شاھاردا ەلەكتروندى قالدىقتارعا ارنالعان ەكوبوكستار اعىمداعى جىلدىڭ قىركۇيەك ايىنان بەرى قويىلا باستاعان. ەكوبوكستارعا جارامسىز ۇيالى تەلەفوندارمەن زاريادتاۋ قۇرىلعىلارىنان بولەك, ەسكى ماگنيتافون, تەلەديدار, ەلەكترلىك ويىنشىقتار مەن ىستەن شىققان ۇتىك, پلانشەت ءتارىزدى زاتتاردى تاستاۋعا بولادى.
«كونتەينەرلەر تولعان سوڭ ونىڭ ىشىندەگى قوقىستىڭ سالماعى ولشەنىپ, ارى قاراي وڭدەۋ بازاسىنا جونەلتىلەدى. الدىمەن ەلەكتروندى قالدىقتىڭ پلاستماسساسى مەن مەتالى قولمەن اجىراتىلادى. ارتىنان بۇل زاتتار بولەك جينالىپ مايدالانادى. ءارى قاراي قالدىقتار قايتا وڭدەۋگە كەتەدى. كەيبىرەۋلەر مۇنداي قالدىقتار ءبارىبىر قوقىس پوليگونىنا كەتەدى, وڭدەۋدىڭ نە قاجەتى بار دەپ جاتادى. الايدا, سول زياندى زاتتاردىڭ ءبارى جەرگە ءسىڭىپ كەتەتىنىن ەسكەرۋىمىز كەرەك. توپىراق ارقىلى سۋعا دا تارالادى. تيتتەي باتارەيانىڭ ءبىر داناسىن قاتە پايدالانعان جاعدايدا, 20 تەكشە مەتر توپىراق نەمەسە 400 ليتر اۋىز سۋ ۋلانادى» دەيدى ەكولوگ ماماندار.
بۇگىنگى تاڭدا مەگاپوليستە ەلەكتروندى قالدىقتارعا ارنالعان وتىزدان استام كونتەينەر بار. ونىڭ 29-ى قالا مەكتەپتەرىنە قويىلعان. جاۋاپتى مامانداردىڭ سوزىنشە, قىس ايلارىنا دەيىن تاعى 50 مەكتەپكە وسىنداي ەكوبوكستار ورناتىلاتىن بولادى.
ارمان وكتيابر,
«ەگەمەن قازاقستان»
الماتى
