وبلىس وڭىرىندەگى اۋداندار مەن قالالارداعى, ءىرى ەلدى مەكەندەردەگى مەشىتتەر يماندىلىق ساۋلەسىن توگەدى. قازاقتىڭ تەاتر ونەرىنىڭ دارابوزدارىن بەرگەن قوستاناي جەرىندە 2000 جىلى قازاق دراما تەاترى وتاۋىن كوتەردى. وبلىستىق فيلارمونياداعى «اق جەلەڭ» ۇلت-اسپاپتار ءانسامبلى, قازاق ۇلت-اسپاپتار وركەسترى, قوستاناي قالاسىنداعى «ميراس» ۇلت-اسپاپتار ءانسامبلى قازاقتىڭ ءان-ءبيىن شەت جەرگە دەيىن تانىتىپ جۇرگەن ونەر ۇجىمىنا اينالدى. مىنە, سانامالاعان وسى ءىستىڭ ءبارىنىڭ باسىندا ءاۋ باستا «ۇلتىمنىڭ ونەرى – ءومىرىم» دەگەن پاتريوت ادامدار ءجۇردى. سونىڭ ءبىرى داۋلەسكەر كۇيشى, ونەرپاز اباي ءامىرحانوۆ ەدى. ول 90-جىلدارى قوستاناي قالالىق مادەنيەت باسقارماسى جانىنان «ميراس» ءانسامبلىن قۇردى. ونەر ۇجىمى وسى كۇنگە دەيىن ساحنادان تۇسكەن جوق, اباي عازيز ۇلىنىڭ تالانتتى شاكىرتتەرىنىڭ ءبىرى بەرىك ورازالين يگى ءىستى لايىقتى جالعاستىرىپ كەلەدى. وبلىس ورتالىعىنداعى ءوتىپ جاتاتىن مادەني شارالاردا ءانسامبلدىڭ ءانشى-كۇيشىلەرىن تىڭداعان كورەرمەننىڭ كوڭىلى جەلپىنىپ سالا بەرەدى.
اباي عازيز ۇلى ۇلتتىق ونەردى ناسيحاتتاۋدا مۇنىمەن شەكتەلىپ قالمادى. ول تۇركى تىلدەس جاستاردىڭ باسىن بىرىكتىرىپ, «ورال مۇڭى» حالىقارالىق فەستيۆال-بايقاۋىن ۇيىمداستىرۋشىلاردىڭ ءبىرى بولعان ەدى. ەكى جىلدا ءبىر رەت باشقۇرتستاننىڭ استاناسى ۋفا قالاسىندا وتەتىن بۇل ونەر جارىسىنا قىرعىزستان, تۇرىكمەنستان, قازاقستان, رەسەيدىڭ التاي رەسپۋبليكاسى, چەشەنستان, داعىستان, حاكاسيا, تۋۆا, تاتارستان, باشقۇرتستان رەسپۋبليكالارى جانە باسقا ەلدەردەن ۇلتتىق ونەر مايتالماندارى جينالىپ, دۋماندى قىزدىراتىن. ابايدىڭ «ميراسى» سول ونەر بايگەسىنەن جۇلدەلى ورالاتىن. اباي قوستانايدا كاسىبي مۋزىكا ماماندارىن دايارلاۋدا كوپ تەر توكتى. قوستاناي مەملەكەتتىك پەداگوگيكالىق ينستيتۋتىنداعى ونەر فاكۋلتەتىن باسقارا ءجۇرىپ شاكىرتتەر تاربيەلەدى. كەيىنىرەك استانا قالاسىنا قىزمەت اۋىستىرىپ, وندا «سارىارقا» انسامبلىنە جەتەكشىلىك ەتتى. استانا قالالىق فيلارمونياسىن باسقاردى. امال نە, ونەرپاز نەبارى 47 جاسىندا ومىردەن وزدى.
تالاي دارىندى بەرگەن تورعايدا تۋعان ابايدىڭ ونەرىن سول وڭىردە بىلمەيتىن جان جوق شىعار. جاستايىنان دومبىرانىڭ قۇلاعىندا ويناعان كۇيشىنىڭ تالانتىن ۇلكەن-كىشى قۇرمەتتەدى. جاقىندا قوستاناي قالاسىندا وتكەن «عاسىرلار پەرنەسى» وبلىستىق فەستيۆالى اباي ءامىرحانوۆتى ەسكە الۋعا ارنالدى. وعان وبلىستىڭ جانگەلدين, امانگەلدى, فەدوروۆ, التىنسارين اۋداندارى مەن ارقالىق قالاسىنان كەلگەن جەتى ونەر ۇجىمى قاتىستى.
– قايسىبىر جىلى وبلىستىق مادەنيەت سارايىن اشار كەزدە وعان ات قويۋ كەرەك بولدى. سول كەزدە قالالىق اكىمدىكتەگىلەر: «ميراس» ءانسامبلى ەڭ ءبىرىنشى وسى عيماراتتا قۇرىلعان ەدى. ەندەشە, مادەنيەت سارايىنىڭ دا اتى «ميراس» بولسىن» دەپ, ءبىزدىڭ ءانسامبلدىڭ اتىن قويعان. ەگەر اباي بولماسا, «ميراس» بولماس ەدى. «ميراس» بولماسا, ونەر وتاۋىنا ونداي ات قويىلماس پا ەدى, بالكىم. بۇگىن تالانتتى ونەرپازدىڭ ارۋاعى ءبىر اۋناپ تۇسكەن شىعار. بۇگىنگى كەشتى ۇيىمداستىرىپ وتىرعان وبلىستىق فيلارمونيا مەن قالالىق مادەنيەت بولىمىنە, «ميراس» مادەنيەت ۇيىنە العىسىم شەكسىز, – دەيدى بەلگىلى كومپوزيتور قاليبەك دەرىپسالدين.
فەستيۆالدا وركەسترلەر ورىنداعان قازاق كومپوزيتورلارىنىڭ كۇيلەرى, كلاسسيكالىق شىعارمالار جۇرەك تەبىرەنتتى. سونداي-اق حالىقارالىق بايقاۋلاردىڭ جۇلدەگەرلەرى ماناپبەك قادىروۆ, ازامات مۇقاتوۆ, كۇنسۇلۋ جاقاەۆا, قىدىربەك قيىسقان, بوتاگوز دۇبىرباەۆا, بايدوس قوجاساعيەۆ, نۇرسۇلتان قاسىم سەكىلدى انشىلەر كورەرمەنىن ءان قۇدىرەتىنە بولەدى.
ءنازيرا جارىمبەت,
«ەگەمەن قازاقستان»
قوستاناي
