ەلباسى ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا: «اجەپتاۋىر جاڭعىرعان قوعامنىڭ ءوزىنىڭ تامىرى تاريحتىڭ تەرەڭىنەن باستاۋ الاتىن رۋحاني كودى بولادى. جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ», دەپ اتاپ كورسەتتى.
بۇل رەتتە باتىر بابالارىمىزدىڭ بيىك رۋحى حالىق, اسىرەسە جاس ۇرپاق اراسىندا پاتريوتتىق ورلەۋ تۋعىزىپ, ۇلت تاريحىنا, وتانعا دەگەن ماقتانىش سەزىمىن ۇيالاتۋدا. سونداي ۇلتىن ۇلىق تۇتاتىن, بولمىسى باتىرلىقپەن بىتە قابىسقان تۇلعالارىمىزدىڭ ءبىرى – قاسىم قايسەنوۆ.
ۇلى وتان سوعىسىندا تەڭدەسسىز ەرلىك كورسەتكەن تۇلعا, قازاقستاننىڭ حالىق قاھارمانى قاسىم قايسەنوۆ كەڭەس وداعىنىڭ باتىرى اتاعىنا لايىق ەدى جانە سوعان ۇسىنىلعان. 1943 جىلى قىركۇيەكتە دنەپردىڭ وڭ جاعالاۋى ءۇشىن بولعان شايقاستا ول ەرەن ەرلىك جاسادى, ارقىراعان ارىندى وزەننەن ءوزىنىڭ پارتيزان وتريادىمەن ءبىرىنشى بولىپ ءوتىپ, جاۋ تىلىنداعى گريگورەۆكا, لۋكوۆيتسى, زارۋبينتسى حۋتورلارىن تارتىپ الىپ, قىزىل ارميانىڭ نەگىزگى كۇشتەرى كەلگەنشە بەرىسپەي, ۇستاپ تۇردى. الايدا سول قىرعىندا اۋىر جاراقات الىپ, ارتىنشا دنەپردەن ءبىرىنشى بولىپ وتكەندەگى, بۋكرين پلاتسدارمىن دايىنداۋداعى ەرلىگى ۇمىت قالدى دا, ەڭ جوعارعى اتاق-دارەجەلەر وزگەلەردىڭ قانجىعاسىندا كەتكەن. ونىڭ قۇجاتى اراعا ۋاقىت سالىپ, پارتيزان شتابىنىڭ ارحيۆىنەن تابىلعان. ال ق.قايسەنوۆتىڭ قاراماعىنداعى 13 جاۋىنگەرى كەڭەس وداعىنىڭ باتىرى اتاعىن العان.
1995 جىلعى 9 مامىردا ەلباسى ن.نازارباەۆ ءوزىنىڭ جارلىعىمەن قاسىم قايسەنوۆكە ەلىمىزدىڭ ەڭ جوعارعى ناگراداسى – «حالىق قاھارمانى» اتاعىن تاپسىردى. بيىل – قاسىم اعامىزدىڭ 100 جىلدىق مەرەيتويى. قاسىم قايسەنوۆتەي قاھارمانىمىزعا قانشا ماراپات كورسەتسەك تە, كوپتىك ەتپەيدى. جوعارىدا ايتىلعاندى ەسكەرە وتىرىپ, ءبىز پرەمەر-مينيستر ب.ساعىنتاەۆتان زايسان شەكارا وتريادىنىڭ 2017 اسكەري بولىمىنە قاراستى شەكارا زاستاۆاسىن «قاسىم قايسەنوۆ اتىنداعى شەكارا زاستاۆاسى» دەپ قايتا اتاۋ مۇمكىندىگىن قاراستىرۋدى سۇرادىق.
شىعىس قازاقستانداعى شەكارالىق زاستاۆاعا تەك وسى ءوڭىردىڭ عانا ەمەس, بۇكىل ەلىمىزدىڭ ماقتانىشى سانالاتىن باتىر قاسىم قايسەنوۆتىڭ ەسىمىنىڭ بەرىلۋى الدا كەلە جاتقان جەڭىستىڭ 75 جىلدىعىنا ۇلكەن تارتۋ بولار ەدى. جانە بۇل ەلدىڭ شەتىندە, جەلدىڭ وتىندە ءجۇرىپ, قازاقستانداعى بەيبىتشىلىك پەن تۇراقتىلىقتى, بال بوبەكتەردىڭ تىنىش ۇيقىسى مەن كۇمىس كۇلكىسىن قورعاعان ساردارلارىمىز بەن ساربازدارىمىزدىڭ رۋحىن كوتەرىپ, جۇرەكتەرىنە ماقتانىش سەزىمىن ۇيالاتارى ءسوزسىز.
باقىتبەك سماعۇل,
ءماجىلىس دەپۋتات
