بايقاۋدا 17-55 جاس ارالىعىنداعى ەلىمىزدىڭ استانا, الماتى, اقتوبە, جامبىل, قاراعاندى, قوستاناي, ورال, شىمەنت جانە قىزىلوردا وڭىرلەرىنەن بارلىعى 16 ۇمىتكەر قاتىستى.
«بايقاۋدىڭ باستى ماقساتى- ۇلتتىق ونەردىڭ دامۋىنا, ناسيحاتتالۋىنا جانە قوبىزشىلاردىڭ شىعارماشىلىعىنا قولداۋ كورسەتۋ»,- دەدى قر مادەنيەت قايراتكەرى, قازىلار القاسىنىڭ مۇشەسى مارا سارسەنبايقىزى.
بايقاۋ ەكى نوميناتسيا بويىنشا ءوتتى: جىر(ەپوس) ورىنداۋ جانە قوبىز بەن قىلقوبىزدا ويناۋ. ءار وڭىردەن كەلگەن قىلقوبىزشىلار قورقىت كۇيلەرىن ناسيحاتتاسا, قوبىزبەن سۇيەمەلدەپ جىر ايتۋشىلار قوجا احمەت ءياسساۋيدىڭ حيكمەتتەرىنەن جانە تونىكوك, كۇلتەگىن, وعىزناما, قورقىت داۋىرىندەگى كونە جىر ۇلگىلەرىنەن ۇزىندىلەر ورىندايدى.
بايقاۋدىڭ باس جۇلدەسىن استانادان كەلگەن شولپان شاراپاتوۆا يەلەندى. ال, ءبىرىنشى ورىندى قىزىلوردالىق اينۋزا بەگىمسالوۆا جانە الماتىلىق اياتوللا تۇرعانوۆ, ەكىنشى ورىندى الماتى قالاسىنان كەلگەن اسەل قىدىرمۇرات پەن ورالدىق ءمولدىر جالمۇحانبەتوۆ ءبولىستى. قىزىلوردالىق ايدانا رۇستەمبەك پەن شىمكەنت قالاسىنان قاتىسقان اناربەك مىرزاباي بايقاۋدىڭ ءۇشىنشى ورنىن الدى. ال, قوبىزبەن سۇيەمەلدەپ جىر (ەپوس) ورىنداۋ بويىنشا ءۇشىنشى ورىن - قاراعاندىلىق الىبەك بيمەندينگە, ەكىنشى ورىن - قوستانايلىق قىدىربەك قيىسحان مەن الماتىلىق قازبەك ادىكەيگە, ءبىرىنشى ورىن - قىزىلوردالىق مارات سۇگىربايعا تابىستالدى.
سونىمەن قاتار, قىزىلوردا وبلىسىندا ءۇش جىلدا ءبىر الىس-جاقىن تۇركىتىلدەس ەلدەردىڭ ونەرپازدارىنىڭ قاتىسۋىمەن «قورقىت جانە ۇلى دالا سازى» اتتى ءداستۇرلى حالىقارالىق مۋزىكالىق فولكلورلىق فەستيۆالى وتەدى. مىسالى, 2017 جىلى 27-30 قىركۇيەك ارالىعىندا ۇلىبريتانيا, تۇركيا, بەلارۋسيا, ءازىربايجان, قىرعىزستان, وزبەكستان, مونعوليا جانە قازاقستاننان 80-گە جۋىق ورىنداۋشى مەن عالىم-فولكلورشىلاردىڭ قاتىسۋمەن فەستيۆال ءوتتى.
