ءبىلىم مەن تاربيە وشاقتارىنداعى ارنايى ولكەتانۋ ۇيىرمەلەرىمەن وتىرار مەملەكەتتىك ارحەولوگيالىق قورىق-مۋزەيىنىڭ عىلىمي قىزمەتكەرلەرى تىعىز بايلانىس ورناتقان. جاقىندا وسى مۋزەيدە مەملەكەت باسشىسى ن.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىنىڭ ارتۋى» اتتى قازاقستان حالقىنا ارنالعان جولداۋىندا ء«وز جەرىڭدى تانىپ ءبىل!» جاڭا باستاماسى اياسىندا ەلىمىزدىڭ وڭىرلەرى بويىنشا جاپپاي مەكتەپ ءتۋريزمىن قايتا جاڭعىرتۋ كەرەك» دەگەن وي-پىكىرىنە قولداۋ بىلدىرگەن جيىن ءوتتى.
مەكتەپ ءتۋريزمىن جانداندىرۋ وقۋشىلارىمىزدى تاريحي جارىگەرلەرگە باي مۇرالارىمىزبەن تانىستىرۋدان باستالاتىنى تالقىلانعان جيىنعا زيالى قاۋىم, ءبىلىم بەرۋ مەكەمەلەرىنىڭ وكىلدەرى مەن مۋزەي قىزمەتكەرلەرى قاتىستى. قورىق-مۋزەي باسشىسى ايبەك جاندوسوۆ پەن «نۇر وتان» پارتياسى وتىرار اۋداندىق فيليالى توراعاسىنىڭ ءبىرىنشى ورىنباسارى اباي قۇرمان بۇل جولعى جولداۋدىڭ ەرەكشەلىكتەرىنە توقتالىپ, حالىقتىڭ تابىسىن ارتتىرۋعا, الەۋمەتتىك جاعدايىن جاقسارتۋعا باعىتتالعانىن باياندادى. ارداگەر نۇرتازا الدابەرگەنوۆ جولداۋدى ناسيحاتتاۋ مەن وعان ۇلەس قوسۋ ءار ازاماتتىڭ مىندەتى ەكەنىن العا تارتىپ جۇرتتى جۇمىلا جۇمىس ىستەۋگە شاقىردى. «رۋحىمىزدى جىگەرلەندىرگەن جولداۋ» تاقىبىرىندا بايانداما جاساعان وتىرار مۋزەيىنىڭ ءبولىم مەڭگەرۋشىسى دوسحان جۇماحان ۇلى وقۋشىلاردى تاريحي جادىگەرلەرگە تولى باي مۇرامەن كەڭىنەن تانىستىرۋعا باعىتتالعان ۇجىمنىڭ جۇمىس جوسپارىمەن ءبولىستى.
– ەلباسى جولداۋىندا ءتۋرزيمدى دامىتۋعا ايرىقشا كوڭىل بولىنگەن. وسى ماقساتتا ءتۋريزمدى دامىتۋ جونىندە باعدارلاما ازىرلەنىپ جاتىر. جىل سوڭىنا دەيىن تۋريزم تۋرالى زاڭعا وزگەرىستەر ەنگىزىمەكشى. سوعان ساي وتىرار مۋزەيىنىڭ ەكسپوزيتسياسى قايتا جاساقتالىپ جاڭعىرتىلدى. اۋدان اكىمى ەرلان ايتاحانوۆتىڭ ۇسىنىسىمەن, مينيسترلىكتىڭ قولداۋىمەن ۇلى جىبەك جولى بويىنداعى تاريحي ورىنداردى شەتەلدىك تۋريستەرگە كەڭىنەن ناسيحاتتاۋ ماقساتىندا وتىرار قالا جۇرتىندا ساپار ورتالىعى سالىنباقشى.
ونىڭ بازاسىندا مادەني اقپاراتتىق جانە شىعارماشىلىق يننوۆاتسيالار ورتالىعى جۇمىس ىستەيتىن بولادى. مۋزەي فۋنكتسيالارىن مادەني اعارتۋ دەڭگەيىنە جەتكىزىپ, تاريح عىلىمى, ارحەولوگيا, رەستاۆراتسيا, ونەرتانۋمەن ۇشتاستىرۋعا جاعداي جاسالادى. ارحەولوگتارعا ارنالعان قوناق ۇيلەر, زاماناۋي تەحنولوگيالارمەن جابدىقتالعان بولمەلەر, ەكسپوزيتسيا زالدارى سالىنادى.
وسىناۋ وڭ قادامدار ارقىلى ەلباسىنىڭ ء«وز جەرىڭدى تانىپ ءبىل!» اتتى باستاماسىن باعدارشام ەتىپ مەكتەپ ءتۋريزمىن قايتا جاڭعىرتۋعا كۇش سالاتىن بولامىز, – دەيدى ءبولىم مەڭگەرۋشىسى د. جۇماحان ۇلى.
عالىمجان ەلشىباي,
«ەگەمەن قازاقستان»
