جوعارى ءونىمدى سورتتاردى پايدالانۋ ەسەبىنەن سوڭعى 5 جىلدا كۇرىش جارماسىنىڭ ءوندىرىسى 39 پايىزعا ارتىپ وتىر. ال, وسى جىلدارى كۇرىشتىڭ جالپى ءتۇسىمى 2 ەسەگە ارتتى.
جالاعاش اۋدانىندا ەلەۆاتور بازاسىنداعى «بايقوڭىر» اگروحولدينگىن قۇرۋ ايماقتا كۇرىش كلاستەرىن دامىتۋعا ىقپال ەتتى. ى.جاقاەۆ اتىنداعى كۇرىش ءوندىرۋ عىلىمي-زەرتتەۋ ينستيتۋتى بۇكىلرەسەيلىك كۇرىش ينستيتۋتىمەن بىرلەسىپ قىزىلوردا وبلىسى ءۇشىن ارنايى سورتتاردى شىعارىپ جاتىر.
بىلتىر وبلىستاعى كۇرىش شارۋاشىلىقتارىندا يراندا سۇرانىسقا يە «تورەم حوشەمي» سورتى وسىرىلە باستاعان. وسىعان وراي, قارماقشىلىق «اقتوبە جانە ك» جشس وسى سورتتى 70 گەكتار جەرگە ەكتى, ال قازالىنىڭ «سىر مارجانى» شارۋاشىلىعى سىناقتان وتكىزۋ ءۇشىن 1 گەكتار اۋماققا ەككەن ەدى.
2020 جىلعا قاراي وبلىستا يران كۇرىشىنىڭ ەگىستىك القابى 5 مىڭ گەكتارعا دەيىن ۇلعايتىلادى. سونىمەن قاتار, وڭدەلگەن كۇرىش ەكسپورتىنىڭ كولەمىن 8 مىڭ تونناعا دەيىن جەتكىزۋ جوسپارلانۋدا.
وسىلايشا, سىر ءوڭىرىنىڭ كۇرىشى تۇركمەنستان, تاجىكستان, قىرعىزستان, رەسەي, بەلارۋس, ارمەنيا, ءازىربايجان, موڭعوليا, اۋعانستان جانە تاعى باسقا ەلدەرگە ەكسپورتتالاتىن بولادى.
باقتيار تايجان,
«ەگەمەن قازاقستان»
قىزىلوردا وبلىسى
