فورۋم ازيا مەن ەۋروپا ەلدەرىنىڭ اراسىندا ديالوگ الاڭىن قۇرۋ ارقىلى تسيفرلىق ترانسفورماتسيا, ەلەكتروندى ۇكىمەت, تەحنولوگيالىق كاسىپكەرلىك جانە ءتورتىنشى يندۋستريالىق رەۆوليۋتسيا يدەيالارىن دامىتۋ ماقساتىندا ۇيىمداستىرىلماق. شاراعا حالىقارالىق IT-قوعامداستىقتاردىڭ باستى وكىلدەرى, تەحنولوگيا سالاسىنداعى تانىمال ساراپشىلار, كاسىپورىن باسشىلارى, تسيفرلى جوبالار سالاسىنىڭ كاسىبي ماماندارى, عالىمدار, ينۆەستورلار قاتىسادى. بۇل تۋرالى اقپارات جانە كوممۋنيكاتسيالار ۆيتسە-ءمينيسترى دينارا ششەگلوۆا ايتتى.
«بۇگىنگى تاڭدا فورۋمعا 23 مەملە-كەتتەن 600-دەن استام قاتىسۋشى, 50-گە جۋىق سپيكەر كەلەدى دەپ كۇتۋدەمىز. ولاردىڭ قاتارىندا سينگاپۋر, كورەيا, نيدەرلاندى, ەستونيا, فرانتسيا, گەرمانيا مەملەكەتتەرىنىڭ وكىلدەرى بار», دەدى ۆيتسە-مينيستر.
فورۋم اياسىندا تسيفرلاندىرۋ سالاسىنداعى قازاقستاننىڭ العاشقى پرەمياسى – Digital Bridge Awards بەرىلەتىن بولادى. اتالاعان سىيلىق «ۇزدىك تسيفرلى باستاما», «ۇزدىك تسيفرلى كەڭسە», «ۇزدىك IT-كومپانيا» نوميناتسيالارى بويىنشا ۇزدىكتەردى انىقتايدى.
سونىمەن قاتار فورۋم بارىسىندا ەلىمىزدىڭ ستارتاپ-يندۋسترياسىنداعى ماڭىزدى شارا – Astana Hub IT-ستارتاپتار حالىقارالىق تەحنوپاركىنىڭ تۇساۋكەسەرى وتەدى.
ء«بىز فورۋم اياسىندا ديالوگ الاڭىن قۇرىپ قانا قويماي, الەم نازارىن قازاقستانداعى قازىرگى تاڭدا جۇزەگە اسىپ جاتقان تسيفرلى باستامالار مەن جوبالارعا بۇرعىمىز كەلەدى. سوندىقتان Digital Bridge – جىل سايىن وتكىزۋ جوسپارلانىپ وتىرعان ىرگەلى شارالاردىڭ ءبىرى. بۇل فورۋم بارىسىندا حالىقارالىق Astana Hub IT-تەحنوپاركىنىڭ تۇساۋكەسەرى وتەدى. شارا كەزىندە Astana Hub-تىڭ نەگىزگى ونىمدەرى تانىستىرىلىپ, باعدارلامانىڭ العاشقى تۇلەكتەرىنىڭ جەتىستىكتەرى جانە ەكسپو پاۆيلوندارىنىڭ بىرىندە ورنالاسقان تەحنوپارك ينفراقۇرىلىمى كورسەتىلەدى», دەدى دينارا ششەگلوۆا.
وعان قوسا بۇل كۇنى Astana Hub تاعى ەكى دەبيۋتتىق شارا وتكىزەتىن بولادى: Astana Hub Awards جانە Astana Hub Battle. ايتا كەتەيىك, Astana Hub-تىڭ تۇساۋكەسەرى جابىق فورماتتا وتەدى, وعان قازاقستاننىڭ جانە باسقا ەلدەردىڭ رەسمي وكىلدەرى, حالىقارالىق يننوۆاتسيالىق ەكوجۇيەنىڭ ساراپشىلارى قاتىساتىن بولادى. ال Digital Bridge فورۋمىنىڭ قاتىسۋعا نيەتتىلەر ءۇشىن ەسىگى اشىق.
قارلىعاش قۇرامىس,
«ەگەمەن قازاقستان»
