ەلوردامىزدىڭ 20 جىلدىق مەرەيتويىنا وراي ۇيىمداستىرىلعان قازاقستان وڭىرلەرىندەگى استانانىڭ مادەنيەت كۇندەرى اياسىندا الماتى, شىمكەنت, تاراز, بالقاش, قاراعاندى قالالارىندا وتكەن گاسترولدىك ساپار قىركۇيەك ايىنىڭ 20-سى مەن قازاننىڭ 16-سىنا دەيىن جالعاستى. گاسترول باعدارلاماسىنا تەاتر رەپەرتۋارىنداعى ەڭ ۇزدىك قويىلىمدار ىرىكتەلىپ الىنىپ, ءوڭىر كورەرمەندەرىن قۋانتتى. اتاپ ايتار بولساق, ب.سوقپاقباەۆتىڭ «...كوزىمە ءبىر كورىنسەڭ, بالا عاشىق...» ساحنالىق پوۆەسى, ۋ.شەكسپيردىڭ «اساۋعا تۇساۋ» كومەدياسى, م.لەۆيدىڭ «جەر مەن كوكتىڭ اراسى» مەلودراماسى, ج.پ.پيلو, و.شۋلتەزدىڭ «موتسارت» ميۋزيكلى, ن.جاقىپبايدىڭ «جانارىمداعى جالعىز اۋەن» مۋزىكالىق قويىلىمى, ع.مۇسىرەپوۆتىڭ «جىبەك» سپەكتاكلى جانە بالدىرعاندارعا ارنالعان يۋ.الەسيننىڭ «زولۋشكا» مۋزىكالىق ەرتەگىسى ورتالىق جانە وڭتۇستىك ءوڭىردىڭ قالالارى كورەرمەندەرى مەن شاھار قوناقتارىنىڭ تولاسسىز قوشەمەتى مەن ىستىق ىقىلاسىنا بولەنىپ قايتتى.
استانانىڭ 20 جىلدىعىنا ارنالعان گاسترولدىك ساپار باعدارلاماسى اياسىندا اۋليەاتا ءوڭىرى – كونە تاراز شاھارىندا دراماتۋرگ بولات بەكجانوۆتىڭ ء«ومىر» دراماسىنىڭ تۇساۋى كەسىلىپ, تۇڭعىش رەت تارازدىق كورەرمەن نازارىنا ۇسىنىلدى. ۇلت ەرتەڭى مەن ۇرپاق اراسىنداعى نازىك ءتىن – تەك پەن تامىر ماسەلەسىنە تەرەڭ ءۇڭىلتىپ, زاماننىڭ زاپىرانعا تولى اششى شىندىعىن سۋرەتتەيتىن قويىلىمنىڭ كورەرمەن كوڭىلىن قوزعاپ, سەزىمىن سىلكىنتكەنى ءسوزسىز.
ايتا كەتەيىك, «جىبەك» ميۋزيكلى 22 ماۋسىم مەن 9 شىلدە ارالىعىندا وڭتۇستىك كورەيانىڭ مادەني استاناسى دەگۋ قالاسىندا وتكەن ءحىى دەگۋ حالىقارالىق ميۋزيكل فەستيۆالىنىڭ (Dimf – daegu international musical festival) ارنايى شاقىرتۋىنا يە بولىپ, فەستيۆال تورىندە ونەر كورسەتتى. ميۋزيكل جانرى دامىعان فرانتسيا, ۇلىبريتانيا, قىتاي, كورەيا, تايۆان, چەحيا, رەسەي سىندى ءىرى مەملەكەتتەرمەن يىق تىرەستىرە ونەر كورسەتۋ جاس ۇجىم ءۇشىن ۇلكەن مارتەبە عانا ەمەس, تەڭدەسسىز تاجىريبە دە بولعانى ءسوزسىز. قازاق ەلىنىڭ كوك تۋىن جەلبىرەتىپ, ۇلتتىق كلاسسيكالىق ءتول تۋىندىمىزدى الەمدىك ارەنادا جاھان كورەرمەندەرى نازارىنا ۇسىنىپ, فەستيۆالدىڭ «ارنايى ديپلومىمەن» ماراپاتتالدى.
سونىمەن قاتار وسى جىلدىڭ قىركۇيەك ايىندا مادەنيەت جانە سپورت مينيسترلىگىنىڭ ۇيىمداستىرۋىمەن وتكەن ەلوردامىز – استانا قالاسىنىڭ 20 جىلدىق مەرەيتويى جانە كورنەكتى تەاتر اكتەرى, رەجيسسەر, قازاقستاننىڭ حالىق ءارتىسى ر.سەيتمەتوۆتىڭ 80 جىلدىعىنا ارنالعان قازاقستان دراما تەاترلارى فەستيۆالىندە دە ءدال وسى «جىبەك» ميۋزيكلىمەن باق سىناپ, ساحنا ساراپشىلارى مەن كورەرمەن قاۋىمنىڭ قوشەمەتىنە بولەنىپ, «ۇزدىك قويىلىم» اتالىمىندا توپ جارىپ, فەستيۆالدىڭ باس جۇلدەسىن قانجىعاسىنا بايلادى.
وتكەن ماۋسىمنىڭ جاڭالىعىنا اينالعان اتالعان قويىلىم جاستار تەاترىنىڭ جىلاشار باعدارلاماسىن دا جانداندىرىپ, ۇزاق ۋاقىت ۇزىلىستەن سوڭ ساعىنىسا قاۋىشار تالعامپاز كورەرمەنىن تەك قانا مارتەبەلى تەاتر ونەرى سىيلار رۋحاني لاززاتقا كەنەلتەتىنە سەنەمىز. ەندەشە, تەاترعا اسىعىڭىز!
نازەركە جۇماباي,
«ەگەمەن قازاقستان»
