قاراعاندى قۇيۋ-ماشينا جاساۋ زاۋىتى وبلىستاعى ءىرى كاسىپورىنداردىڭ ءبىرى بولىپ سانالادى. مۇندا نەگىزىنەن تاۋ-كەن جانە شاحتا قۇرىلعىلارىن جاساپ شىعارادى. سونىمەن قاتار زاۋىت «قازاقمىس» كورپوراتسياسى» جشس كاسىپورنىن قوسالقى بولشەكتەرمەن جانە ماشينا جاساۋ باعىتىنداعى جابدىقتارمەن قامتاماسىز ەتەدى.
زاۋىتتى جاڭعىرتۋ 2014 جىلى «ونىمدىلىك-2020» مەملەكەتتىك باعدارلاماسى بويىنشا قولعا الىنعان بولاتىن. سونىڭ ناتيجەسىندە كەشەندى جوسپاردى ازىرلەۋگە كەتكەن شىعىندى جابۋعا قاجەتتى 7,9 ملن تەڭگە قارجى جانە نەسيە الىندى. جابدىقتى اۋىستىرۋعا كەتكەن قاراجاتتىڭ نەگىزگى بولىگىن «برك-ليزينگ» كومپانياسى ۇسىندى. ال زاۋىتتى قايتا جاراقتاندىرۋعا ارنالعان قالعان 61,5 ملن دوللاردىڭ 15 پايىزىن «قازاقمىس» كورپوراتسياسى ءبولدى.
قۇيىلعان ينۆەستيتسيانىڭ ارقاسىندا ققمز ساندىق باعدارلامالىق باسقارۋ جۇيەسى بار, دالدىگى جوعارى زاماناۋي ونداعان ستانوك ساتىپ الىندى. چەحيا جانە كورەيا مەملەكەتتەرىنەن اكەلىنگەن بۇل ستانوكتار تاۋ-كەن جۇمىستارىندا پايدالانىلاتىن تەحنيكالار مەن جابدىقتارعا قاجەتتى 4,5 مىڭعا جۋىق بولشەكتەر شىعارۋعا مۇمكىندىك بەرەدى.
جالپى كاسىپورىننىڭ قاراپايىم قۇيما ونىمدەرىنەن باستاپ ماشينا جاساپ شىعارۋعا دەيىن جەتەتىن الەۋەتى بار. ونىڭ ونىمدەرىنىڭ قاتارىندا سكيپتەر, كراندار, جەر استى اۆتوبۋسى, ۆاگونەتكالار, فلوتاتسيالىق ماشينالار, كونۆەيەر جەلىسى جانە باسقا دا كوپتەگەن بولشەكتەردى ايتۋعا بولادى.
جوعارىدا ايتقانىمىزداي, بۇگىندە زاۋىتقا 12 ملرد تەڭگەنىڭ 287 بىرلىك نەگىزگى, قوسىمشا جانە ولشەۋىش جابدىقتارى جەتكىزىلىپ, ىسكە قوسىلعان. ەكى جىلدىڭ ىشىندە ءونىم شىعارۋ 3,1 ملرد تەڭگەدەن 6,6 ملرد تەڭگەگە دەيىن وسكەن. ال جىلدىڭ سوڭىنا دەيىن كاسىپورىن ءونىم كولەمىن 8,9 ملرد تەڭگەگە جەتكىزۋدى كوزدەپ وتىر.
ء«بىزدىڭ ماقسات, – دەيدى زاۋىت باسشىلارى, – 2019 جىلدىڭ سوڭىنا دەيىن نومەنكلاتۋرالىق ءونىم شىعارۋدى 5-5,5 مىڭ بولشەككە دەيىن ارتتىرۋ. سايكەسىنشە, ءبىز تاۋاردىڭ وزىندىك قۇنىن تومەندەتىپ, سىرتقى, ءتىپتى يمپورت نارىعىنا شىعا الاتىن باسەكەگە قابىلەتتى كاسىپورىن بولۋىمىز كەرەك. بىزگە تاپسىرىستىڭ دەنى «قازاقمىس» كورپوراتسياسىنان كەلەدى. بىراق مۇنىمەن شەكتەلىپ قالمايمىز, قازىرگى الەۋەتىمىز سىرتتان دا تاپسىرىس قابىلداۋعا جەتەدى».
زاۋىت قازىر نومەنكلاتۋرانى دامىتىپ جاتىر. بۇرىن تەحنولوگيالىق بازا شەكتەۋلى بولعاندىقتان, قولدان كەلگەن بولشەكتەردى عانا شىعارىپ كەلسە, قازىر جاعداي وزگەرگەن. بۇگىندە زاۋىت وتە كۇردەلى توراپتار مەن اگرەگاتتار شىعارا باستادى. ياعني, يمپورت الماستىرۋ پايىزى جوسپارلى تۇردە ارتىپ, شىعارىلاتىن ونىمدەر سانى كوبەيە تۇسكەن.
قازىرگى تاڭدا زاۋىتتا 700-گە جۋىق ادام جۇمىس ىستەيدى. ونىڭ ىشىندە, جوبامەن العاندا 100 شاقتى قىزمەتكەر ساندىق باعدارلامالىق باسقارۋ ۋچاسكەسىندە ەڭبەك ەتەدى. كاسىپورىندا دايار كادرلارعا دەگەن زارۋلىك بايقالعاندىقتان, قاراعاندى مەملەكەتتىك تەحنيكالىق ۋنيۆەرسيتەتىمەن بىرلەسە وتىرىپ تىرەك كافەدراسى اشىلعان. سونداي-اق قاراعاندى ماشينا جاساۋ كوللەدجىمەن دە ارىپتەستىك بايلانىس ورناتىلعان.
كاسىپورىن ءوز قىزمەتكەرلەرىنىڭ كاسىبي شەبەرلىكتەرىن جەتىلدىرۋگە ەرەكشە ءمان بەرەدى. وسى ماقساتتا رەسەيدىڭ «كليو-سوفت» اق كومپانياسىمەن بىرلەسىپ, ساندىق باعدارلامالىق باسقارۋ ستانوگىنىڭ وپەراتورى, سول ستانوكتا جۇمىس ىستەيتىن ينجەنەر-باعدارلاماشى, ينجەنەر-تەحنولوگ, ينجەنەر-قۇراستىرۋشى جانە قۇيۋ ءوندىرىسىنىڭ ينجەنەر-تەحنولوگ ماماندىقتارى ءۇشىن وقۋ باعدارلاماسى ازىرلەنگەن. بۇگىنگە دەيىن مۇندا 41 جۇمىسكەر مەن 52 ينجەنەرلىك-تەحنيكالىق مامان ءبىلىمىن جەتىلدىرىپ شىققان.
قاراعاندى قۇيۋ-ماشينا جاساۋ زاۋىتىنىڭ الدىنا قويعان ماقساتىنىڭ ءبىرى – بىرىڭعاي ينجەنەرلىك كەشەن جانە زاماناۋي يندۋستريالىق پارك قۇرۋ. مۇنىڭ ءوزى ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا بەلەسىنە شىعۋعا مۇمكىندىك بەرەتىنى ءسوزسىز.
قايرات ءابىلدا,
«ەگەمەن قازاقستان»
قاراعاندى
