ەڭبەك وتانى – ەلباسى نازارىندا
مەملەكەت باسشىسى بيىل دا وسى ادەتىنەن جاڭىلعان جوق. قىركۇيەك ايىندا وبلىسقا جۇمىس ساپارىمەن كەلگەنىندە تەمىرتاۋعا ارنايى بارىپ, ونداعى الەۋمەتتىك-ەكونوميكالىق جاعدايمەن جەتە تانىسىپ, قالا اكىمدىگىنە, جۇيە قۇرۋشى الپاۋىت كاسىپورىن – «ارسەلورميتتال تەمىرتاۋ» اق-تىڭ باسشىلارىنا بىرقاتار ماڭىزدى تاپسىرمالار بەرگەن بولاتىن. بيزنەستىڭ الەۋمەتتىك جاۋاپكەرشىلىگىن ەسكە سالىپ, قالا تۇرعىندارى ءومىرىنىڭ ساپاسىن جاقسارتۋ ماقساتىندا قولدان كەلگەننىڭ ءبارىن جاساۋ كەرەكتىگىن شەگەلەپ ايتقان ەدى. پرەزيدەنت قالاداعى مەديتسينالىق, ءبىلىم بەرۋ جانە سپورتتىق نىساندار سانىن ارتتىرۋ قاجەتتىگىن تاپسىرعان.
ال سول ساپاردان ءبىر كۇن بۇرىن قاراعاندىدا وبلىس اكتيۆىمەن وتكەن كەزدەسۋ بارىسىندا «ارسەلورميتتال تەمىرتاۋ» اق-تىڭ باس ديرەكتورى پارامجيت كالوندى ورنىنان تۇرعىزىپ, تەمىرتاۋداعى جىلۋ ەلەكتر ورتالىعىن جاڭعىرتۋدى قاتاڭ تۇردە تالاپ ەتكەن بولاتىن.
– بۇل ستانسانى 1960 جىلى مەن سالعان بولاتىنمىن. ول قالا مەن كومبيناتتى جىلۋمەن قامتاماسىز ەتىپ وتىر. ميتتال مىرزاعا جەتكىزىڭىزدەر, وعان ۇكىمەتتەن تەلەفون سوعادى, ول مەنىڭ سۇراقتارىما جاۋاپ بەرسىن. بۇكىل قالا كومبيناتقا قاراپ تۇر, ول بۇكىل قالانى جىلۋمەن, سۋمەن قامتاماسىز ەتىپ وتىر. ونى مىندەتتى تۇردە جاڭعىرتۋ كەرەك, – دەگەن ەدى سوندا مەملەكەت باسشىسى.
قازىرگى تاڭدا ەلباسىنىڭ تاپسىرماسىنا ساي, الپاۋىت كاسىپورىن ەكى جەو-نى جاڭعىرتۋ بويىنشا 2023 جىلعا دەيىن ەسەپتەلگەن جوسپار جاساپ, قاجەتتى قاعازداردى, اتاپ ايتقاندا, جوبالىق-سمەتالىق قۇجاتتامالاردى ازىرلەپ جاتىر. جوسپار بويىنشا, ءۇش قازاندىققا تاپسىرىس بەرىلىپ, ولار 2019 جىلدىڭ ناۋرىز ايىندا جەتكىزىلەتىن بولىپتى. بۇل تۋرالى كومپانيا باسشىلىعى رەسمي تۇردە ءمالىم ەتتى.
ەڭبەكاقى 10 پايىزعا وسەدى
تاياۋدا «ارسەلورميتتال تەمىرتاۋ» اق-نىڭ باس ديرەكتورى پارامجيت كالون كومپانيانىڭ العاشقىلاردىڭ ءبىرى بولىپ مەملەكەت باسشىسىنىڭ جالاقىنى كوتەرۋ تۋرالى باستاماسىن قولدايتىنى تۋرالى مالىمدەمە جاسادى. ياعني, 2019 جىلدىڭ 1 قاڭتارىنان باستاپ كومپانيا قىزمەتكەرلەرىنىڭ تاريفتەرى مەن جالاقىلارى 8-10%-عا كوتەرىلەتىن بولادى. سونىمەن قاتار ۇجىمدىق كەلىسىمگە سايكەس, كومپانيا قىزمەتكەرلەرىنىڭ جالاقىسى 2018 جىلدىڭ قۇنسىزدانۋ دەڭگەيىنە ساي 50% شاماسىندا يندەكساتسيالانباق.
– نۇرسۇلتان نازارباەۆتىڭ ءوزىنىڭ العاشقى ەڭبەك جولىن مەتاللۋرگ رەتىندە ءبىزدىڭ كومبيناتتان باستاعاندىعىن ماقتان تۇتامىز, – دەدى پارامجيت كالون. – ءبىز مەملەكەت باسشىسىنىڭ ەڭ تومەنگى جالاقىنى كوتەرۋ جونىندەگى باستاماسىن العاشقىلاردىڭ ءبىرى بولىپ قولدادىق. بۇل شەشىم ۇجىمدىق نەگىزدە قابىلداندى.
قىزمەتكەرلەردىڭ جالاقىسىن كوتەرۋ «ارسەلورميتتال تەمىرتاۋ» كومپانياسىنىڭ بارلىق قۇرىلىمدىق بولىمشەلەرى مەن ەنشىلەس كومپانيالارىن قامتيتىن بولادى. بۇدان وزگە 2019 جىلدىڭ 1 توقسانىندا كومپانيا ءوزىنىڭ وندىرىستىك ناتيجەلەرىنە قاراي 13-ايلىق جالاقى تولەيتىن بولادى.
سونىمەن قاتار كومپانيا باسشىسى 2019 جىلدىڭ 1 قاڭتارىنان باستاپ «ارسەلورميتتال تەمىرتاۋ» اق-تا زياندى جۇمىس جاعدايىندا جۇمىس ىستەيتىن قىزمەتكەرلەر ءۇشىن جاڭا ەڭ تومەنگى جالاقى كولەمى سالالىق كوەففيتسيەنتتى ەسەپتەگەندە 77 مىڭنان استام تەڭگەنى قۇرايتىن بولادى دەپ اتاپ ءوتتى.
تەمىرتاۋ قالاسىنىڭ جاعدايىن جاقسارتۋ ماقساتىنداعى جۇمىستاردىڭ تامىرىنا قان جۇگىرە باستاعانى قۋانتادى. بۇدان بۇرىن حابارلاعانىمىزداي, «ارسەلورميتتال تەمىرتاۋ» سىندى قۋاتتى ينۆەستوردىڭ قاراجاتىنا مەتاللۋرگتەر قالاسىندا 20 مىڭ ادامعا ارنالعان ەمحانا, 320 ورىندىق بالاباقشا, 320 ادام سىياتىن سپورتتىق نىسان بوي كوتەرمەك. ايتا كەتۋ كەرەك, اتالعان نىسانداردىڭ بارلىعى دا جاڭا زامان تالاپتارىنا ساي ۇلگىدە سالىنىپ, جابدىقتالاتىن بولادى.
وبلىس اكىمى ەرلان قوشانوۆتىڭ سوزىمەن ايتقاندا, جاقىن ارادا تەمىرتاۋلىقتار مەتاللۋرگتەر قالاسى مەن ونىڭ تۇرعىندارىنا دەگەن مەملەكەت باسشىسىنىڭ قامقورلىعىن تولىققاندى سەزىنەتىن بولادى.
قايرات ءابىلدا,
«ەگەمەن قازاقستان»
قاراعاندى وبلىسى,
تەمىرتاۋ قالاسى
