جولدىڭ اشىلۋ سالتاناتىنا جاقىن ماڭداعى اۋىل تۇرعىندارى, جەرگىلىكتى جانە ايماقتىق اكىمدىك وكىلدەرى, سونداي-اق العاشقى سيمۆوليكالىق اۆتوكولوننانى قارسى العان «قازاۆتوجول» وپەراتور-كومپانياسى قاتىستى. جاھاندىق اۋقىمداعى بۇل جوبانىڭ ەكىنشى لوتىن تاپسىرۋ ەلدىڭ اسا ماڭىزدى ەكونوميكالىق ماڭىزى بار «باتىس ەۋروپا ‒ باتىس قىتاي» حالىقارالىق كولىك ءدالىزىنىڭ تاعى ءبىر دايىن ۋچاسكەسىن العانىن بىلدىرەدى.
«اسۋمەن كەلە جاتقان ەسكى جول ەكىنشى كاتەگورياعا جاتادى, دەيدى «كازاحدورستروي» ديۆيزيونىنىڭ ديرەكتورى زاعاپار دوششانوۆ. – بۇل اسۋدا ول كولىكتىڭ ءوسىپ كەلە جاتقان اعىنى ءۇشىن قاۋىپسىز ەمەس, سونىمەن قاتار اسىرەسە قىسقى ۋاقىتتا بۇل جەردە ۇنەمى كەپتەلەك ورىن الادى».
I ب ساناتتاعى جاڭا جول ەندى اسۋلاردى اينالىپ ءوتىپ, كولىك جۇرگىزۋشىلەرگە ۋاقىتتى ۇنەمدەپ قانا قويماي, وزدەرىن قاۋىپسىز جانە جايلى سەزىنۋگە مۇمكىندىك بەرەدى. ونىڭ باسىم بولىگى بەتوندى, بىراق تىك بەتكەيلەرى مەن بۇرىلىستارى اسفالتتالعان. بۇل, اسىرەسە قىسقى ۋاقىتتا كولىك دوڭگەلەگىنىڭ جولمەن بىركەلكى جاناسا قوزعالۋىنا مۇكىندىك بەرەدى.
ۇزىندىعى 40 شاقىرىمدىق ەكى جولاقتى جولدىڭ اياقتالعان ۋچاسكەسى تولىق جيىنتىقتا تاپسىرىلدى: ءبولۋ جولاعى, اۆتوكولىك تۇراعىنا ارنالعان الاڭدار, ەلەكتر بەرۋ جەلىلەرى, اۆتوبۋس ايالداماسى, جولايرىقتار, جول-پاترۋلدىك بەكەتى بار. جولدىڭ ەنى – 7,5 مەتر. قوزعالىستىڭ ەسەپتىك جىلدامدىعى – 100-120 كم/ساع.
كليماتتىڭ قاتتى ىستىق ءارى ۇزدىكسىز جەل سوعىپ تۇراتىنى ەسكەرىلگەندىكتەن, جۇمىستار وتكەن جىلدان باستاپ جۇرگىزىلدى. تابيعات بىرنەشە رەت جۇمىسقا كەدەرگى كەلتىرگەنىمەن, ىزدەنگىش قۇرىلىسشىلار تىعىرىقتان شىعار جول تاۋىپ, وبەكتىنى ۋاقىتىندا پايدالانۋعا بەردى.
«بەتوننىڭ وزىنە ءتان ەرەكشەلىكتەرى بار, ‒ دەپ اتاپ ءوتتى جوبا جەتەكشىسى شاتبەك بايسىنوۆ, ‒ ەگەر ونى +25 گرادۋستان جوعارى تەمپەراتۋرادا توسەسە, ول تىم تەز كەبەدى جانە بىركەلكى بولمايدى. جەلدىڭ دە جۇمىسقا كەدەرگى كەلتىرەتىنىن جوعارىدا ايتتىم, سوندىقتان ول سەكۋندىنا 7-10 م جىلدامدىقپەن سوققان كەزدە ءبىز جۇمىستى توقتاتىپ وتىردىق».
الايدا تاجىريبەلى كومانداعا تابيعات قيىنشىلىقتارى ەش توسقاۋىل بولا المادى. وڭتۇستىكتىڭ جىلى كليماتىن پايدالانا وتىرىپ, مۇندا جۇمىستار ەكى اۋىسىمدا جۇرگىزىلدى, بۇل قاجەتتى قارقىن مەن ناتيجەنى قامتاماسىز ەتتى.
ەستەرىڭىزگە سالا كەتەيىك, وتكەن جىلى «كازاحدورستروي» ديۆيزيونى وسى تراسسانىڭ 40 شاقىرىمدىق ءبىرىنشى لوتىن پايدالانۋعا بەرگەن بولاتىن.
حاميت ەسامان,
«ەگەمەن قازاقستان»
جامبىل وبلىسى
