىزبالاردى انىقتاۋ ءۇشىن سالىستىرۋ قاجەت.
تاريفتىك رەتتەۋشىگە مونوپوليست ازاماتتىق-قۇقىقتىق قاتىناستاردا بولعان ءۇشىنشى تۇلعالارعا قاتىستى كەزىكپە تەكسەرىس جۇرگىزۋ قۇقىعىن ۇسىنۋ.
قۇقىق قورعاۋشى ورگانداردىڭ تاريفتىك رەتتەۋشىنىڭ سۇراۋى بويىنشا مونوپوليستەر قىزمەتىن تەكسەرۋلەرگە قاتىسۋ مۇمكىندىكتەرىن بەلگىلەۋ.
وسى تۇزەتۋلەر قۇپتالعان جاعدايدا «تابيعي مونوپوليالار تۋرالى» جانە «بيزنەس ورتانى جانە ساۋدا قىزمەتىن رەتتەۋدى دامىتۋ تۋرالى» زاڭ جوبالارىندا كورىنىس تاباتىن بولادى. ەكى زاڭ جوباسى دا ءماجىلىستىڭ قاراۋىندا.
