سۋرەتتى تۇسىرگەن ناتاليا گوروحوۆا
باتىس قازاقستان وبلىسىندا تۇڭعىش اشىلىپ وتىرعان ورتالىققا ءوڭىر باسشىسى التاي كولگىنوۆ ارنايى كەلدى. جوو رەكتورى اسقار نامەتوۆ بيىل اشىلعانىنا 55 جىلدىعىن اتاپ وتكەن ىرگەلى ءبىلىم ورداسىندا قولعا الىنعان «SMART ۋنيۆەرسيتەت» جوباسى تۋرالى اڭگىمەلەدى.
- وسى ورتالىقتىڭ ارقاسىندا ءبىز ۋنيۆەرسيتەتتەگى «Smart university» جوبامىزدى باستاپ وتىرمىز. بۇل ورتالىقتا ستۋدەنتتەرگە دە, وقىتۋشىلارعا دا اۆتوماتتى قىزمەت ۇلگىسىن كورسەتەدى. بۇل باعىتتاعى جۇمىستارىمىز جالعاسا بەرەدى, - دەدى اسقار نامەتوۆ.
- ەلباسىمىز كەلەسى جىلدى «جاستار جىلى» دەپ اتادى. جاستارعا ەڭ باستى قولداۋ – مەملەكەتىمىزدىڭ ءبىلىم الۋعا, كاسىپ ۇيرەنۋگە بارلىق مۇمكىندىكتى جاساۋى. پرەزيدەنتىمىز تاۋەلسىزدىكتىڭ العاشقى جىلدارىنان-اق بىلىمگە ەرەكشە كوڭىل ءبولدى. «بولاشاق» باعدارلاماسى پايدا بولدى, «نازارباەۆ» ۋنيۆەرسيتەتى اشىلدى, زياتكەرلىك مەكتەپتەر اشىلدى, ليتسەيلەر اشىلدى. ولار قۇرال-جابدىقپەن قامتاماسىز ەتىلىپ, قانشاما گرانت ءبولىنىپ جاتىر. بەس الەۋمەتتىك باستاما بويىنشا بيىل تاعى دا قوسىمشا گرانت ءبولىندى. ول گرانتتىڭ يەگەرلەرى ءبىزدىڭ وڭىردە دە, وسى ۋنيۆەرسيتەتتە دە بار. مەملەكەت جىل سايىن جاستارعا جاڭا كەڭىستىك اشىپ وتىر. ەڭ باستى كوزدەگەن ماقسات – ساپالى ءبىلىم, ءبىز الدىڭعى قاتارلى مەملەكەتتەردىڭ تىزىمىنە ەنگىمىز كەلسە, وعان تەك قانا ءبىلىم كەرەك! باسقا جول جوق! سوندىقتان بۇگىن اشىلعان ستۋدەنتتەرگە قىزمەت كورسەتۋ ورتالىعى دا ءبىلىم ساپاسىن ارتتىرۋعا سەپ بولادى دەپ ويلايمىز, - دەدى التاي كولگىنوۆ ورتالىقتىڭ اشىلۋ سالتاناتى كەزىندە.
ستۋدەنتتەرگە قىزمەت كورسەتۋ ورتالىعىنىڭ لەنتاسىن «رۋحاني جاڭعىرۋ» ورتالىعىنىڭ پروفەسسورى, فيلوسوفيا عىلىمدارىنىڭ دوكتورى تىلەكجان رىسقاليەۆ پەن ماشينا جاساۋ فاكۋلتەتىنىڭ 4 كۋرس ستۋدەنتى, قازاقستان رەسپۋبليكاسى پرەزيدەنتى اتىنداعى شاكىرتاقى يەگەرى, جوو اراسىندا وتكىزىلگەن «ۇزدىك ستۋدەنت-2018» بايقاۋىنىڭ جەڭىمپازى گۇلنۇر تىلەپبەرگەن قيدى. ورتالىق قىزمەتىن تۇڭعىش پايدالانعانداردىڭ ءبىرى ماشينا جاساۋ فاكۋلتەتىنىڭ 4 كۋرس ستۋدەنتى مۋسا كونەەۆ بولدى.
- بۇرىن ءدال وسى ترانسكريپتى الۋ ءۇشىن ءبىر اپتا ۋاقىتىمىز كەتەتىن. بۇگىن, مىنە, بەس-اق مينۋت جۇمسادىم, - دەيدى مۋسا. - ۋاقىتتى ءتيىمدى پايدالاناتىن بولدىق. بۇل جەردەن ۇنەمدەلگەن ۋاقىتتى ءبىلىم الۋعا, باسقا دا پايدالى ىسكە جۇمسايمىز.
ستۋدەنتتەرگە قىزمەت كورسەتۋ ورتالىعىنىڭ جۇمىسىمەن تانىسىپ شىققان التاي كولگىنوۆ جاڭگىر حان اتىنداعى بقاتۋ-ءدىڭ 1 كۋرس ستۋدەنتتەرى الدىندا «بىلىمگە تالپىنىس – جەتىستىكتىڭ نەگىزگى كىلتى» تاقىرىبىندا قوعامدىق ءدارىس وتكىزدى.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
