ءۇش كۇنگە سوزىلعان شارا بارىسىندا جوعارىدا اتالعان تاقىرىپتار بويىنشا تارتىمدى اڭگىمەلەردىڭ تيەگى اعىتىلىپ, كوكەيكەستى ماسەلەلەر توڭىرەگىندە وي-پىكىرلەر ايتىلدى. اسىرەسە بالالار مەن جەتكىنشەك ۇرپاقتى تاربيەلەۋ, ولاردىڭ بويىنا ادامگەرشىلىك پەن پاتريوتتىق سەزىمدى ءسىڭىرۋ, جاس ورەندەردىڭ جەكە تۇلعا رەتىندە قالىپتاسۋىنداعى اتا-اتانالار مەن مۇعالىمدەردىڭ, پەداگوگ-ۇستازداردىڭ اتقاراتىن رولىنە ەرەكشە ءمان بەرىلدى.
«بوبەك» قايىرىمدىلىق قورىنىڭ پرەزيدەنتى, ء«وزىن ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆا سەمينارعا قاتىسۋشىلارعا ءوزىنىڭ قۇتتىقتاۋ حاتىن جولدادى. ول بارلىق مەيماندارعا زور العىسىن ءبىلدىرىپ, جەتكىنشەك ۇرپاقتى تاربيەلەۋ ىسىندە ولاردىڭ اتقارىپ وتىرعان ەڭبەكتەرى وراسان زور ەكەنىن اتاپ ءوتتى.
سەميناردا جوعارى پراكتيكالىق پسيحولوگيا مەكتەبىنىڭ ديرەكتورى, پەداگوگيكا عىلىمدارىنىڭ كانديداتى الەكسەي بابايانتس (رەسەي), «حالىقارالىق ىزگىلىكتى پەداگوگيكا ورتالىعى» قوعامدىق بىرلەستىكتەرى حالىقارالىق قاۋىمداستىعىنىڭ ۆيتسە-پرەزيدەنتى زارينا تارعاقوۆا (قازاقستان), جوعارى پراكتيكالىق پسيحولوگيا مەكتەبىنىڭ ترەنەرى سەرگەي اۆاكوۆ (رەسەي), حالىقارالىق ىزگىلىكتى پەداگوگيكا ورتالىعىنىڭ پرەزيدەنتى, پسيحولوگيا عىلىمدارىنىڭ دوكتورى پااتا اموناشۆيلي (رەسەي) جانە باسقا دا عالىمدار مەن ماماندار ءدارىس وقىپ, شەبەرلىك ساباعىن وتكىزدى.
سونداي-اق وسى شاراعا ءبىلىم جانە عىلىم ءمينيسترى ەرلان ساعاديەۆ, پارلامەنت ءماجىلىسى توراعاسىنىڭ ورىنباسارى گۇلميرا يسيمباەۆا, «نۇرسۇلتان نازارباەۆ ءبىلىم قورى» قوعامدىق قورىنىڭ ديرەكتورى دينارا نازارباەۆا, قازاقستان مۇسىلماندارى ءدىني باسقارماسىنىڭ توراعاسى سەرىكباي وراز, پراۆوسلاۆيا ءدىني سەمينارياسىنىڭ پرورەكتورى يۆان ليۆينسكي جانە باسقا دا بەلگىلى تۇلعالار قاتىستى.
سەمينار بارىسىندا حالىقارالىق ىزگىلىكتى پەداگوگيكا ورتالىعىنىڭ پرەزيدەنتى پااتا اموناشۆيلي جانە قوعام قايراتكەرلەرى باقىتجان سەرتەكوۆ پەن داۋرەن مۇقانوۆ «بوبەك» قايىرىمدىلىق قورىنىڭ پرەزيدەنتى سارا نازارباەۆاعا «رۋح باتىرى» مەن « ۇلى دالا ەلى اناسى» وردەندەرىنىڭ تابىس ەتىلەتىنى جايىندا مالىمدەدى.
عالىم سۇلەيمەن,
«ەگەمەن قازاقستان»
الماتى
