فەستيۆال شەڭبەرىندە ش.ايمانوۆ اتىنداعى «قازاقفيلم» كينوستۋدياسىندا جارىق كورگەن «جاۋجۇرەك مىڭ بالا», «اناعا اپارار جول», «قۇنانباي», «ورالمان» جانە «جاڭعاق تال» فيلمدەرى كورسەتىلدى. فەستيۆالدىڭ اشىلۋ سالتاناتىندا قازاقستاننىڭ رۋمىنياداعى ەلشىسى داۋلەت باتىراشەۆ رۋمىن اۋديتورياسىن وتاندىق كينووندىرىس ونىمدەرىمەن تانىستىرۋ شاراسى مەملەكەتتەردىڭ مادەني-گۋمانيتارلىق ىنتىماقتاستىعىنىڭ دامۋىنا جانە ەكى ەلدىڭ رۋحاني جاقىنداسۋىنا ىقپالىن تيگىزەتىنىن ايتتى.
فەستيۆالگە قاتىسقان اسىلحان تولەپوۆ كورەرمەندەرگە «جاۋجۇرەك مىڭ بالا» ءفيلمىنىڭ ءتۇسىرىلۋى تۋرالى ايتىپ بەردى. اكتەر بۇل ءىس-شارا رۋمىن كورەرمەندەرىنە قازاق حالقىنىڭ تاريحى, مادەنيەتى جانە داستۇرىمەن جاقىن تانىسۋىنا مۇمكىندىك بەرەتىنىن اتاپ ءوتتى.
سونداي-اق فەستيۆالگە جەرگىلىكتى تۇرعىندار, قوعام قايراتكەرلەرى, ۇكىمەت, ىسكەرلىك جانە اكادەميالىق ورتا وكىلدەرى, سونداي-اق, كلۋج-ناپوكا قالاسىندا وقىپ جۇرگەن قازاقستاندىق ستۋدەنتتەر قاتىستى. ولار قازاق كينوفەستيۆالى قالانىڭ مادەني ومىرىندە ەرەكشە قۇبىلىس بولعانىن, بۇل شارانىڭ رۋمىنيا بىرلىگىنىڭ جۇزجىلدىق مەرەيتويى قارساڭىندا ءوتىپ جاتقانىن ايتتى.
قازاق كينوسىنىڭ فەستيۆالى رۋمىنيانىڭ تاعى دا ءبىر ءىرى قالاسى – كونستانتسادا دا ءوتتى. بۇل قالاداعى كورسەتىلىمدە رۋمىن كورەرمەندەرىنە «قازاق حاندىعى: الماس قىلىش», «ستالينگە سىيلىق», ء«بىرجان سال» جانە «جات» فيلمدەرى ۇسىنىلدى.
كونستانتسا مۋنيتسيپاليتەتىنىڭ جانە ايماقتىق اكىمشىلىك وكىلدەرى, ەكى ەلدىڭ حالقىن جاقىنداستىرۋ ماقساتىندا وسى تەكتەس مادەني ءىس-شارالاردى وتكىزۋدىڭ ماڭىزدىلىعىنا ءمان بەردى. رۋمىن مادەنيەت قايراتكەرلەرى قازاقستان مەن رۋمىنيا ارتىستەرىنىڭ قاتىسۋىمەن بىرلەسكەن قويىلىمدار ازىرلەۋ تۋرالى ۇسىنىستارىن ورتاعا سالدى.
وتاندىق فيلمدەرمەن شابىتتانعان رۋمىن كورەرمەندەرى قازاقستاندىق رەجيسسەرلەردىڭ جۇمىسىنا جوعارى باعا بەرىپ, قازاقستاندىق كينو مەكتەبىنىڭ ەرەكشەلىكتەرىن اتادى.
ەستەرىڭىزگە سالا كەتەيىك, رۋمىنيادا قازاق كينوسىنىڭ ءبىرىنشى فەستيۆالى 2017 جىلى قاراشادا ايىندا وتكىزىلىپ, ول قازاقستان مەن رۋمىنيا اراسىنداعى ديپلوماتيالىق قاتىناستىڭ 25 جىلدىعىنا ورايلاستىرىلعان بولاتىن.
ايگۇل احانبايقىزى,
الماتى
