جاۋاپتى ماماندار قازىرگى كەزدە كولىك سالاسىندا اشىق نارىقتىق مەحانيزمدەردىڭ جۇمىس ىستەي باستاعانىن ايتادى. جىلجىمالى سوستاۆتى جاڭارتىپ, ارنايى جولاقتار اشۋدىڭ ارقاسىندا قالادا جولاۋشىلار اعىنى ەداۋىر ارتقان.
– ەسكى ءارى ءتۇتىن شىعاراتىن اۆتوبۋستار قالادا جۇرۋگە ءتيىس ەمەس. ەگەر كورسەتىلگەن قولداۋعا قاراماستان جەكە تاسىمالداۋشى جىلجىمالى سوستاۆتى جاڭالاماسا, وندا ولارمەن كەلىسىم بۇزىلادى. جاڭا تەحنولوگيالاردى ەنگىزىپ, بولاشاقتا ءبىر كولىكتەن ەكىنشىسىنە تەگىن اۋىسۋدى قاراستىرعان ءجون. جولاۋشىلاردىڭ كولىك جۇمىسىنا قاناعاتتانۋى – تاسىمالداۋدىڭ باستى كريتەريى. جەكە كولىكتى قازىرگى دەڭگەيدە ۇستاپ تۇرۋ ءۇشىن لايىقتى بالاما ۇسىنۋ قاجەت, – دەيدى مەگاپوليس باسشىسى باۋىرجان بايبەك.
سىيىمدىلىعى ۇلكەن جاڭا اۆتوبۋستار №48 باعىت بويىنشا جۇرەدى, سونىمەن قاتار قالاداعى № 12, 19, 56, 70, 77, 123, 124, 137 باعىتتار كۇشەيتىلەتىن بولادى. ال, № 36, 51, 125 باعىتتاعى ەسكى گازەلدەر جاڭا اۆتوبۋستارعا الماستىرىلماق. اتالعان قوعامدىق كولىكتەر قوزعالىسى شەكتەۋلى جاندار ءۇشىن قولايلى ءارى تار كوشەلەرمەن دە ەركىن جۇرە الادى. بۇلاردان وزگە, № 59, 69, 71 باعىتتارداعى جىلجىمالى سوستاۆ تولىق جاڭارادى.
№205 باعىت بويىنشا جاڭا ماگيسترالدى قوزعالىس اشىلادى, ول رايىمبەك داڭعىلى بويىمەن «بارلىق» بازارىنان قالانىڭ باتىس جاعىن جانە «جەتىسۋ» بازارىنىڭ شىعىس جاعىن قامتىماق. بۇل باعىت بويىنشا جولاۋشىلارعا جاڭا 20 اۆتوبۋس قىزمەت كورسەتەدى. الماتى اگلومەراتسياسى بويىنشا جولاۋشىلاردى تاسىمالداۋ ساپاسىن ارتتىرۋ ءۇشىن قاسكەلەڭ قالاسىنا قاتىنايتىن ۇزىندىعى 12 مەترلى اۆتوبۋستار جۇرەتىن جاڭا باعىت اشۋ ءىسى جوسپاردا بار.
ايتا كەتەرلىگى, الماتىدا جىل اياعىنا دەيىن جاڭا قوعامدىق كولىكتىڭ ۇلەسى 87 پروتسەنتكە دەيىن جەتەدى دەپ كۇتىلۋدە.
ارمان وكتيابر,
«ەگەمەن قازاقستان»
الماتى
