شالعايداعى جاقسى اۋدانىنداعى بەلاعاش كولى دە ءبىر كەزدە كوز جاسىنداي تازا, تابانى جارقىراپ جاتاتىن اق ايدىن ەدى. جىلدار وتە كەلە كىلكىگەن ۋاقىت توزاڭى كولدى قورىسقا اينالدىرىپ جىبەردى. لاي سۋدان بالىق بىتكەن قىرعىن تاپقان. وسى ولقىلىقتىڭ ورنىن تولتىرۋ ءۇشىن اۋدان اكىمدىگى وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ قولداۋىمەن كولگە ارقايسىسىنىڭ سالماعى 20-30 گرامم بولاتىن, ۇزىن سانى جەتى مىڭعا جۋىق امۋردىڭ اقمارقاسى مەن ءدوڭماڭداي بالىق جىبەردى. ونداعى ماقسات – اۋدان تۇرعىندارىن اۋىز سۋمەن قامتاماسىز ەتىپ وتىرعان بەلاعاش كولىن بيولوگيالىق تۇرعىدان تازارتۋ.
– بۇل جاقسى باستاما, – دەيدى «اركۋدا پلاتينيۋم» سەرىكتەستىگىنىڭ وكىلى ۆاسيلي ۆەيبەر, – قازىر كولگە بالىق جىبەرىپ جاتىرمىز. بالىقتىڭ بۇل تۇرلەرى كول تابانىنداعى بالدىرلى قورىستى قۇرتۋعا ءتيىس.
كولدى تازارتۋعا سەپتىگى تيەتىن بالىقتىڭ بۇل تۇرلەرىن رەسەيدەن وسى سەرىكتەستىك ارنايى اكەلگەن ەكەن. ولاردىڭ ورتاشا ءومىر ءسۇرۋ ۇزاقتىعى –30 جىل. كول سۋىنا بوي ۇيرەتۋ ءۇشىن ارنايى تەمپەراتۋرانى قالپىندا ۇستايتىن قۇرىلعىلارمەن جابدىقتالعان ىدىستارمەن جەتكىزىلىپتى.
– ەل يگىلىگى بولىپ وتىرعان تابيعاتىمىزعا جاناشىرلىقپەن قاراماساق بولمايدى. وسى كولدەن التى مىڭعا جۋىق حالىق سۋ ءىشىپ وتىر, – دەيدى «بەلاعاش» سەرىكتەستىگىنىڭ ديرەكتورى ۆيكتور گەرتنەر, – ۇزاق ۋاقىتتان بەرى شەشىمىن تاپپاي كەلە جاتقان ماسەلە ەدى. ەندى مىنە, ءىس وڭىنان ورالعالى تۇر. الداعى ۋاقىتتا جىل سايىن تازارتۋ جۇمىستارىن جۇيەلى جۇرگىزۋدى ويلاستىرۋدامىز.
مامانداردىڭ ايتۋىنا قاراعاندا, بالىق بىتكەننىڭ قونىس اۋدارۋى ءۇشىن قوڭىر كۇز قولايلى ەكەن. بۇل كەزدە اۋرۋ-سىرقاۋدان ءدىن امان بولاتىن كورىنەدى. ساباقتى ينە ساتىمەن ورالسا, اقمارقا مەن ءدوڭماڭدايدىڭ ارقاسىندا بەلاعاشتىڭ سۋى بالداي ءمولدىر كولى باعزى قالپىنا قايتا كەلمەك.
بايقال ءبايادىل,
«ەگەمەن قازاقستان»
اقمولا وبلىسى, جاقسى اۋدانى
