جەڭىل اتلەتيكا • 05 قاراشا، 2018

جەكە رەكورد جەتىستىك ەمەس

369 رەتكورسەتىلدى

الەم سپورتىندا «سپورت پاديشاسى» اتانىپ كەتكەن جەڭىل اتلەتيكانىڭ الار ورنى ەرەكشە. ويتكەنى جەلمەنەن جارىسقا تۇسكەن سپورتشىلاردىڭ ونەرى كىم-كىمدى بولسىن تاڭداندىرماي، تامساندىرماي قويمايتىنى انىق. 

قازىرگى تاڭدا جەڭىل اتلەتيكادان اقش، يامايكا جانە كەنيا سپورتشىلارىنىڭ اتى اسپانداپ تۇر. دەگەنمەن سپورتتىڭ بۇل تۇرىنەن قازاق سپورتشىلارى دا قارا جاياۋ ەمەس. كسرو داۋىرىندە بىرقاتار جەرلەسىمىز وليمپيا ويىندارىندا جەڭىستىڭ بيىك تۇعىرىنا كوتەرىلگەنىن كوزىقاراقتى جانكۇيەر ۇمىتا قويماعان بولار. مىسالى 1952 جىلى حەلسينكيدە جانە 1956 جىلى مەلبۋرندا وتكەن ءدۇبىرلى دودادا جەرلەسىمىز ۆلاديمير سۋحارەۆ 4ح100 مەترلىك ەستافەتالىق سايىستا كۇمىس مەدال ەنشىلەدى. 

ال 1960 جىلى عۇسمان قوسانوۆ ريم وليمپياداسىندا قازاق سپورتشى­لارىنىڭ اراسىندا تۇڭعىش جۇلدەگەر اتانىپ، كۇمىس مەدالعا يە بولدى. عۇسمان قوسانوۆتى ايتقان كەزدە ءامين تۇياقوۆ اعامىزدى ۇمىت قال­دىرۋ مۇمكىن ەمەس. ەكەۋى قازاق جەڭىل اتلەتتەرى اراسىندا العاش كسرو-نىڭ ەڭبەك سىڭىرگەن سپورت شەبە­رى ءنورماتيۆىن ورىنداپ شىقتى. تاۋەل­سىزدىك جىلدارى قازاق جەڭىل اتلەتيكا­سىنىڭ كوشىن العا سۇيرەگەن سپورتشى­لاردىڭ قاتارىندا ولگا شيشيگينا مەن ولگا رىپاكوۆانى ايتۋعا بولادى. قوس ولگا وليمپيادانىڭ ەڭ بيىك تۇعىرىنا كوتەرىلىپ، كوك باي­راعىمىزدى كوكتە جەلبىرەتتى.

قازىرگى تاڭدا وليمپيا ويىندارى مەن الەم چەمپيوناتتارىندا ەڭ كوپ مەدال ءدال وسى سپورت تۇرىنەن ساراپقا سالىنادى. اتاپ ايتساق، وليمپيادا مەن الەم چەمپيوناتىندا جەڭىل اتلەتيكا سپورتىنان 47 مەدال ۇلەستىرىلەدى. تەك 2017 جىل وتكەن الەم بىرىنشىلىگىندە 48 مەدال ساراپقا سالىنسا، كەلەسى جىلى دوحادا وتەتىن بايراقتى باسەكەدە مەدال سانى تاعى بىرەۋگە ارتپاق. 

ءسوز باسىندا بۇل سپورت تۇرىنەن اقش، يامايكا، كەنيانىڭ اتى وزىپ تۇر دەدىك قوي. ءسوزىمىز جالاڭ بولماس ءۇشىن سوڭعى ءۇش وليمپيادا مەن ءۇش الەم چەمپيوناتىنداعى ناتيجەلەرىنە توقتالساق تا جەتكىلىكتى شىعار. 

بەيجىڭ وليمپياداسى (2008 جىل) – 1. اقش – 23 مەدال (7+9+7)، رە­سەي – 18 (6+5+7)، 3. كەنيا – 14 (6+4+4).

لوندون وليمپياداسى (2012 جىل) – 1. اقش – 28 مەدال (9+12+7)، 2. رە­سەي – 14 (6+3+5)، 3. يامايكا – 12 (4+4+4).

ريو وليمپياداسى (2016 جىل) – اقش – 32 مەدال (13+10+9)، 2. كەنيا – 13 (6+6+1)، 3. يامايكا – 11 (6+3+2).

الەم چەمپيوناتى (رەسەي، 2013 جىل) – اقش – 25 مەدال (7+13+5)، 2. رەسەي – 12 (6+2+4)، 3. يامايكا – 10 (6+2+2).

الەم چەمپيوناتى (قىتاي، 2015 جىل) – كەنيا – 16 مەدال (7+6+3)، 2. يامايكا – 12 (7+2+3)، 3. اقش – 18 (6+6+6).

الەم چەمپيوناتى (انگليا، 2017 جىل) – اقش – 30 مەدال (10+11+9)، 2. كەنيا – 11 (5+2+4)، 3. وار – 6 (3+1+2).

ەندى قازاقستاندىق جەڭىلات­لەت­تەردىڭ الەمدىك ارەناداعى جۇلدەلەر سانىن ەسەپتەپ كورسەك.

بەيجىڭ وليمپياداسى (2008 جىل) – 1 كۇمىس.

لوندون وليمپياداسى (2012 جىل) – 1 التىن.

ريو وليمپياداسى (2016 جىل) – 1 قولا.

الەم چەمپيوناتى (رەسەي، 2013 جىل) – 0 مەدال.

الەم چەمپيوناتى (قىتاي، 2015 جىل) – 1 قولا.

الەم چەمپيوناتى (انگليا، 2017 جىل) – 1 قولا. 

قازاقستاندىق جەڭىلاتلەتتەر اراسىندا ەرلەرگە قاراعاندا قىزداردىڭ ناتيجەسى كوڭىل قۋانتارلىق. ويتكەنى  قىزدارىمىز بىرنەشە جىلدان بەرى ىشكى بىرىنشىلىكتە مۇرتى بۇزىلماي كەلە جاتقان رەكوردتاردى جاڭارتىپ، حالىقارالىق ارەنالاردا توپ جارىپ ءجۇر. اتاپ ايتار بولساق، ءۇش قارعىپ سەكىرۋ بويىنشا 33 جاستاعى ولگا رىپاكوۆا سوڭعى ءۇش وليمپيا ويىندارىنىڭ ءۇش مەدالىن (التىن (2012 ج)، كۇمىس (2008 ج)، قولا (2016 ج)) يەلەنسە، 2015 جانە 2017 جىلعى الەم بىرىنشىلىگىندە قولا جۇلدەگە قول جەتكىزىپ ءجۇر. مۇنان بولەك، ازيا ويىندارىنىڭ ءتورت التىنى بار. ەل قورجىنىنا ورعىپ تا، قارعىپ تا سەكىرىپ مەدال سالىپ جۇرگەن رىپاكوۆانىڭ جەڭىل اتلەتيكاعا سىڭىرگەن ەڭبەگى وراسان. ولگا رىپاكوۆا ءۇش قارعىپ سەكىرۋ بويىنشا 2010 جىلى حورۆاتيادا وتكەن قۇرلىقتىق تۋرنيردە 15.25 مەترگە سەكىرىپ، ءوز رەكوردىن عانا ەمەس ازيا قۇرلىعىنىڭ رەكوردىن ورناتقان بولاتىن. ارادا 8 جىل وتسە دە، ازيا قۇرلىعىنان وتانداسىمىزدىڭ رەكوردىن جاڭارتاتىن سپورتشى تابىلماي تۇر. رىپاكوۆا الەم رەكوردىن ورناتقان ۋكراينالىق ينەسسا كراۆەتستەن 25 سم كەم سەكىرگەن.

سونداي-اق قازاقستاندىق جەڭىل­اتلەت قىزداردىڭ اراسىندا قىسقا قاشىق­تىققا جۇگىرەتىن ولگا سافرو­نوۆا (100 م) مەن ۆيكتوريا زيابكي­نانىڭ (200 م) ناتيجەلەرىن اۋىز تولتىرىپ ايتۋعا بولادى. بىلتىر ءۇندىستاندا وتكەن ازيا چەمپيوناتىندا سافرونوۆا 100 مەترگە جۇگىرۋ بويىنشا ءبىر كۇمىس، ءبىر قولا مەدال السا، زيابكينا 100 جانە 200 مەتر قاشىقتىقتا قۇرلىق چەمپيونى اتاندى. ال ەستافەتالىق سىندا ۆيكتوريا زيابكينا، ريما كاشافۋتدينوۆا، مەردجەن يشانكۋليەۆا جانە ولگا سافرونوۆا تورتتىگى قارسىلاستارىن شاڭ قاپتىرىپ، مارەگە ءبىرىنشى بولىپ جەتكەن. دجاكارتاداعى ازيا ويىندارىندا ۆيكتوريا زيابكينا، ەلينا ميحينا، سۆەتلانا گولەندوۆا جانە ولگا سافرونوۆا تورتتىگى قولاعا قول جەتكىزدى. جەكە ناتيجە بويىنشا ەكى سپورتشى دا 2016 جىلعى ەل بىرىنشىلىگىندە قازاقستان رەكوردىن ورناتقان. سافرونوۆا 100 مەتردى 11،9 سەكۋندتا، زيابكينا 200 مەترگە 22،66 سەكۋندتا جۇگىرىپ وتكەن. 

ەرلەر اراسىندا 22 جاستاعى مي­حايل ءليتۆيننىڭ ناتيجەسى ماماندار كوڭىلىنەن شىعىپ ءجۇر. ول بيىلعى ازيا ويىندارىندا ەستافەتالىق جارىستا قولا جۇلدە السا، جاز ايىندا الماتىدا وتكەن ەل چەمپيوناتىندا 400 مەتر قاشىقتىقتى 45،50 سەكۋندتا جۇگىرىپ، قازاقستاننىڭ جاڭا رەكوردىن ورناتتى. 
جەڭىل اتلەتيكا سپورتى كوپ مەدال جيىنتىعى ساراپقا سالىنا­تىن­دىعىمەن عانا ەمەس، الەم بويىنشا ەڭ كوپ رەكورد تىركەلەتىندىگىمەن دە جانكۇيەرلەردىڭ نازارىن وزىنە اۋدارادى. ءار وليمپيادا نەمەسە الەم بىرىنشىلىگى كەزىندە قاي سپورتشى رەكورد جاڭارتادى ەكەن دەپ ەلەڭدەپ وتىراتىنىمىز بەلگىلى. ادەتتە ءار جارىس كەزىندە سپورتشىلاردىڭ جە­ڭىسىن جانە جەڭىلىسىنەن عانا حابار­دار بولىپ وتىرعانىمىزبەن ولار­دىڭ قانداي ناتيجە تىركەگەنىن ۇمىت قالدىرىپ جاتامىز. جەڭىل اتلەتيكادا ناتيجە كورسەتىپ جۇرگەن قازاق­ستاندىق سپورتشىلاردىڭ جانە ولاردىڭ الەمدەگى قارسىلاستارىنىڭ رەكورد كەستەسىن ۇسىنامىز.

ر.S. مىنە بۇگىنگى جەڭىل اتلەتيكا سپورتىنىڭ جاي-كۇيى وسىنداي. كەس­تەلەردەگى ناتيجەگە قاراپ-اق قازاق جەڭىل اتلەتيكاسىنىڭ جاعدايىن بىلۋگە بولادى. سونداي-اق چەمپيوندىق اتاققا قول جەتكىزۋ ءۇشىن سپورتشىلارىمىزعا ءبىراز تەر توگىپ، ءالى دە ەڭبەك ەتۋگە تۋرا كەلەتىنىن باعامداي بەرۋگە بولادى. 

ءالي بيتورە،

«ەگەمەن قازاقستان»

سوڭعى جاڭالىقتار

ساپارداعى سىر

رۋحانيات • كەشە

اقاڭنىڭ اماناتى

رۋحانيات • كەشە

تارالىم ءھام قارالىم

100 • 21 قاراشا، 2019

«ەگەمەن» ەستەن شىقپايدى

100 • 21 قاراشا، 2019

تارحان تەكتى رەداكتور

100 • 21 قاراشا، 2019

ءجۇز جىل

100 • 21 قاراشا، 2019

ۇشقىر ويلار ۇشقىندارى

100 • 21 قاراشا، 2019

ۇلكەن جولدىڭ ۇزىكتەرى

100 • 21 قاراشا، 2019

ينۆەستيتسيا – دامۋ داڭعىلى

ايماقتار • 21 قاراشا، 2019

ۇقساس جاڭالىقتار