وبلىستىق «جاس وتان» جاستار قاناتى قاراشا ايىندا جاستار ۇسىنىستارىن قابىلداۋ ماقساتىندا «Jas Otan Orda» رەسمي سايتىن ىسكە قوسىلدى. وڭىرلىك كوممۋنيكاتسيالار قىزمەتىنىڭ اقپاراتتىق الاڭىندا وتكەن بريفينگتە «جاس وتان» جاستار قاناتى قوعامدىق بىرلەستىگى قىزىلوردا وبلىستىق فيليالىنىڭ توراعاسى تالعات تىلەس: - قازىرگى تاڭدا جاستار اراسىنداعى جۇمىسسىزدىق ماسەلەسى كوڭىل الاڭداتادى. ەلباسىمىز ءوزىنىڭ جولداۋىندا «بيزنەستىڭ جول كارتاسى-2020» باعدارلاماسىن 2025 جىلعا دەيىن سوزۋدى جۇكتەگەن بولاتىن. وسى ورايدا, ايماق باسشىسىنىڭ باستاماسىمەن وبلىستىق ءماسليحات, وبلىستىق «نۇر وتان» پارتياسىنىڭ, قوعامدىق كەڭەستىڭ شەشىمىمەن قىزىلوردا وبلىسىندا 2018-2020 جىلدار ارالىعىن جاپپاي كاسىپكەرلىكتى دامىتۋ جىلدارى دەپ جاريالاندى.
بۇل قابىلدانعان شەشىم ءوز كەزەگىندە جاستار اراسىنداعى كاسىپكەرلىكتىڭ دامۋىنا ەرەكشە يمپۋلس بەرەرى ءسوزسىز.
ەلباسىمىزدىڭ ءوزى سىردى الاشتىڭ اناسىنا بالادى. كيەلى مەكەندە كەلەر جىلى وبلىس اكىمى قىرىمبەك كوشەرباەۆتىڭ كەلىسىمىمەن رەسپۋبليكامىزدىڭ بەلسەندى جاستارى سىر ەلىنىڭ تۇنعان تاريحىمەن, مادەنيەتىمەن, تابيعاتىمەن تانىسۋ ماقساتىندا «جاس وتان» جاستار قاناتىنىڭ «جاستار-وتانعا!» رەسپۋبليكالىق لاگەرىن وبلىسىمىزداعى قامباش كولىندە وتكىزۋدى ۇسىنامىز!, - دەدى.
باقتيار تايجان,
«ەگەمەن قازاقستان»
