ەگىس ناۋقانىنىڭ قارساڭىندا كۇرىش وسىرۋمەن اينالىساتىن شارۋاشىلىقتار ءۇشىن كاسىپكەرلەر پالاتاسى «تىڭايتقىشتاردى ءتيىمدى پايدالانۋ جانە كۇرىش ونىمدىلىگىن ارتتىرۋ» تاقىرىبىندا سەمينارلار وتكىزگەن بولاتىن.
- سول شاراعا كۇرىش وسىرۋدەگى جاڭالىقتار بويىنشا اگروونەركاسىپتىك كەشەن سالاسىنىڭ عالىمدارى, كۇرىش زەرتتەۋ ينستيتۋتىنىڭ قىزمەتكەرلەرى, وبلىسقا بەلگىلى زەينەتكەر-اگرونومدار جانە باسقا وبلىستاردان كەلگەن مينەرالدى تىڭايتقىشتاردى شىعاراتىن كومپانيا وكىلدەرى قاتىسىپ, سالاداعى ماسەلەلەر تالقىلاندى. شارۋالاردىڭ ۇسىنىس-پىكىرلەرى تىڭدالدى. سەمينار جۇمىسىنىڭ قورىتىندىسى رەتىندە كۇرىش القاپتارىنان جوعارى ءونىم الۋ ءۇشىن «تەگىن كەڭەس بەرۋ قىزمەتىن» باستاۋ تۋرالى شەشىمگە كەلدىك. ويتكەنى, كىشى شارۋاشىلىقتاردا تاجىريبەلى اگرونومدارى جانە تەحنيكاعا قىزمەت كورسەتەتىن ينجەنەر سەكىلدى ماماندار جوق, - دەيدى پالاتانىڭ اگروونەركاسىپ كەشەنى ءبولىمىنىڭ باستىعى جاسۇلان سەرىكوۆ.
«تەگىن كەڭەس بەرۋ» قىزمەتى پيلوتتىق رەجيمدە وبلىسقا قاراستى سىرداريا اۋدانىندا قولعا الىندى. پيلوتتىق جوبا كوپ كۇتتىرمەي-اق ءوز ناتيجەسىن بەردى. كۇزگى جيىن-تەرىندە سىرداريا اۋدانىنىڭ شاعىن شارۋاشىلىقتارى ءونىمدى ادەتتەگىدەن 10-15 تسەنتنەرگە ارتىق جينادى. بيىل وبلىس بويىنشا كۇرىشتىڭ ورتاشا ونىمدىلىگى گەكتارىنا 50-55 تسەنتنەر بولسا, جوباعا بەلسەندى قاتىسقان شارۋاشىلىقتار كۇرىشتى 67 تسەنتنەرگە دەيىن جينادى.
بۇگىندە كاسىپكەرلەر پالاتاسى «تەگىن كەڭەس بەرۋ» قىزمەتىن وبلىستىڭ وزگە اۋداندارىندا دا ەنگىزۋدى جوسپارلاپ وتىر.
باقتيار تايجان,
«ەگەمەن قازاقستان»
قىزىلوردا وبلىسى
