قالالىق ىشكى ىستەر باسقارماسى جەرگىلىكتى پوليتسياسىنىڭ اعا ينسپەكتورى, اكتسيانى ۇيىمداستىرۋشى ەلەنا ماعازۋموۆانىڭ ايتۋىنشا, قازىرگى زاماندا كوشە-جول جەلىسىنىڭ قۇرالدارى زاعيپ جانداردىڭ جول قاۋىپسىزدىگىنىڭ ماڭىزدى قۇرامداس بولىگى بولىپ تابىلادى. قوستاناي قالاسىنداعى 242 بۇرىلىستىڭ تەك 167-دە «زاعيپ جۇرگىنشى» اقپاراتى بار قۇرال ورناتىلعان. 12 باعدارشامدا عانا دىبىستى سيگنال جابدىعى بار.
«ستاتيستيكا بويىنشا, جاياۋ جۇرگىنشىلەر جول قوزعالىسىنىڭ ەڭ ءالسىز, ۇرىمتال قاتىسۋشىسى بولىپ تابىلادى. ال زاعيپ جاندار جول قوزعالىسى اعىنىندا اسا قامقورلىققا ءزارۋ. ءوزىن قاۋىپسىزدەندىرۋ ءۇشىن زاعيپ جاندار قولىنا اق تاياق ۇستاپ جۇرەدى, ولار جۇرگىزۋشىلەرگە «الدىڭدا زاعيپ جان كەلە جاتىر, وتكىزىپ جىبەر» دەگەن بەلگىنى بىلدىرەتىن جول بەلگىسىنىڭ ورنىنا جۇرەدى», دەيدى پوليتسيا مايورى ەلەنا ماعازۋموۆا .
كەزدەسۋدە زاعيپ جاندار جۇرگىزۋشىلەردىڭ بارلىعى بىردەي مۇگەدەك جانداردىڭ قولىنداعى اق تاياققا ءمان بەرە بەرمەيتىنىن, توقتامايتىنىن ايتتى. كوزىنەن زارداپ شەگەتىن مۇگەدەكتەر جول قوزعالىسىندا ەرەكشە نازارعا الىنۋى ءتيىس. ەلەنا ماعازۋموۆا زاعيپ جاندارعا اق تاياعىن كوتەرىپ, جولدىڭ كەز كەلگەن جەرىنەن وتۋىنە قۇقى بار ەكەنىن ايتتى.
وتكەن جىلدان بەرى قوستاناي قالاسىندا جۇرگىنشىلەر جولىندا زاعيپ جاندار باسقاندا جول قوزعالىسىنىڭ باعىتىن سەزىنە الاتىن پليتكالار توسەلدى. سارى ءتۇستى زاعيپتار باسقا تۇسكە قاراعاندا جەڭىل ايىرا الادى. كەزدەسۋدە پوليتسەيلەر زاعيپ جاندارعا تۇندە جۇرگەندە جول ەرەجەسىنە كومەك بەرەتىن ارنايى جارقىل بەرەتىن لەنتا تاراتتى.
ءنازيرا جارىمبەت,
«ەگەمەن قازاقستان»
قوستاناي
