اعىمداعى جىلدىڭ ءبىرىنشى جارتىجىلدىعىنىڭ قورىتىندىسى بويىنشا ماڭعىستاۋ وبلىسى مەن يران اراسىنداعى جالپى تاۋاراينالىمى 27,2 ملن. اقش دوللارىن, ونىڭ ىشىندە ەكسپورت – 4 ملن. اقش دولل., يمپورت – 23,2 ملن.اقش دوللارىن قۇراپ وتىر. ماڭعىستاۋ ءوڭىرى يرانعا: 4 ملن. اقش دوللار كولەمىندە استىق پەن جارمالار, تەمەكى بۇيىمدارى, قۇرىلىس ماتەريالدارى, بولات جانە باسقا دا تاۋارلاردى ەكسپورتتايدى. يراننان ماڭعىستاۋ وبلىسىنا: كوكونىستەر, جەمىس-جيدەكتەر, اعاشتار, سپورتتىق قۇرال-سايماندار, جيھازدار جانە باسقا دا تاۋارلار يمپورتتالادى.
يراندىق دەلەگاتسيا اقشۇقىر اۋىلىنداعى بالىق زاۋىتىندا بولىپ, قۇرىق پورتىن ارالاپ, ستراتەگيالىق ماڭىزى زور نىساننىڭ مۇمكىندىگىمەن تانىستى. قۇرىق پورتى - ەلىمىز ءۇشىن عانا ەمەس, كوپتەگەن ەلدەر ءۇشىن دە ترانسكاسپي حالىقارالىق ءدالىزىنىڭ جانە كولىك-لوگيستيكالىق جۇيەسىنىڭ ەڭ نەگىزگى نۇكتەسى.
ماڭعىستاۋ وبلىسى مەن گۋلستان پروۆينتسياسى اراسىنداعى ساۋدا-ەكونوميكالىق بايلانىستاردى دامىتۋ ماقساتىندا بيزنەس-فورۋم ءوتتى. وندا ماڭعىستاۋ وبلىسىنىڭ اكىمدىگى مەن گۇلستان پروۆينتسياسى اراسىندا, سونداي-اق «اتامەكەن» وڭىرلىك كاسىپكەرلەر پالاتاسى مەن گۇلستان وبلىسىنىڭ ساۋدا-ونەركاسىپتىك پالاتاسى اراسىندا ءوزارا تۇسىنىستىك پەن ىنتىماقتاستىق تۋرالى ەكى مەموراندۋمعا قول قويىلدى.
- ەلباسى نۇرسۇلتان نازارباۆ ەكونوميكانى ءارتاراپتاندىرۋ, شيكىزاتتىق ەمەس سەكتورعا تىكەلەي ينۆەستيتسيالار تارتۋ مىندەتىن تىكەلەي جۇكتەدى. ارنايى ەكونوميكالىق ايماقتار ەكونوميكانى ءارتاراپتاندىرۋدىڭ ءتيىمدى جانە پارمەندى قۇرالى بولىپ تابىلادى. بۇگىنگى «اقتاۋ تەڭىز پورتى»ارنايى ەكونوميكالىق ايماعىندا 500 ملن. اقش دوللار سوماسىندا 27 ينۆەستيتسيالىق جوبا ىسكە اسىرىلۋدا. ءبىزدىڭ ءوڭىردىڭ كليماتتىق جاعدايى, ەلەكتر ەنەرگياسىنىڭ قوسىمشا رەسۋرسى ءۇشىن كۇن جانە جەل ەلەكتر ستانتسيالارىن سالۋعا مۇمكىندىك بەرەدى. سوندىقتان بالامالى ەنەرگيا كوزدەرىن دامىتۋ ماڭىزدى سەكتور. اگروونەركاسىپ كەشەنىنە ينۆەستيتسيا سالۋ ءۇشىن, اتاپ ايتقاندا جىلىجاي شارۋاشىلىقتارىن دامىتۋدا مول مۇمكىندىكتەر بار. ماڭعىستاۋ ءوڭىرىنىڭ گەوگرافيالىق جاعىنان قولايلى ورنالاسۋى, باي تاريحي مۇراسى, كورىكتى جەرلەرى, تەڭىز ايدىنى, ۇزاق جاعاجاي ماۋسىمى - تۋريستىك اعىندى مولايتىپ ەكى ەل ءتۋريزمىنىڭ دامۋىنا مۇمكىندىك مول, دەدى ماڭعىستاۋ وبلىسىنىڭ اكىمى ە.توعجانوۆ.
شارا بارىسىندا ەكى ەلدىڭ كاسىپكەر وكىلى جانە باسقا دا مەكەمەلەردىڭ ماماندارى كەلىسسوزدەر جۇرگىزدى. تەمىرجول, اۋە جانە اۆتوكولىك قاتىناستارى بويىنشا ءوزارا ءىس-قيمىلداردى جولعا قويۋ, ماڭعىستاۋ مەن گۇلستاندا ءوزارا ساۋدا ۇيلەرىن اشۋ, ينچەبۇرىن ت/ج بەكەتى اۋماعىندا ەلەۆاتور سالۋ, ينچەبۇرىن ازات ەكونوميكالىق ايماعىن اشۋ, سونداي-اق گۇلستانعا استىقتى ۋاقىتشا كىرگىزىپ وڭدەپ, ءۇشىنشى ەلگە ساتۋ, ءداندى داقىلدار, سونىڭ ىشىندە كۇرىش ەگۋ ماسەلەلەرى قارالىپ, ءبىلىم, مەديتسينا جانە تۋريزم سالالارىنداعى ىنتىماقتاستىقتىڭ جاي-كۇيى تالقىلاندى. سونداي-اق, ەگىن, مال جانە قۇس شارۋاشىلىعى, تاماق ونەركاسىبى, ينجەنەرلىك-تەحنيكالىق قىزمەتتەر, قۇرىلىس ونەركاسىبى, بيداي, وسىمدىك مايلارىن ءوندىرۋ-ساتۋ, تەحنيكا, اعاش ونەركاسىبى, بۋىپ-ءتۇيۋ ونەركاسىبى, كەن, فارماتسەۆتيكا, حيميالىق زاتتار, تابيعات ءتۋريزمى مەن ەمدىك تۋريزم سالاسى تالقىلاندى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
