بىرقاتار ەلدەر ەلەكتروموبيلدەر ينفراقۇرىلىمىن دامىتۋعا, نولدىك شىعىندار بويىنشا كولىكتەردى ساتىپ الۋدى سۋبسيديالاۋعا دا نازار اۋدارا باستادى. ينفراقۇرىلىمدى دامىتۋ دەگەندە, الدىمەن قالالاردا ەلەكترلى كولىك قۇرالدارىنا ارنالعان زاريادتاۋ ستانسالارىن ورناتۋ قولعا الىندى, بۇل ءوز كەزەگىندە زاريادتاۋ ستانسالارىنىڭ تۇتىنۋشىعا قولجەتىمدى, ىڭعايلى بولۋىن قامتاماسىز ەتەدى.
بۇل باستاما ءبىزدىڭ ەلىمىزدە دە قولداۋعا يە. 2014 جىلى مەملەكەت باسشىسى ەلەكتركولىكتەرگە ارنالعان ينفراقۇرىلىمدى دامىتۋعا تاپسىرما بەردى, سونداي-اق وسى جىلى نولدىك شىعىنداعى كولىكتەردى اكەلۋگە قاتىستى كەدەندىك باج سالىعى الىنىپ تاستالدى.
اقتاۋ قالاسىنداعى ۋنيۆەرسيتەت وقىتۋشىلارى جاساپ شىعارعان ەلەكتروموبيلدەردى زاريادتاۋ ستانسالارى وتاندىق ءوندىرىستى جانە ەلەكتركولىكتەرگە قاتىستى ينفراقۇرىلىمدى دامىتۋعا نەگىزدەلگەن. بۇل جاڭالىقپەن اقتاۋدا Yessenov University قابىرعاسىندا وتكەن
«I حالىقارالىق ەسەنوۆ وقۋلارى» بارىسىندا تانىستىق. وقۋ اياسىندا تۇساۋى كەسىلگەن وقۋ ورداسى باس كورپۋسىنىڭ الدىندا ورناتىلعان ەكى ستانسانىڭ تولىق زاريادتاۋ تسيكلى ءۇش ساعاتتى قۇرايدى. ال قوس ەلەكتروموبيل ۋنيۆەرسيتەتتىڭ ىشكى پايدالانۋى ءۇشىن الىنعان.
وقۋ ورداسىنداعى ءىس-شاراعا 2007 جىلى بەيبىتشىلىك بويىنشا نوبەل سىيلىعىنىڭ لاۋرەاتى, دۇنيەجۇزىلىك تۇراقتى دامۋ جونىندەگى فورۋمنىڭ پرەزيدەنتى, ۇندىستاندىق رادجەندرا كۋمار پاچاۋري, مالايزيا پۋترا ۋنيۆەرسيتەتىنىڭ ينفورماتيكا جانە اقپاراتتىق تەحنولوگيالار فاكۋلتەتىنىڭ بايلانىس تەحنولوگياسى جانە جەلىسى كافەدراسىنىڭ پروفەسسورى موحامەد بين وتمان قۇرمەتتى قوناق رەتىندە قاتىستى. «رۋحاني جاڭعىرۋ» باعدارلاماسى – تاپسىرمالاردى شەشۋگە ارنالعان جاڭا باعىت» تاقىرىبىنان باستاپ ماڭعىستاۋ ەكولوگياسىنا, مۇناي-گاز ءوندىرۋ ىسىنە, تەڭىز سۋىن تۇششىتۋعا, سونداي-اق جاستار, ستۋدەنتتەر ماسەلەسىنە قاتىستى سان الۋان تاقىرىپتاردى قامتىعان كونفەرەنتسيا ۋنيۆەرسيتەت ستۋدەنتتەرى ءۇشىن «Yessenov University ۇزدىك ستارتاپ جوباسى» بايقاۋىمەن, سونداي-اق مۇنايشى-گەولوگ حالەل وزبەكعاليەۆتىڭ 90 جىلدىعىنا ارنالعان كىتاپتىڭ تۇساۋكەسەرىمەن قورىتىندىلاندى.
بولاشاقتا جاڭا جوبانى رەسپۋبليكا كولەمىندە قولدانىسقا ەنگىزۋ كوزدەلىپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
