ورال قالاسىنداعى دوستىق ۇيىندە دوڭگەلەك ۇستەل ماجىلىسىمەن باستالعان اكتسياعا باتىس قازاقستان وبلىسى باسشىلىعى, حالىق اسسامبلەياسى مەن قۇقىق قورعاۋ ورگاندارى جەتەكشىلەرى جينالدى.
قازاقستان رەسپۋبليكاسى ىشكى ىستەر مينيسترلىگى كادر جۇمىسى دەپارتامەنتىنىڭ باسقارما باستىعى, پوليتسيا پولكوۆنيگى مۇرات جاقىپبەكوۆتىڭ ايتۋىنشا, قازاقستاننىڭ تاۋەلسىزدىك جىلدارىندا قۇقىق قورعاۋ ورگاندارىنىڭ 780 قىزمەتكەرى قىزمەت بابىندا ءجۇرىپ قازا تاپسا, 2378 قىزمەتكەر قىلمىسكەردى ۇستاۋ كەزىندە جاراقات العان ەكەن. ىشكى ىستەر بولىمدەرى مەن ۇلتتىق ۇلاننىڭ 1273 وكىلى قىزمەتتىك تاپسىرمالارىن جۇزەگە اسىرۋ بارىسىندا كورسەتكەن ەرلىگى ءۇشىن مەملەكەتتىك ماراپاتقا يە بولعان. مۇنىڭ ىشىندە 130 قىزمەتكەر وردەن-مەدالدارعا قازا تاپقاننان كەيىن ۇسىنىلعان.
- ەرلىك ۇمىتىلماۋى كەرەك. بۇگىنگى اكتسيانىڭ ماقساتى – ەرلىك پەن باتىرلىقتى ناسيحاتتاۋ, جاس ۇرپاقتىڭ بويىنا وتانسۇيگىشتىك سەزىم مەن پاتريوتتىق رۋحتىڭ دانەگىن سەبۋ. وسىنداي شارالاردىڭ ارقاسىندا حالىق پەن ىشكى ىستەر ورگاندارىنىڭ اراسىندا سەنىم كوپىرى ورنايدى, - دەدى ءوز سوزىندە مۇرات قوڭىرجان ۇلى.
ارينە, قۇقىق قورعاۋ ورگاندارىنىڭ, سونىڭ ىشىندە پوليتسيا قىزمەتىنىڭ رەفورماسى – زامان تالابىنان تۋىنداعان اقيقات. مۇرات جاقىپبەكوۆ پرەزيدەنتتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا كورسەتىلگەن تاپسىرمالار مەن مىندەتتەردى جۇزەگە اسىرۋعا باعىتتالعان شارالار تۋرالى كەڭىنەن ايتىپ بەردى.
- بۇگىنگى قوعامدا اركىمنىڭ ءوز ىسىمەن اينالىسۋى وتە ماڭىزدى. قوعامنىڭ تىنىشتىعىن, قۇقىق ءتارتىبىنىڭ ساقتالۋىن قاداعالاۋ – ىشكى ىستەر سالاسى قىزمەتكەرلەرىنىڭ تىكەلەي مىندەتى بولسا, پوليتسيا قىزمەتىنىڭ ماتەريالدىق-تەحنيكالىق جاعىنان تولىق جابدىقتالۋى – جەرگىلىكتى اتقارۋشى بيلىكتىڭ موينىنداعى ماسەلە, - دەدى باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ.
جيىندا ىشكى ىستەر ورگاندارىنىڭ جۇمىسىن العا باستىرىپ, ماتەريالدىق-تەحنيكالىق بازانى نىعايتۋعا قوسقان ۇلەسى جانە ىشكى ىستەر ءبولىمى وكىلدەرىنىڭ ەرلىگىن ناسيحاتتاعانى ءۇشىن بىرقاتار ادام قارازاقستان رەسپۋبليكاسى ىشكى ىستەر ءمينيسترىنىڭ ماقتاۋ قاعازى مەن العىس حاتىنا يە بولدى. ولاردىڭ ىشىندە باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ, «نۇر وتان» پارتياسى باتىس قازاقستان وبلىستىق فيليالى توراعاسىنىڭ ءبىرىنشى ورىنباسارى سەرىك سۇلەيمەن, جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى رەكتورىنىڭ كەڭەسشىسى, اۋىل شارۋاشىلىعى عىلىمدارىنىڭ دوكتورى, باتىس قازاقستان وبلىستىق پوليتسيا دەپارتامەنتى جانىنداعى كونسۋلتاتيۆتىك-كەڭەس ورگانىنىڭ توراعاسى قازىباي بوزىموۆ, اقىن اقۇشتاپ باقتىگەرەەۆا بار.
اكتسياعا قاتىسۋشىلار ورال قالاسىنداعى نازارباەۆ زياتكەرلىك مەكتەبىندە, №7, 10, 47 مەكتەپتەرىندە بولىپ, ۇستازدارمەن, وقۋشىلارمەن كەزدەستى. بۇلدىرشىندەردىڭ بۇگىنگى كۇننىڭ باتىرلارىنا قويعان: ء«سىز وسى ەرلىكتى جاساعان كەزدە قانداي ويدا بولدىڭىز؟ قورىققان جوقسىز با؟» دەگەن شىنايى ساۋالدارىنا جاۋاپ بەردى.
«قازىرگى زامان قاھارمانى» اكتسياسى باتىس قازاقستان وبلىسىنىڭ اكىمى التاي كولگىنوۆ قاتىساتىن سالتاناتتى شارامەن قورىتىندىلانادى.
قازبەك قۇتتىمۇرات ۇلى,
«ەگەمەن قازاقستان»
