جاڭا قويىلىمنىڭ كەيىپكەرلەرى – قازاقتىڭ اڭىزعا اينالعان قوس تۇلعاسى كومپوزيتور نۇرعيسا تىلەنديەۆ پەن اقىن مۇقاعالي ماقاتاەۆ. پەسا اۆتورى نارتاي ساۋدانبەك ۇلى بۇل شىعارمانى ەرەكشە تەبىرەنىسپەن جازعانىن ايتادى. سياسى كەپپەگەن, ءالى ەش ساحنادا قويىلماعان دۇنيەنى باتىس قازاقستان وبلىستىق تەاترىنىڭ باسشىسى قۋانىش اماندىقوۆ ات-تۇيەدەي قالاپ الىپتى. الاتاۋ الىپتارىنىڭ بەينەسىن اقجايىقتا تىرىلتكەن – قاليبەك قۋانىشباەۆ اتىنداعى استانا مەملەكەتتىك اكادەميالىق قازاق مۋزىكالىق دراما تەاترىنىڭ رەجيسسەرى, قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ.
شىعارماعا اقىن ءومىرىنىڭ سوڭعى كۇندەرى, قالامگەر مەن سازگەردىڭ شىعارماشىلىق تاندەمى, «قۇستار قايتىپ بارادى», «سارجايلاۋ», «ەسىڭە مەنى العايسىڭ...» اندەرىنىڭ شىعۋ تاريحى وزەك بولعان. باستى رولدەردى ورال تەاترىنىڭ تانىمال تارلاندارى – قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى سەردەش قاجىمۇراتوۆ (نۇرعيسا) پەن قازاقستاننىڭ ەڭبەك سىڭىرگەن قايراتكەرى ەربول ەسەندوسوۆ سومدادى. درامادا سازگەردىڭ جارى داريعانى سومداعان اقمارال اماندىقوۆا مەن مۇقاعالي جىرىن جاتقا سوعاتىن «ايىقتىرعىش قىزمەتكەرى» سالاۋات تۇمەنوۆتىڭ ويىنى دا ەرەكشە قانىق, نانىمدى شىققان. قويىلىمنىڭ مۋزىكالىق كەڭەسشىسى – «قۇرمەت» وردەنىنىڭ يەگەرى, مادەنيەت سالاسىنىڭ ۇزدىگى ەركىن نۇرىمبەتوۆ پەن حورمەيستەر ناتاليا سانباەۆا بولسا, ساحنانى ساندەگەن – قويۋشى سۋرەتشى مۇرات مامبەتوۆ. ساحنادا ونەر كورسەتكەن حور كاپەللاسىنىڭ ونەرى ولمەس جىر مەن وشپەس ساز تۋرالى شىعارمانىڭ شىرايىن كىرگىزدى.
– قازاقتىڭ ماڭدايىنا بىتكەن ۇلى تۇلعالاردىڭ ءومىرى, تاعدىرى كوز الدىمىزعا كەلگەندەي بولدى. وسى كورىنىستى اسەرلى جەتكىزگەن اكتەرلەردىڭ شەبەرلىگىنە ريزامىز. سونداي-اق قويىلىمدى ساحنالاعان رەجيسسەر, ءوزىمىزدىڭ جەرلەسىمىز نۇرلان جۇمانيازوۆقا, اۆتور نارتاي ساۋدانبەك ۇلىنا اقجايىق كورەرمەندەرى اتىنان ريزاشىلىعىمىزدى ءبىلدىرىپ, قازاق سالتىمەن شاپان جابامىز, – دەدى پرەمەرا سوڭىنان ساحناعا كوتەرىلگەن باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆ. بۇل قۇرمەت وسى پرەمەرانى تاماشالاۋعا ارنايى كەلگەن تانىمال اكتەر قۋاندىق قىستىقباەۆقا دا كورسەتىلدى.
ايتا كەتەيىك, ورال تەاترىندا قازاقستاندىق, ءتىپتى شەتەلدىك رەجيسسەرلەر ارنايى شاقىرىلىپ, قويىلىم قويۋى – كوپ جىلدان بەرى قالىپتاسقان ءداستۇر. ماسەلەن, بۇگىنگى پرەمەرانىڭ رەجيسسەرى نۇرلان جۇمانيازوۆتىڭ ءوزى بۇعان دەيىن وسى ساحنادا امەريكالىق دراماتۋرگ ۆينا دەلماردىڭ «بايانسىز باق» دراماسى مەن شىڭعىس ايتماتوۆتىڭ «اق كەمەسىن» ساحنالاعان. «مۇنداي ارىپتەستىك تەاتر ۇجىمىنىڭ شىعارماشىلىق الەۋەتىنىڭ وسۋىنە, ءوزارا تاجىريبە الماسۋىنا وڭ اسەر ەتەدى», دەيدى تەاتر باسشىسى قۋانىش اماندىقوۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
