قازاقستان • 12 قاراشا، 2018

وسكەمەن قالاسىنىڭ كوشەلەرىنە امىرە قاشاۋباەۆ پەن قاليحان ىسقاقتىڭ اتى بەرىلەدى

320 رەتكورسەتىلدى

وسكەمەن رۋحاني جاڭعىرا باستاعانداي. بۇگىن قالالىق اكىمدىكتە شاھار كوشەلەرىنىڭ اتاۋىن وزگەرتۋ بويىنشا وتكەن قوعامدىق تىڭداۋدا وبلىس ورتالىعىنداعى 16 كوشەنىڭ (تورتەۋىنە جاڭا اتاۋ بەرۋ) اتاۋىن وزگەرتۋ ماسەلەسى قارالدى. ەڭ اۋەلى اتاۋسىز 4 كوشەگە اتاۋ بەرۋ جايى قارالىپ، ول كوشەلەرگە جاقيا ءشايجۇنىسوۆ، لەۆ گۋميلەۆ، ارمانداستار جانە مەيىرىم اتاۋلارى ۇسىنىلدى.

سودان كەيىن وكتيابر كوشەسىن قوعام قايراتكەرى، الاش ارداقتىسى مۇحامەتجان تىنىشپاەۆ، كرۋپسكايا كوشەسىن ونەرتانۋشى ەۆگەني برۋسيلوۆسكي، رەۆوليۋتسيوننايا كوشەسىن قازاقتىڭ كلاسسيك جازۋشىسى قاليحان ىسقاق، سوۆەتسكايا كوشەلەرىن ادولف يانۋشكەۆيچ پەن الەكساندر زاتاەۆيچ، دزەرجينسكي كوشەسىن ايگىلى ءانشى امىرە قاشاۋباەۆ، كيروۆ كوشەسىن ورىس جازۋشىسى انتون چەحوۆ، وردجونيكيدزە كوشەسىن تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆ، كۋيبىشەۆ كوشەسىن نارىن، كالينين كوشەسىن شىڭعىستاۋ، گولوۆكوۆ كوشەسىن بەيبىتشىلىك، ءى،ايتىقوۆ كوشەسىن اسار، وكتيابر ارالىنداعى اتاۋسىز ساياباقتى سامال دەپ اتاۋ جونىندەگى ۇسىنىستار تالقىعا ءتۇستى. قالالىق ءماسليحات دەپۋتاتتارىنىڭ باسىم كوپشىلىگى بۇل ۇسىنىستارعا قولداۋ ءبىلدىرىپ، قولدارىن كوتەردى.

قالالىق ءماسليحات دەپۋتاتى، «نۇر وتان» پارتياسى وسكەمەن قالالىق فيليالى توراعاسىنىڭ ورىنباسارى مايرا ەكىباسوۆا جۇرگىزگەن جيىندا الىبەك قاڭتارباەۆ، ءتۇسىپحان تۇسىپبەكوۆ، سەرىك قۇسانباەۆ، بوريس ششەرباكوۆ، گۇلبارشىن ابىلعازينا باستاعان، ءادىل قاراتاي، مۇراتحان كەنجەحان ۇلى، ەسىمجان ناقتىباي ۇلى،  قىزىربەك دۇرگىنباي، ميراس مالعاجداروۆ، قانات ورالبەك قوستاعان وسكەمەندىك زيالى قاۋىم وكىلدەرى، جاستار ءوز پىكىرلەرىن ايتىپ، بەلسەندىلىك تانىتتى. ەندى بۇل ۇسىنىستار رەسپۋبليكالىق ونوماستيكالىق كوميسسيانىڭ قاراۋىنا جىبەرىلەدى.

ازامات قاسىم،

«ەگەمەن قازاقستان»

وسكەمەن

سوڭعى جاڭالىقتار

ۇقساس جاڭالىقتار