جاقىندا «Hertfordshire Press» بريتاندىق باسپا ءۇيى ساۋلە دوسجاننىڭ «The tragedy of a bastard» جانە «My own strange heart» اتتى ۇزدىك نوۆەللالارى ەنگەن پروزا جيناعىنىڭ اعىلشىن تىلىندەگى نۇسقاسىن حالىقارالىق «بۋكەر» ادەبي سىيلىعىنا ۇسىندى. جازۋشىنىڭ شىعارمالار جيناعىن اعىلشىن تىلىنە ەلدەن سارىباي ءتارجىمالادى. بۇل اسا بەدەلدى ادەبي سىيلىقتىڭ شورت-پاراعىنا ىلىنگەن جەتى ۇمىتكەردىڭ ارقايسىسى 1000 فۋنت-ستەرلينگ كولەمىندە سىياقى الادى. حالىقارالىق بۋكەر سىيلىعىنىڭ شورت-پاراعىنا ىلىنگەن قالامگەرلەردىڭ ءتىزىمى ءالى جاريا بولعان جوق. بىراق الەم وقىرماندارى بەدەلدى سىيلىقتىڭ فيناليستەرى كىمدەر بولۋى مۇمكىن دەپ, ءوز جورامالدارىن دا ۇسىنىپ ۇلگەرگەن.
ايتا كەتەيىك, جەڭىمپاز كىتاپقا 50 مىڭ فۋنت-ستەرلينگ كولەمىندە سىياقى بەرىلىپ, بۇل سوما اۆتور مەن اۋدارماشىعا تەڭ بولىنەدى.
جازۋشىنىڭ بۇرىن ەشقايدا جارىق كورمەگەن «The tragedy of a bastard» («كوردەمشەنىڭ قاسىرەتى») حيكاياتى بريتاندىق رەتسەنزەنتتەر تاراپىنان جاقسى پىكىرگە يە بولعان. تانىمال ادەبي سىنشى كەرولاين ۋولتون «Our dear ancestors said honour is more valuable than life» ء(«بىزدىڭ قاسيەتتى بابالارىمىز ومىردەن دە قىمبات – ار ەكەنىن ايتىپ وتكەن») رەتسەنزياسىندا «كوردەمشەنىڭ قاسىرەتى» حيكاياتىنىڭ يدەياسى تەرەڭ ەكەنىن اتاپ وتەدى. حيكايات جەتى اتادان قان ارالاستىرماۋ سالتىن ۇستانىپ كەلگەن تەكتى حالىق ۇرپاقتارىنىڭ ۇساقتالىپ, ازىپ بارا جاتقانى تۋرالى ۇلت تاعدىرىنا قاتىستى ۇلكەن پروبلەمانى كوتەرەدى.
ءمولدىر قىز بەن نۇرجان اتتى نەكەسىز تۋعان جاس جىگىتتىڭ ماحابباتى سىنالار الاڭدا – سالت-ءداستۇر, وتباسى قۇندىلىقتارىنا بايلانىستى كۇرمەۋى قيىن ماسەلەلەر, باسى اشىق داۋ مەن ۇزاققا سوزىلىپ, شىعارما اياقتالعاندا دا سوڭعى نۇكتەسى قويىلماعان تارتىسقا تولى ەكى وتباسىنىڭ ءوز ءىشى, وشاق باسى.
حيكاياتتاعى پروبلەما – «كوردەمشە بالا» – نۇرجاننىڭ اناسى ءمارزيانىڭ «وتىزدى ورتالاعانشا وڭ جاقتا وتىرىپ قالۋىنان» تۋىندايدى.
«كوردەمشەنىڭ قاسىرەتىنەن» باسقا ساۋلە دوسجان شەتەلدىك وقىرمانعا ءوزىنىڭ ەرەكشە تۋىندىسى «My own strange heart» («وگەي جۇرەك») شىعارماسىن دا ۇسىنعان. بۇل – قازاقستاندا العاش رەت جۇرەك الماستىرۋ وتاسىن جاساعان حيرۋرگ دارىگەر – يۋري پيا مەن اۋرۋ جانىبەك وسپانوۆتىڭ باسىنان وتكەن وقيعاعا قۇرىلعان دۇنيە. بۇل شىعارما قازاقستان مەديتسيناسىنىڭ جەتكەن جەتىستىگىن ءسوز ەتەدى. وقيعا وتە تارتىستى وربيتىندىكتەن وقىرماندى بىردەن باۋراپ الادى.
ساۋلە دوسجان ەسىمى كوزى قاراقتى وقىرمانعا جاقسى تانىس, ول – بىرنەشە كىتاپتىڭ اۆتورى, بەلگىلى اقىن, جازۋشى. حالىقارالىق ايەل جازۋشىلار گيلدياسىنىڭ (International Women Writing Guild) جانە ەۋرازيا شىعارماشىلىق گيلدياسىنىڭ (ECG) مۇشەسى.
ساۋلە دوسجان شۆەتسيانىڭ ستوكگولم قالاسىندا وتكەن «Open Eurasian Literature Festival and Book Forum-2017» بايقاۋىندا جۇلدەلى ءىىى ورىندى يەلەنگەن.
انار قابىلقاق,
ادەبيەتتانۋشى
