– «قازىرگى تاڭدا وبلىستا اۆتوكولىك قۇراستىرۋ جۇمىسى قارقىندى دامىپ كەلەدى. جىل باسىنان كولىك قۇراستىرۋ 15,7%-عا دەيىن ءوستى. «سارىاركااۆتوپروم» جشس الاڭىندا بيىل – 7772 اۆتوكولىك, 93 جۇك كولىگى, 76 اۆتوبۋس پەن ميكرواۆتوبۋس شىعارىلدى. ال «اگروماشحولدينگ» اق-تا 225 كومباين ءوندىرىلدى, بۇل كاسىپورىننىڭ ونىمدىلىگى 2,1 ەسەگە ارتىپ وتىر, – دەدى ا.مۇحامبەتوۆ.
سونداي-اق ءوڭىر باسشىسى وبلىستاعى اگروونەركاسىپتىك كەشەن سالاسىنا تسيفرلى تەحنولوگيالار قالاي ەنگىزىلىپ جاتقانىنا توقتالدى. – قوسارلاس جۇرگىزۋ تەحنولوگيالارىن ەنگىزۋ جونىندەگى تەحنيكا پاركى جاڭعىرتىلدى, جانار-جاعارمايدى ەسەپكە الاتىن جانە تەحنيكانى ورنىنان اۋىستىرۋ ەسەبىن جۇرگىزەتىن داتچيكتەر ورناتىلدى. ەگىن شىعىمدىلىعىنىڭ, ىلعالدىلىعىنىڭ, ءدان باستىرۋدىڭ ونلاين مونيتورينگى جۇيەسى ەنگىزىلە وتىرىپ, ەگىن جيناۋ تەحنيكاسى قايتا جاراقتاندىرىلدى. جانۋارلاردى چيپتەۋ جانە ەلەكتروندى ەپيزووتيالىق كارتالارىن جاساۋ تەحنولوگيالارى ەنگىزىلۋدە, – دەدى ول.
كەلەسى جىلدان باستاپ وبلىستاعى بيۋدجەتكە تۇسەتىن جۇكتەمە ازايماق. ياعني, ول ورتاشا ەسەپپەن تاياۋداعى ءۇش جىلدا جىل سايىن شامامەن 2 ملرد تەڭگەنى قۇرايدى دەپ كۇتىلۋدە.
مەملەكەت باسشىسىنىڭ قازاقستان حالقىنا جولداۋىندا ايتىلعان مىندەتتەردى ىسكە اسىرۋ اياسىندا قوستاناي وبلىسىنىڭ سوڭعى 9 ايداعى جۇمىسىن قورىتىندىلاعان ايماق باسشىسى جۇمىسشىلاردىڭ ەڭبەكاقىسى تۋرالى ءسوز قوزعادى.
ونىڭ ايتۋىنشا, 200-دەن استام كاسىپورىندا 36 مىڭ جۇمىسكەردىڭ جالاقىسى وسۋدە. مىسالى, 1 قاراشاداعى كورسەتكىش بويىنشا 180 مەكەمەدە 4500 ادامنىڭ جالاقىسى كوبەيدى. 1 جەلتوقساننان 337 مەكەمەدە 7600 ادامنىڭ تابىسى ەداۋىر وسەتىن بولادى. قالعان مەكەمەلەردە دە 1 قاڭتاردان باستاپ ەڭبەكاقىنى ءوسىرۋ جوسپارلانعان.
ايتا كەتۋ كەرەك, «رۋحاني جاڭعىرۋ» باعدارلاماسى اياسىندا وڭىردە بيىل سوماسى 4,2 ملرد تەڭگەنىڭ 153 الەۋمەتتىك جوباسى ىسكە اسىرىلىپ جاتىر.
اقمارال اعزامقىزى,
«ەگەمەن قازاقستان»
