ايتۋلى شاراعا قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت, رەجيسسەر ەرسايىن تاپەنوۆ جانە ەركىن جۋاسبەك, باقىت نۇرپەيىس, مەرۋەرت جاقسىلىقوۆا, انار ەركەباي باستاعان بەلگىلى تەاتر سىنشىلارى قاتىستى.
– رۇستەم جاڭاشىل, جاڭالىقشىل بولاتىن. ارماندارى كوپ ەدى. قازاق تەاترىن قايتسەم بيىك دەڭگەيگە كوتەرەمىن دەپ ءجۇرىپ ءتىپتى ءوزىن ۇمىتىپ ەڭبەك ەتتى. رۇستەم ءۇشىن ءبىرىنشى ورىندا ۇنەمى ونەر تۇراتىن. وسكەمەنگە كەلىپ تىڭنان تۇرەن سالىپ, توسىن, تىڭ ەكسپەريمەنتتەرگە باردى. ونەر الەمىندە ءوز سۇرلەۋىن سالۋعا ۇمتىلدى. سول ءۇشىن دە ءالى ەشكىم باسپاعان, ەشكىم تاجىريبەسىندە قولدانباعان توسىن شەشىمدەرگە باردى. كورەرمەنىن ونەردىڭ ءوز تىلىمەن تاڭعالدىرۋعا جانىن بەردى, – دەدى قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت فەستيۆالدىڭ اشىلۋ سالتاناتىنا سويلەگەن سوزىندە.
راس, جاسىنداي جارق ەتىپ, نەبارى 31 جاسىندا قۇيرىقتى جۇلدىزداي اعىپ تۇسكەن تالانت عۇمىرى سان قىرلىلىعىمەن, جاڭالىقشىلدىعىمەن دارالاندى. ونىڭ ايقىن دالەلى – رۇستەم ەسداۋلەتوۆ تەاتر رەجيسسەرى عانا ەمەس, سونداي-اق اقىن, اكتەر, كينورەجيسسەر رەتىندە دە كوپشىلىككە جاقسى تانىس. ء«بورىناما» جىر جيناعىنىڭ اۆتورى. ولەڭدەرى ء«ححى عاسىر انتولوگياسىنا» جانە باسقا دا ۇجىمدىق جيناقتارعا ەندى. «لاۆە», «وبراتنايا ستورونا» فيلمدەرىنە ءتۇسىپ, ءوزى دە كينو ءتۇسىردى. ورالحان بوكەيدىڭ «بەس تيىن» اڭگىمەسىنىڭ جەلىسى بويىنشا تۇسىرگەن كومەدياسى 2007 جىلى «شاكەن جۇلدىزدارى» كينوفەستيۆالىندە ارنايى ماراپاتقا يە بولدى. ال تەاتر رەجيسسەرى رەتىندە رۇستەمنىڭ قولتاڭباسىنا تيەسىلى «اتىمدى ادام قويعان سوڭ», «تولعاق» سىندى سپەكتاكلدەرى دە تالاي فەستيۆالدە توپ جارىپ, تەاتر الەمىنىڭ جاڭالىعىنا اينالعان بولاتىن.
فەستيۆالدىڭ اشىلۋ سالتاناتىندا ونەر يەسىنىڭ ءومىرى مەن شىعارماشىلىعىن جان-جاقتى زەردەلەگەن ء«بورىناما» دەرەكتى ءفيلمىنىڭ تۇساۋكەسەرى ءوتىپ, تالانت عۇمىرىنان سىر قوزعايتىن ەستەلىكتەر ايتىلىپ, رەجيسسەردىڭ سپەكتاكلدەرىنەن ۇزىندىلەر كورسەتىلدى.
ەكى جىلدا ءبىر رەت وتكىزىلەتىن ايتۋلى فەستيۆالگە بيىل وسكەمەننىڭ ءوز تەاترلارىنان بولەك, استانا, الماتى, قاراعاندى, پەتروپاۆل, پاۆلودار, سەمەي قالالارى مەن تۇركىستان وبلىسىنىڭ جەتىساي قالاسىنان بارلىعى
9 تەاتر قاتىسىپ, باق سىنايدى.
نازەركە جۇماباي,
«ەگەمەن قازاقستان»
