«رۋحاني جاڭعىرۋ» باعدارلاماسى اياسىندا وتكەن مادەني شاراعا حالىق ءارتىسى, ت.جۇرگەنوۆ اتىنداعى قازاق ۇلتتىق ونەر اكادەمياسى ەسترادالىق ۆوكال كافەدراسىنىڭ مەڭگەرۋشىسى, پروفەسسور لاكي كەسوگلۋ, قازاقستاننىڭ ەڭبەك سىڭىرگەن قايراتكەرى, مەملەكەتتىك رەسپۋبليكالىق كورەي مۋزىكالىق كومەديا تەاترىنىڭ ديرەكتورى ليۋبوۆ ني جانە دە باسقا مادەنيەت, ونەر قايراتكەرلەرى قاتىسىپ, ەل دامۋىنداعى جاستاردىڭ رولىنە قاتىستى مازمۇندى پىكىرلەرىمەن ءبولىستى.
ۋچيليششە ديرەكتورى, قازاقستاننىڭ ەڭبەك سىڭىرگەن قايراتكەرى ايا قاليەۆا بۇگىندە قازاقستاننىڭ بولاشاعى, دامۋى, قۇندىلىقتارى, ەكونوميكاسىنىڭ ءوسۋى, ساياسي-قوعامدىق ءومىرى جاستارمەن تىعىز بايلانىستى ەكەندىگىنە توقتالىپ, جاستارعا قولداۋ كورسەتۋ – ەل دامۋىنىڭ ينۆەستيتسياسى ەكەنىن اتاپ ءوتتى. ەل تاۋەلسىزدىگىنىڭ العاشقى جىلدارىنان باستاپ جاستاردىڭ الەۋمەتتەنۋى ەلباسىنىڭ نازارىندا بولىپ كەلەدى. رەسپۋبليكانىڭ الەۋمەتتىك-ەكونوميكالىق جانە مادەني دامۋىنداعى جاستاردىڭ كەلەشەگىنە, ءبىلىم الۋى مەن دامۋىنا, بەلسەندى ەڭبەگىنە قامقورلىق ەرەكشە.
ۋچيليششەنىڭ بولاشاعى دا جاستاردىڭ ومىرىمەن تىعىز بايلانىستى. اتالعان وقۋ ورنىندا بي ونەرىنىڭ دامۋى, ساقتالۋى مەن ناسيحاتتالۋى جولىندا جاستاردى كوپتەپ تارتۋعا باسىمدىق بەرىلگەن. سونىمەن قاتار باسەكەگە قابىلەتتى بالەت ارتىستەرىن تاربيەلەۋ ماقساتىندا, قازاق بالەتىن الەمدە ناسيحاتتاۋعا بايلانىستى «جاھانداعى زاماناۋي قازاقستاندىق مادەنيەت» جوباسى اياسىندا كوپتەگەن جۇمىستار جولعا قويىلعان. بۇل باعىتتا كورنەكتى قازاق ءبيشىسى رامازان باپوۆتىڭ شىعارماشىلىعىنا ارنالعان «رامازان باپوۆ. تانەتس دلينويۋ ۆ جيزن», قازاق ءبيشىسى, بالەتمەيستەر سارا كوشەرباەۆانىڭ ءومىرى مەن شىعارماشىلىعى تۋرالى «بالەرينا» كىتابى جارىق كورگەندىگىن ايتا كەتكەن ءجون.
ال ۋچيليششە تۇلەگى انۆارا سادىكوۆانىڭ «تۇران دالا – قىران دالا» حورەوگرافياسىن مىسالعا العان ۋچيليششە ديرەكتورى, بۇل قويىلىمنىڭ ءون بويىندا ءبۇتىن ءبىر ۇلتتىڭ قالىپتاسۋى, باتىرلىعى, وتانسۇيگىشتىگى مەن قازاق حالقىنىڭ ءوز ەلىنە دەگەن سۇيىسپەنشىلىگى جاتقاندىعىن اتاپ ءوتتى. وتتىڭ جالىنى, قالىقتاعان اۋا, سۋدىڭ سىلدىرى, جەردىڭ قۋاتى كورىنىس بەرەتىن بالەت «تۇران» فولكلورلىق-ەتنوگرافيالىق ءانسامبلىنىڭ مۋزىكاسىمەن اسەر ارتا ءتۇسىپ, ەرەكشە ىزدەنىستەگى قويىلىم رەتىندە باعالاندى. ليبرەتتوسىن جاس بالەتمەيستەر دامير ورازىمبەتوۆ جازسا, كوستيۋمدەردىڭ اۆتورى قازاقستاندىق بەلگىلى ديزاينەر اسەل لۇقپانوۆا مەن ستسەنوگراف ەربول بيسەنوۆتىڭ شىعارماشىلىق ەڭبەگى زور.
شىعارماشىلىق كەزدەسۋ اياسىندا وتانسۇيگىشتىك, ەل مەن جەرگە دەگەن سۇيىسپەنشىلىك, ۇلتتىق سالت-داستۇرگە قۇرمەت, جاھاندانۋ زامانىندا رۋحاني قۇندىلىقتاردى ساقتاپ قالۋعا بايلانىستى مازمۇندى ويلار ايتىلدى.
جاس ارتىستەر ۇستازدارىنىڭ پىكىرلەرىن تىڭداپ, وزدەرىن تولعاندىرعان سۇراقتارعا جاۋاپ الدى.
ەلۆيرا سەرىكقىزى,
«ەگەمەن قازاقستان»
الماتى
