بالاڭ كەزىنەن اكەسى كۇيشى, سازگەر تايماننىڭ ءتالىمىن العان روزا قازاقتىڭ دينا, ناۋشا, التىناي, اققىز, بارشا, ءزامزام, باقىت سىندى ءدۇلدۇل كۇيشى قىزدارىنىڭ ۇكىلى ءىزباسارى, ءحىح-حح عاسىردىڭ كۇي-جۇگىن ارقالاعان دينانىڭ جۇگىن كوتەرىپ, ءوز كەزەگىندە حح-ءححى عاسىردىڭ قىز-كەلىنشەكتەر كۇي-كەرۋەنىنىڭ تىزگىنىن ۇستاعان كوشباسىنداعى بالبارماق.
وينالۋى قيىن كۇردەلى كۇيلەردى مۇلتىكسىز يگەرىپ جانە مۇدىرمەي ورىنداۋىمەن كوپتىڭ كوڭىلىن اۋدارۋىمەن 9 جاسىندا ساحناعا شىققان روزا بۇگىندە 66 جاستاعى ارقالى كۇيشى, تالانتتى شاكىرتتەردى تاربيەلەگەن ۇلاعاتتى ۇستاز, اسىل انا, ابزال اجە. شاكىرتى دەمەكشى, روزانىڭ ءتالىمىن العان ابىلاي تىلەپبەرگەنوۆ – «سەرپەر» جاستار سىيلىعىنىڭ يەگەرى, تۇڭعىش پرەزيدەنت قورى سىيلىعىنىڭ لاۋرەاتى, قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ باس ديريجەرى, بىرنەشە حالىقارالىق, رەسپۋبليكالىق كۇي بايقاۋلارىنىڭ باس جۇلدەگەرى. ال روزانىڭ ءوزى بولسا, ماڭعىستاۋ مادەنيەتىنىڭ دامۋىنا ءوز ۇلەسىن قوسۋمەن كەلەدى – ءوز ارىپتەستەرىمەن بىرگە وڭىردەگى «اقجارما» ءانسامبلى مەن ا.تاراق ۇلى اتىنداعى ۇلت-اسپاپتار وركەسترىنىڭ, ماڭعىستاۋ ونەر كوللەدجىنىڭ نەگىزىن قالاۋشىلاردىڭ ءبىرى بولعان ول وسى ۇجىمنىڭ ساپىنان ءالى قالعان جوق. شەتەلدەرگە گاسترولدىك ساپارلارعا شىعىپ, قازاقتىڭ حاس ونەرىن تانىتۋدان تانبايتىن ر.ايدارباەۆانىڭ 40 جاسىندا 3 ساعاتتا 70 كۇي ورىنداپ بەرىپ, رەپەرتۋارىمدا 400 كۇي بار دەگەنى بۇگىندە ەل اراسىندا اڭىزداي ايتىلادى.
بۇعان دەيىن قىز-كەلىنشەك كۇيشىلەردى ەسكە الۋ باعىتىندا ۇيىمداستىرىلىپ كەلگەن بايقاۋ بيىل ماڭعىستاۋدا جاڭاشا جارقىرادى. ەلىنىڭ ىقىلاسىنا مەرەيلەنگەن روزا كۇيشى قازىلاردى باسقارىپ, ءىزباسار سىڭلىلەرىنىڭ شەبەرلىگىن باعالاپ توردە وتىردى. رەسپۋبليكانىڭ استانا, الماتى, سەمەي, ورال, قاراعاندى, اتىراۋ, اقتوبە, قىزىلوردا, ماڭعىستاۋ وڭىرلەرىنەن جينالعان 22 قىز ەكى كۇن بويى كۇي دوداسىن دۇبىرلەتتى. شارت تا وڭاي ەمەس, كەز كەلگەن كۇيشىنىڭ تاۋەكەلى جەتە بەرمەيتىن ابىلدىڭ «ابىلىن», دينانىڭ «بايجۇماسىن», وسكىنبايدىڭ «بۇلبۇل اقجەلەڭى» مەن جانتورەنىڭ «شالقىماسىن», سونداي-اق روزا مەن ونىڭ اكەسى تايماننىڭ كۇيلەرىن ورىنداۋ مىندەتتىلىگىمەن بىرگە, وركەستردىڭ دەمەۋىمەن ن.تىلەنديەۆتىڭ, ا.جايىموۆتىڭ, ماحامبەتتىڭ كۇيلەرىن ورىنداۋ تالاپ ەتىلدى. ەكى كۇن بويى كۇي سۇيەر كورەرمەندەرگە اسەرلى كەش سىيلاعان بايقاۋدا ءۇشىنشى ورىندى الماتىلىق ت.قىدىرسيحوۆا مەن اقتاۋلىق د.پەردەبەكوۆا, استانالىق ت.ۇمبەت يەلەنسە, ەكىنشى ورىندى اتىراۋلىق ن.زينور ءوزىنىڭ الماتىلىق قۇربىسى س.ابدۋاحاپپەن ءبولىستى. ال تەڭ دارەجەدە ونەر كورسەتكەن الماتىلىق ءا.بەكەنوۆا مەن اتىراۋلىق ا.ساكۋپوۆا ءبىرىنشى ورىندى يەلەنسە, باس جۇلدەنى الماتىدان كەلگەن كۇيشى ن.بازارباەۆا جەڭىپ الدى. وزگە كۇيشى قىزدارعا تايمان ايدارباەۆ اتىنداعى ارنايى جۇلدە مەن ىنتالاندىرۋ سىيلىقتارى تابىس ەتىلدى.
– «رۋحاني جاڭعىرۋ» باعدارلاماسى اياسىندا كۇيشى قىز-كەلىنشەكتەردىڭ بايقاۋىن وتكىزگەن ايماق جانە سالا باسشىلىعىنا العىس ايتامىن. بۇل – كۇيگە قۇرمەت, جاستارعا قولداۋ, دەسە كەش سوڭىندا روزا ايدارباەۆا, «تاعىلىمى كوپ ماعىنالى كەش ءداستۇرلى قالىپقا تۇسسە» دەيدى كورەرمەندەر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
