كەزدەسۋ بارىسىندا ەكى ەلدىڭ اقپاراتتىق تەحنولوگيالار سالاسىنداعى ىنتىماقتاستىعىن ودان ءارى نىعايتۋ جانە كەڭەيتۋ, سونداي-اق, ەكونوميكانىڭ ماڭىزدى سەكتورلارىن تسيفرلاندىرۋ ماسەلەلەرى تالقىلاندى. ولاردىڭ اراسىندا ءبىلىم بەرۋ, دەنساۋلىق ساقتاۋ, ساۋدا, كولىك جانە لوگيستيكا سالالارى بار. «جاسىل كوپىر» پرەزيدەنتتىك باستاماسى اياسىندا جۇزەگە اسىرىلعان جاسىل تەحنولوگيالار ورتالىعىنىڭ بازاسىندا جانە جالپى قالدىقتاردى كادەگە جاراتۋ سالاسىنداعى ىنتىماقتاستىق ماسەلەلەرى قارالدى.
اۋىل شارۋاشىلىعى, كەدەندىك دەكلاراتسيالاۋدى اۆتوماتتاندىرۋ, سونداي-اق تسيفرلىق ەكونوميكا ءۇشىن بىلىكتى كادرلاردى دايارلاۋدا تاجىريبەمەن الماسۋ سالاسىنداعى ءوزارا ءىس-قيمىل پەرسپەكتيۆالارىنا ەرەكشە نازار اۋدارىلدى.
ب. ساعىنتاەۆ قازاقستاندىق تاراپتىڭ تسيفرلاندىرۋ سالاسىندا, اسىرەسە, استانادا «ەكسپو» اۋماعىندا حالىقارالىق اT-ۋنيۆەرسيتەتتى اشۋ جوسپارلارىن ەسكەرە وتىرىپ, ات ماماندارىن دايارلاۋ بويىنشا تاجىريبە الماسۋعا ۇلكەن قىزىعۋشىلىق تانىتاتىنىن جەتكىزدى.
ءوز كەزەگىندە يۋ. راتاس فورۋمعا شاقىرعانى ءۇشىن العىسىن ءبىلدىردى, سونىمەن قاتار ەكىجاقتى قارىم-قاتىناستاردىڭ جوعارى الەۋەتىن جانە ەستونيانىڭ ودان ءارى ىنتىماقتاسۋعا دەگەن ىقىلاسىن اتاپ ءوتتى.
2018 جىلدىڭ قاڭتار–تامىز ايلارىندا قازاقستان مەن ەستونيا اراسىنداعى تاۋار اينالىمى $21,7 ملن (ەكسپورت – $4,7 ملن, يمپورت – $17 ملن) قۇرادى. 2005 جىلدان باستاپ 2018 جىلدىڭ ءىى توقسانىنا دەيىن ەستونيا رەسپۋبليكاسىنان قازاقستانعا تىكەلەي ينۆەستيتسيالاردىڭ جالپى اعىنى $70,2 ملن قۇرادى. قر-دا ەستونيالىق كاپيتالى بار 70 استام بىرلەسكەن كاسىپورىن تىركەلگەن.
تۇراقتى ەكونوميكالىق وسىمگە قول جەتكىزۋ, ەكونوميكا مەن ۇلتتىڭ باسەكەگە قابىلەتتىلىگىن ارتتىرۋ, حالىقتىڭ ءومىر ساپاسىن جاقسارتۋ ءۇشىن تسيفرلىق ەكوجۇيەنى دامىتۋ ماقساتىندا «تسيفرلىق قازاقستان» باعدارلاماسى قابىلداندى, ول باستى ءتورت باعىتتى قامتيدى.
«تسيفرلىق جىبەك جولىن ىسكە اسىرۋ» — سەنىمدى, قولجەتىمدى, جىلدامدىعى جوعارى جانە قورعالعان تسيفرلىق ينفراقۇرىلىمدى دامىتۋ.
كرەاتيۆتى قوعامدى دامىتۋ — تسيفرلىق ەكونوميكا ءۇشىن قۇزىرەتتىلىكتەر مەن داعدىلاردى ۇيرەنۋ, حالىقتىڭ تسيفرلىق ساۋاتتىلىعىن ارتتىرۋ, سالالار ءۇشىن اكت ماماندارىن دايىنداۋ.
ەكونوميكا سالالارىنداعى تسيفرلىق تۇرلەنۋ — ەكونوميكانىڭ ءتۇرلى سالالارىنىڭ باسەكەگە قابىلەتتىلىگىن ارتتىرۋ ءۇشىن تسيفرلىق تەحنولوگيالاردى جاپپاي ەنگىزۋ.
پرواكتيۆتى مەملەكەتكە كوشۋ — ەلەكتروندى جانە ءموبيلدى ۇكىمەت جۇيەسىن جەتىلدىرۋ, مەملەكەتتىك قىزمەت كورسەتۋ سالاسىن وڭتايلاندىرۋ.
