ول 27 جاسىندا سوعىسقا اتتانعان. 1943 جىلى سۇراپىل شايقاستاردىڭ بىرىندە كورسەتكەن ەرلىگى ءۇشىن مەملەكەتتىك ماراپاتقا ۇسىنىلعان. الايدا, اۋىر جاراقات الىپ, 3 اي گوسپيتالدا جاتقاندىقتان ناگرادا تاپسىرىلماي قالسا كەرەك. قاراپايىم ەڭبەك ادامى 1986 جىلى دۇنيەدەن وتكەنشە ەشكىمگە ناگرادا جايلى ءتىس جارماعان.
«ەكى اعام سوعىسقا دەيىن دۇنيەگە كەلسە, مەن 1948 جىلى تۋىپپىن. اكەمىز سوعىستا تانكيست, بەيبىت ومىردە جۇرگىزۋشى بولدى. اسكەري ءتارتىپتىڭ ادامى ەدى. ءبىزدى شىمىرلىققا ۇيرەتتى. ەرتە تۇرعىزىپ, وتباسىمىزبەن جاتتىعۋ جاسايتىنبىز. بىردە نەمەرەلەرى ينتەرنەتتى قاراپ وتىرعاندا «قىزىل جۇلدىز» وردەنىمەن ماراپاتتالعانىن كەزدەيسوق بىلگەن. ىزدەستىرە كەلىپ اقپاراتتىڭ راس ەكەنىنە كوز جەتكىزدىك», دەيدى قىزى رايسا ۋفەلمان.
مەملەكەتتىك ناگرادانى مارقۇمنىڭ ۇرپاقتارىنا قازاقستانداعى رەسەي فەدەراتسياسى ەلشىلىگىنىڭ اتتاشەسى سوفيا گالچينا سالتاناتتى جاعدايدا تابىس ەتتى. ونىڭ ايتۋىنشا, يەلەرىن تاپپاي جۇرگەن ماراپاتتار ءالى كوپ كورىنەدى. كەي جاعدايدا قۇجاتتار جوعالىپ كەتەدى. حابار-وشارسىز كەتكەن مايدانگەرلەردىڭ اتى-ءجونىن انىقتاۋ دا وڭاي كورىنبەيدى.
نيكولاي ءميحايلوۆيچتىڭ تەگى قاتە جازىلىپتى. ماراپات پاراقشاسىندا نيكولاي فوندوۆوي دەپ كورسەتىلگەندىكتەن, ۋاقىتىلى جەتپەي قالسا كەرەك. دەسەك تە, «يگىلىكتىڭ ەرتە-كەشى جوق» دەمەكشى, ارادا 75 جىلدان كەيىن ناگرادا يەلەرىن تاپتى.
ءومىر ەسقالي,
«ەگەمەن قازاقستان»
سولتۇستىك قازاقستانت وبلىسى
