مەرەكەلىك جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك, ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد مامەدوۆ, موڭعوليا مەملەكەتىنىڭ قازاقستانداعى توتەنشە جانە وكىلەتتى ەلشىسى لۋۆسان باتتۋلگا, تۇركى اكادەمياسىنىڭ اقساقالدار كەڭەسىنىڭ مۇشەلەرى, مىرزاتاي جولداسبەكوۆ پەن ءادىل احمەتوۆ, سىرتقى ىستەر مينيسترلىگىنىڭ وكىلدەرى, تۇركولوگتار قاتىستى.
القالى جيىندى تۇركى اكادەمياسىنىڭ پرەزيدەنتى دارحان قىدىرالى اشىپ, جينالعان قاۋىمدى, تۇركيا رەسپۋبليكاسىنىڭ ەلشىسىن ايتۋلى مەرەكەمەن قۇتتىقتادى.
«مۇستافا شوقاي ءبىر ماقالاسىندا ءاربىر تۇركى كىندىگىنەن تاراعان ازاماتتىڭ ەكى وتانى بار. ءبىرى – ءوزىنىڭ تۋعان جەرى بولسا, ەكىنشىسى – تۇركيا» دەپ جازعان. راسىندا وسىدان 95 جىل بۇرىن قۇرىلعان تۇركيا مەملەكەتى تۇركى حالىقتارىنىڭ قيىن-قىستاۋ كەزىندە قامقورلىق جاساپ, ارقا سۇيەر تىرەك بولعان. بۇگىندە حالىقارالىق تۇركى اكادەمياسىنىڭ قۇرىلتايشى مەملەكەتتەرىنىڭ ءبىرى تۇركيا رەسپۋبليكاسىنىڭ 95 جىلدىعى – تۇركى اكادەمياسى ءۇشىن دە ۇلكەن مەرەكە. حالىقارالىق تۇركى اكادەمياسىنىڭ قۇرىلتايشى مەملەكەتتەرىنىڭ بارلىق مەملەكەتتىك مەرەكەلەرىن اكادەميادا اتاپ ءوتۋ جونىندە شەشىمى قابىلداندى», دەدى د.قىدىرالى.
جيىندا ءسوز العان تۇركيا ەلشىسى نەۆزات ۋيانىك تۇركيا رەسپۋبليكاسىنىڭ 95 جىلدىعىن جوعارى دەڭگەيدە اتاپ ءوتىپ, تۇركى الەمىنە ەلەۋلى ۇلەس قوسىپ جۇرگەن ازاماتتاردى ءبىر ورتادا جيناعانى ءۇشىن اكادەميا باسشىسىنا العىس ءبىلدىردى.
«تۇركيا رەسپۋبليكاسى ءى دۇنيەجۇزىلىك سوعىستان كەيىن وسمان يمپەرياسىنىڭ ورنىنا قۇرىلدى. مەملەكەتىمىزدىڭ 95 جىلدىعىن اتاجۇرتىمىزدا تويلاۋ ءبىز ءۇشىن ۇلكەن قۋانىش. ونىمەن قوسا, بۇل كۇندى قازاقستاننىڭ ەلورداسىندا, تۇركى اكادەمياسىنىڭ شاڭىراعىندا تويلاۋ مەرەكەنى ەرەكشەلەي ءتۇستى. ەكى ەلدىڭ باسشىلارىنىڭ جاقسى قارىم-قاتىناسى باۋىرلاس مەملەكەتتەردىڭ تاتۋلىعىنان بايقالادى. تاۋەلسىزدىگىمىز, دوستىعىمىز, باۋىرلاستىعىمىز ماڭگىلىك بولسىن», دەدى ەلشى.
ازەربايجان ەلشىسى راشاد مامەدوۆ ءوز سوزىندە بۇگىنگى تۇركيانىڭ ۇلى وسمان يمپەرياسىنىڭ جالعاسى ەكەنىنە توقتالىپ, الەمدىك ساياساتتا, ەكونوميكادا وزىندىك ورنى بار مەملەكەتكە اينالعانىن اتاپ ءوتتى.
«ازەربايجان پرەزيدەنتى گەيدار اليەۆ ءبىر سوزىندە تۇركيا مەن ازەربايجان مەملەكەتتەرىن ء«بىر ۇلت, ەكى مەملەكەت» دەگەن بولاتىن. تۇركيا ازەربايجان مەملەكەتىن قاشان دا قولداپ كەلدى. تاۋەلسىزدىك العان جىلدارى تۇركيانىڭ ساياسي, ەكونوميكالىق كومەگى قازىرگى ازەربايجاندى قۇرۋعا كۇش بەردى. پرەزيدەنتىمىز يلحام اليەۆ سوڭعى كەزدەسۋىندە «تۇركيانىڭ جەتىستىگى – ازەربايجان جەتىستىگى» دەگەن بولاتىن. ءوز اتىمنان, ازەربايجان حالقىنىڭ اتىنان تۇركيا رەسپۋبليكاسىن 95 جىلدىعىمەن شىن جۇرەكتەن قۇتتىقتايمىن», دەدى ر.مامەدوۆ.
تۇركيانى ايتۋلى مەرەكەسىمەن قۇتتىقتاۋشىلار قاتارىندا موڭعوليانىڭ قازاقستانداعى ەلشىسى لۋۆسان باتتۋلگا دا بولدى.
«تۇركيا مەن موڭعوليا مەملەكەتتەرىنىڭ دوستىق قاتىناس ورناتقانىنا 60 جىلداي ۋاقىت ءوتتى. موڭعوليا – تۇركى الەمىنىڭ ماڭىزدى ەسكەرتكىشتەرىن يەمدەگەن مەملەكەت. سوندىقتان, اراداعى رۋحاني, مادەني, ساياسي قاتىناستى ودان ءارى دە دامىتا ءتۇسۋىمىز كەرەك», دەدى ەلشى. سونىمەن قاتار ل.باتتۋلگا تۇركى اكادەمياسىنىڭ تۇركى الەمىن موڭعوليامەن بايلانىستىراتىن كوپىر ەكەنىن, موڭعوليانىڭ تۇركى الەمىندە الار ورنى ەرەكشە ەكەنىن ايتىپ ءوتتى.
تۇركى اكادەمياسىنىڭ سىيلى اقساقالى, قوعام قايراتكەرى, عالىم مىرزاتاي جولداسبەكوۆ تۇركيا مەن تاۋەلسىز قازاقستاننىڭ قارىم-قاتىناسىنداعى العاشقى قادامدارى تۋرالى ەستەلىكتەرىمەن ءبولىسىپ, تۇركياداعى العاش رەت ۇيىمداستىرىلعان قازاقستاننىڭ مادەني كۇندەرى تۋرالى اڭگىمەلەدى. اكادەميا اقساقالدار كەڭەسىنىڭ مۇشەسى, عالىم ءادىل احمەتوۆ تۇركيا رەسپۋبليكاسىن ەلەۋلى مەرەكەسىمەن قۇتتىقتاپ, ەكى ەل دوستىعىنىڭ ماڭگىلىك بولۋىن تىلەدى.
سۆەتلانا عالىمجانقىزى,
«ەگەمەن قازاقستان»
