كوپجاقتى ىنتىماقتاستىقتىڭ ماسەلەلەرىنە ارنالعان وتىرىس 9 قاراشادا قاۋىپسىزدىك كەڭەسىندە وسى ايدا توراعالىق ەتەتىن قىتايدىڭ باستاماسى بويىنشا ءوتتى. بيىلعى جىلى جانە بۇۇ باس اسسامبلەياسىنىڭ 73-ءشى سەسسياسىنداعى جالپى ساياسي پىكىرتالاستارىنىڭ بارىسىندا ەڭ باستى تاقىرىپ وسى بولدى.
قازاقستان وكىلى, قر-نىڭ بۇۇ جانىنداعى تۇراقتى وكىلىنىڭ ورىنباسارى قانات تۇمىش ءوز سوزىندە پرەزيدەنت نۇرسۇلتان نازارباەۆتىڭ «الەم. XXI عاسىر» مانيفەستىن ەسكە سالدى. وندا مەملەكەت باسشىسى الەمنىڭ كوشباسشىلارىن الەمدەگى ءادىل ەكونوميكالىق جانە الەۋمەتتىك ءتارتىپتى ورناتۋ ءۇشىن بىرلەسىپ جۇمىس ىستەۋگە, سونداي-اق بۇۇ-نىڭ 100 جىلدىعىنا وراي قاقتىعىستاردى, تەرروريزمدى توقتاتۋعا جانە جاپپاي قىرىپ-جوياتىن قارۋدى جويۋعا شاقىردى.
«شەشىلمەگەن قاقتىعىستار, كوپكە سوزىلعان سوعىستار, تەرروريزم, ەكسترەميزم, كەدەيشىلىك, ىندەت, زاڭسىز كوشى-قون جانە كليماتتىڭ وزگەرۋى سياقتى ماسەلەلەر بارلىق حالىق ءۇشىن ورتاق. بۇل پروبلەمالاردى وڭىرلىك جانە جاھاندىق دەڭگەيدەگى وسالدىق, حالىقارالىق قۇقىقتىق نورمالاردىڭ ەروزياسى, ىشكى ىستەرگە ارالاسۋ, پروكسي-سوعىستار مەن جاپپاي قىرىپ-جويۋ قارۋىن قولدانۋ قاۋپى قيىنداتىپ وتىر», - دەپ اتاپ ءوتتى قازاقستان وكىلى.
سونىمەن بىرگە, ول حالىقارالىق دارەجەدە بىرگە ءومىر ءسۇرۋدى, اتاپ ايتقاندا, جاھاندىق باسقارۋدى, جالپى جاۋاپكەرشىلىكتى جانە ۇجىمدىق ءىس-ارەكەتتەردى رەتتەيتىن قاعيداتتاردى نىعايتۋدىڭ ماڭىزدىلىعىن اتاپ ءوتتى.
وسى تۇرعىدا وسى جاھاندىق قۇبىلىسقا قارسى ىمىراسىز كۇرەسۋدى قولداۋعا نيەتتەس بۇۇ-نىڭ 70-تەن اسا مۇشە مەملەكەتىنىڭ باسىن ءبىر كواليتسياعا بىرىكتىرگەن تەرروريزمنەن ازات الەمگە قول جەتكىزۋ ءتارتىبىنىڭ كودەكسىن قازاقستاننىڭ باستاماسىمەن ىسكە قوسۋ اتالدى.
سونىمەن قاتار, قازاقستان دەلەگاتسياسى بۇۇ-نىڭ قاۋىپسىزدىك پەن بەيبىتشىلىك ماسەلەلەرى بويىنشا بار الاڭدار مەن ديالوگتى نىعايتۋ ءۇشىن اوسشك, شىۇ, ۇقشۇ, يىۇ, ەو, ەقىۇ جانە تاعى باسقا سياقتى حالىقارالىق جانە وڭىرلىك ۇيىمدارمەن جانە قۇرىلىمدارمەن ىنتىماقتاستىقتى كۇشەيتۋ قاجەتتىگىن اتاپ ءوتتى.
قازاقستاننىڭ كوپجاقتىلىق ءۇشىن ىسجۇزىندە قوسقان ۇلەسىنە, ياعني 120 جوعارى بىلىكتى بىتىمگەرشىنى بۇۇ-نىڭ ليۆانداعى ۋاقىتشا كۇشتەرىنە باعىتتاۋ ۇلگىسىنە ەرەكشە نازار اۋدارىلدى. ء«بىز قازاقستاندىق بىتىمگەرشىلىك كونتينگەنتى قازاقستاننىڭ بۇۇ قاۋىپسىزدىك كەڭەسىندەگى جۇمىسى بارىسىندا ورىستەگەنىن ماقتان تۇتامىز», - دەدى ق. تۇمىش.
بۇۇ باس حاتشىسى انتونيۋ گۋتەرريش تە ءوز سوزىندە بىتىمگەرشىلىكتى حالىقارالىق ىنتىماقتاستىقتىڭ وڭ مىسالى رەتىندە ەرەكشە اتاپ ءوتتى. «بەيبىتشىلىكتى قولداۋ وپەراتسيالارى كوپتەگەن ەلدەرگە قارۋلى قاقتىعىستارمەن كۇرەسۋگە كومەكتەستى. كوبىنەسە ءبىزدىڭ وپەراتسيالار باستى ءرول اتقارىپ, قانتوگىستى جانە حاوستى توقتاتۋعا مۇمكىندىك بەرەدى», - دەدى ا. گۋتەرريش. 151 مەملەكەت, ونىڭ ىشىندە قازاقستان جانە 4 جەتەكشى حالىقارالىق ۇيىم بۇۇ اياسىندا ازىرلەنگەن بىتىمگەرشىلىك سالاسىنداعى ءىس-ارەكەتتەر جوسپارىن قولدادى. سونىمەن قاتار, بۇۇ قاۋىپسىزدىك كەڭەسىنىڭ اشىق پىكىرتالاستارىنا بۇۇ باس اسسامبلەياسى 73-ءشى سەسسياسى توراعاسىنىڭ مىندەتىن اتقارۋشى ءاليا ءال-تاني, ەكوسوس توراعاسى ينگا كينگ جانە بۇۇ-نىڭ حالىقارالىق قىلمىستىق سوت توراعاسى احمەد يۋسۋف قاتىستى.
