- 2017 جىلدىڭ شىلدەسىندە تەحنيكالىق جانە قىزمەت كورسەتۋ ماماندىقتارىنا كاسىپتىك دايارلاۋ, قايتا دايارلاۋ جانە بىلىكتىلىگىن ارتتىرۋ ءۇشىن وقۋ ورتالىقتارى ءتىزىلىمىن قالىپتاستىرۋ مەن جۇرگىزۋ ءتارتىبى تۋرالى ەرەجە دايىندالدى. وقۋ ورتالىقتارىنىڭ ءتىزىلىمىن قالىپتاستىرۋ مەن قولداۋدىڭ ماقساتى - وقۋ ورتالىقتارىنىڭ بىرىڭعاي دەرەكقورىن قۇرۋ. وندا قىسقا مەرزىمدى كۋرستاردى وتكىزۋگە قىزىعۋشىلىق تانىتقان وقۋ ورتالىقتارى تىركەۋگە قويىلاتىن تالاپتار بار, دەدى وڭىرلىك كاسىپكەرلەر پالاتاسىنىڭ ديرەكتورى نۇربەك قاراساەۆ.
باسقوسۋدا كاسىپورىنداردىڭ كەيبىرى وزدەرىنىڭ مەكەمەلەرىندە وقۋ -ورتالىقتارىن اشۋعا دايىن ەكەندىكتەرىن ءبىلدىردى. سونداي-اق, قازىرگى تاڭدا ناقتى ماماندىق بويىنشا قىسقا مەرزىمدى كۋرستاردىڭ وقۋ قۇنىن انىقتاۋ ءۇشىن ادىستەمە ازىرلەنەتىن بولدى.
ۇلتتىق كاسىپكەرلەر پالاتاسى مۇنداي ادىستەمەنى ازىرلەۋ ءۇشىن قاجەتتى العاشقى دەرەكتەردى جينايدى.ماڭعىستاۋ وبلىسىندا 26 تەحنيكالىق جانە كاسىپتىك ءبىلىم بەرۋ ۇيىمدارى جۇمىس ىستەيدى. ولاردىڭ 15-ءى مەملەكەتتىك, ال 11-ءى جەكەمەنشىك.
ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى اسەت شوپانوۆتىڭ ايتۋىنشا, رەسۋرستىق ورتالىقتا «ناتيجەلى جۇمىسپەن قامتۋ جانە جاپپاي كəسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسى بويىنشا- 287 كۋرسانت, «جول كارتاسى» جانە «جۇمىسپەن قامتۋ» باعدارلامالارىمەن -56, قالالىق جۇمىسپەن قامتۋ ورتالىعىنىڭ كەپىلحاتىمەن- 17, مەكەمەلەردىڭ كەلىسىمشارتى مەن جەكە تۇلعالار وتىنىشىمەن- 1018 كۋرسانت, بارلىعى – 1710 ادام وقىپ شىقتى. ماڭعىستاۋداعى ەكى كوللەدجدە ءموبيلدى وقىتۋ ورتالىعى ساتىپ الىندى. ءجۇرىپ-تۇرۋعا ىڭعايلى, مودۋلدەر ءبىر-بىرىمەن بايلانىستى, ماشيناعا ءبىر تىزبەكتە ورنالاسقاندىقتان ءبىر مەزەتتە 3 ماماندىق بويىنشا وقىتۋعا بولادى.
وبلىستىڭ بارلىق كوللەدجدەرى كوپ ءپروفيلدى ەكەنىن ەسكەرە وتىرىپ, تاجىريبەلى كاسىپورىنداردا وقۋ ورتالىقتارىن اشۋعا جانە وسى ورتالىقتاردا وقىتۋ جۇرگىزۋگە ۇلكەن باسىمدىق بەرىلەدى.
قازىر كوللەدجدەردە قىسقا مەرزىمدى كۋرستارعا ارنالعان 11 رەسۋرستىق جانە جاڭا ۇلگىدەگى 2 موبيلدىك وقۋ ورتالىقتارى جۇمىس ىستەيدى. ولار شالعاي ەلدى مەكەندە تۇراتىن ازاماتتاردى قىسقا مەرزىمدى وقىتۋمەن قامتاماسىز ەتەدى.
2017 جىلدىڭ جەلتوقسانىندا «ناتيجەلى جۇمىسپەن قامتۋ جانە جاپپاي كəسىپكەرلىكتى دامىتۋ» باعدارلاماسىنىڭ ءبىرىنشى باعىتى «ەڭبەك نارىعىندا سۇرانىسقا يە كاسىپتەر مەن داعدىلار بويىنشا جۇمىسشى كادرلاردى قىسقا مەرزىمدى كاسىپتىك وقۋ» بويىنشا ەنگىزىلگەن وزگەرىستەر مەن تولىقتىرۋلاردى وقۋ ورتالىقتارى مەن كəسىپورىندار نازارعا الىپ, تىزىلىمگە كىرۋگە دايىن بولادى دەگەن پايىم جاسالدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
