وبلىس تۇرعىندارىن ەلەكتروندى قۇجاتپەن قامتۋ 95,6 پايىز دارەجەسىنە جەتىپ قالدى. بۇل تۋرالى جۋىردا وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بايان بۋرامباەۆا ايتتى.
– ەلەكتروندى دەنساۋلىق تولقۇجاتىنىڭ كومەگىمەن دارىگەرلەر پاتسيەنتتىڭ دەنساۋلىق جاعدايى, ونىڭ انامنەزى, سوزىلمالى اۋرۋلارى, پرەپاراتتاردى قابىلداۋ اللەرگياسى تۋرالى تولىق اقپاراتقا قول جەتكىزە الادى. كومەك كورسەتۋ جەرى مەن مەديتسينالىق ۇيىمداردا پايدالاناتىن اقپارات جۇيەسىنە قاراماستان ادام دەنساۋلىعى تۋرالى بارلىق ءتۇيىندى مالىمەتتەر ءبىر بازادا جينالادى. ناتيجەسىندە پاتسيەنتكە دارىگەرگە بارۋدى الدىن الا جوسپارلاۋ, ەلەكتروندى جولدامالار مەن تالداۋ ناتيجەلەرىنىڭ ەسەبىنەن دارىگەرگە بارۋدىڭ سانىن 2 ەسەگە قىسقارتۋ, دارىگەر پاتسيەنتتىڭ دەنساۋلىعى تۋرالى اقپاراتتى ءبىر جەرگە جيناقتاۋى جانە دارىگەرلەر مەن ورتاشا مەديتسينا پەرسونالىنىڭ ەڭبەگىن وڭتايلاندىرۋعا مۇمكىندىك بەرەدى,–دەدى ول.
وبلىستىق ونكولوگيا ورتالىعى ديرەكتورىنىڭ ورىنباسارى جاندوس ءادىلحان:
– ەلباسىنىڭ جولداۋىندا كورسەتىلگەندەي, وبلىستا ونكولوگيالىق قىزمەتتى جەتىلدىرۋ ماقساتىندا جۇيەلى جۇمىس اتقارىلىپ كەلەدى. قازىرگى تاڭدا قىزىلوردا قالاسىنىڭ سول جاعالاۋىندا جوسپارلانعان ونكولوگيالىق ءپروفيلدى كوپسالالى 300 توسەك ورىندىق اۋرۋحانانىڭ جوبالىق سمەتالىق قۇجاتتاماسىن ازىرلەۋگە 150,5 ملن تەڭگە قارجى ءبولىنىپ, جىل سوڭىنا دەيىن جۇمىس جوباسىنا مەملەكەتتىك ساراپتاما قورىتىندىسى الىنباق. وبلىستا ونكولوگيالىق اۋرۋلاردىڭ الدىن الۋ, ونى ەمدەۋدە كوپتەگەن تىڭ تاسىلدەر ەنگىزىلىپ وتىر. 2016 جىلى ونكولوگيالىق ورتالىقتا ءپاللياتيۆتى كومەك كورسەتەتىن بولىمشە, 2018 جىلى دياگنوستيكالىق پالاتالار اشىلدى. دياگنوستيكالىق پالاتالار ارقىلى قىسقا ۋاقىتتا كۇماندى ونكولوگيالىق اۋرۋلاردى انىقتاۋعا قول جەتسە, ءپاللياتيۆتى كومەك ءىV ساتىداعى ونكولوگيالىق سىرقاتتاردىڭ تولىق ەم الۋىنا جاعداي تۋعىزدى. سونىمەن قاتار بيىل وبلىس اكىمى قىرىمبەك كوشەرباەۆتىڭ قولداۋىمەن وبلىستىق ونكولوگيا ورتالىعى وڭتۇستىك كورەيا ەلىنىڭ جەتەكشى كلينيكالارىمەن مەموراندۋمعا وتىردى. جىل بويىنا وڭتۇستىك كورەيا ەلىنىڭ پروفەسسورلارى مەن بىلىكتى دارىگەرلەرى وبلىسىمىزعا كەلىپ, ناۋقاستاردى قاراپ, وتا جاساپ, زەرتحانالىق تاجىريبەسىمەن دە ءبولىستى, – دەدى.
قازىر الەمدەگى مەديتسينا سالاسىنداعى جەتىستىكتەرگە وڭتۇستىك كورەيا مەملەكەتىنە باسىمدىق بەرىلەدى. الىپ مۇحيت جاعاسىنداعى مەملەكەتتىڭ مۇنداي تابىسقا جەتۋى ىشكى باسەكەلەستىكتىڭ مىقتىلىعىنان دەلىنەدى. ويتكەنى مۇنداعى اۋرۋحانا, كلينيكالاردىڭ دەنى ون, جيىرما جىل بۇرىن جەكە قولعا وتكەن. جەكەلەگەن ينۆەستوردىڭ تابىسقا جەتۋ قۇرالى – الەمدىك وزىق مەديتسينا يگىلىكتەرىنە جول اشىپ, وزىنە ادامداردى ماگنيتتەي تارتۋى بولماق. دۇنيەجۇزىندە وڭتۇستىك كورەيا مەملەكەتىمەن دەنساۋلىق ساقتاۋ سالاسىندا ىنتىماقتاستىق تانىتىپ, ارىپتەستىك بايلانىس ورناتۋعا تىرىسىپ جاتقان ەلدەر كوپ. سونىڭ ءبىرى – قازاقستان.
باسەكەلەستىكتى ارتتىرۋ ءۇشىن اۋرۋحانا اتاۋلىنى جەكە ينۆەستورلارعا بەرگەن مەملەكەتتىڭ مەديتسيناداعى ءوز ۇلەسى 5 پايىزدان اسپايدى. مۇنداي جاعدايدا جەكە كلينيكالاردىڭ ءبىر-بىرىنەن قىزمەت كورسەتۋ ساپاسىن ارتتىراتىندىعى بەلگىلى. ماسەلەن, سەۋل ۋنيۆەرسيتەتىنىڭ جانىنداعى بۋدان گوسپيتالىندە ناۋقاس قاعازىن تولتىرۋ دەگەن مۇلدەم جوق. بارلىق دەرەك كومپيۋتەردە ساقتالادى. ءار بولىمشە ينتەراكتيۆتى تاقتالار ارقىلى سىرقات مالىمەتىمەن قانىعادى. ارنايى بىلەزىك تاعىپ جۇرەتىن ناۋقاستىڭ بارلىق جاعدايى, ءدارى قابىلداۋى wi-fi ارقىلى دەرەكقورعا تىركەلەدى.
شەتەلدەن جانىنا ءدارۋ ىزدەپ كەلگەن ناۋقاستارعا مۇمكىندىگىنشە ءوز تىلىندە قىزمەت ەتەدى. بۋدان ۋنيۆەرسيتەتىندەگى پروفەسسور سەرگەي كيمنىڭ كىندىك قانى قازاقستاندا تامعان ەكەن. سانكت-پەتەربۋرگتە مەديتسينالىق ۋنيۆەرسيتەتتى تامامداعان سەرگەي جيىرما جىل بۇرىن وڭتۇستىك كورەياداعى وقۋ ورنىنىڭ ماگيستراتۋراسىنا ءتۇسىپتى. تاريحي وتانىنا ورالعان سەرگەي كيم ورىس تىلىنەن بولەك, قازاقشاعا دا جەتىك.
سول سەرگەي قىزىلورداعا دا كورەي دارىگەرلەرىمەن بىرگە ات ءىزىن سالىپ تۇرادى. ول كورەياداعى دەنساۋلىق ساقتاۋ سالاسىنداعى جەتىستىكتەردى جاڭا تەحنولوگيالاردى تەز ەنگىزۋمەن قاتار, مەديتسينالىق ساقتاندىرۋ جۇيەسىنىڭ جاقسى جۇمىس ىستەۋىمەن بايلانىستىرادى. ادەتتە, دەرتتى ازامات اۋرۋحاناعا كەتكەن شىعىنىنىڭ 30 پايىزىنا عانا تولەم جاسايدى ەكەن. ال قالعانىن ساقتاندىرۋ قورى تولەيدى. قازاق «اتى جامان اۋرۋ» دەپ اتاپ كەلگەن قاتەرلى ىسىكتىڭ بارلىق شىعىنىن دەرلىك ساقتاندىرۋ قورى كوتەرىپ الادى. ناۋقاستى ساۋىقتىرۋ جونىنەن الەمدە جاقسى تابىسقا جەتىپ وتىرعان وڭتۇستىك كورەيا دارىگەرلەرى ءوز تاجىريبەلەرىن وزگە مەملەكەتتەرمەن بولىسۋگە كەلگەندە ىشتارلىق تانىتپايدى. دارىگەرگە ناۋقاستى الالاۋعا بولمايدى. ول سىرقاتىنان تولىق ايىعىپ كەتۋى ءۇشىن بارلىق جاعداي جاسالۋى كەرەك.
قىزىلوردا وبلىستىق دەنساۋلىق ساقتاۋ باسقارماسىمەن ۇزاق مەرزىمگە مەموراندۋمعا قول قويعان وڭتۇستىك كورەيا ەلىنىڭ دارىگەرلەرى مىڭداعان جانداردىڭ سىرقاتىن قازاقستاندىق دارىگەرلەرمەن بىرگە ەمدەپ كەلەدى. دۇنيەجۇزىلىك مەديتسينا سالاسىندا ورنىن ويىپ العان كورەيلەرمەن بىرگە وتا جاساۋعا قاتىسىپ جۇرگەن وتاندىق دارىگەرلەر دە بىلىكتىلىك جاعىنان ءوسىپ جاتىر.
باقتيار تايجان,
«ەگەمەن قازاقستان»
قىزىلوردا وبلىسى
