قارجى رەگۋلياتورى حالىقتىڭ قۇقىقتارى مەن زاڭدى مۇددەلەرىن بۇزۋ بويىنشا 2018 جىلدىڭ ءۇشىنشى توقسانىندا ەكىنشى دەڭگەيلى بانكتەردىڭ جانە بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمداردىڭ جۇمىسىنا تالداۋ جۇرگىزگەن. «تەكسەرۋ بارىسىندا انىقتالعان بۇزۋشىلىقتاردىڭ قورىتىندىسى بويىنشا ەكىنشى دەڭگەيلى بانكتەرگە قاتىستى 71 سانكتسيا جانە شەكتەۋ شاراسى قولدانىلدى. ونىڭ ىشىندە, ايىپپۇلدار سالۋ جانە ءوندىرىپ الۋ تۇرىندە 28 سانكتسيا, جازباشا ۇيعارىم تۇرىندەگى 43 شەكتەۋ شاراسى قابىلداندى», - دەلىنگەن حابارلامادا. ۇلتتىق بانك ەڭ كوپ بۇزۋشىلىققا جول بەرگەن 6 بانكتى اتادى.
«ليتسەنزيالارى كەرى قايتارىلعان بانكتەردەن («Qazaq Banki» اق, «استانا بانكى» اق) بولەك, قارجىلىق قىزمەتتەردى تۇتىنۋشىلاردىڭ وتىنىشتەرى مەن شاعىمدارىن قاراۋ ناتيجەلەرى بويىنشا مىناداي بانكتەر ەڭ كوپ بۇزۋشىلىققا جول بەرگەن. ولار: «كازكوممەرتسبانك» اق, «ForteBank» اق, «حوۋم كرەديت بانكى» اق ەب, سونداي-اق «الفا-بانك» اق ەب, «اتف بانك» اق, «سبەربانك روسسي» اق ەب», - دەپ حابارلادى ۆەدومستۆونىڭ ءباسپاسوز قىزمەتىنەن. اتاپ وتىلگەندەي, بانكتەر كوپ جاعدايدا قر بانكتىك زاڭناماسىندا, سونداي-اق ۇلتتىق بانكتىڭ نورماتيۆتەرىندە بەلگىلەنگەن تالاپتاردى ساقتاماعان. ناقتىراق ايتقاندا, بانكتىك قارىزدارعا قىزمەت كورسەتۋدە, تولەمدەر مەن اقشا اۋدارىمدارىن جاساۋدا, بانك شوتتارى بويىنشا قىزمەت كورسەتۋدە قۇقىقتار بۇزىلعان. بۇعان قوسا, تەكسەرۋ ناتيجەسى تۇتىنۋشىلاردىڭ مۇددەسىن قورعاۋ ماسەلەلەرى بويىنشا بانكتەردىڭ تالاپتاردى ەسكەرە بەرمەيتىنىن كورسەتىپ وتىر. «بانك قارىزى بويىنشا قىزمەت كورسەتۋ تارتىبىندە كەلەسى كەمشىلىكتەر انىقتالعان. ناقتىراق ايتقاندا, قارىز الۋشىعا بەرەشەك مەرزىمىنىڭ ءوتىپ كەتكەنى تۋرالى حابارلاماۋ, نەسيە بەرەشەگىنىڭ بارى تۋرالى انىقتامانىڭ بەرىلگەنى ءۇشىن كوميسسيانى زاڭسىز الۋ, قارىز سوماسىن قايتارۋ بويىنشا مىندەتتەمەلەردى ورىنداماعانى ءۇشىن تۇراقسىزدىق ايىبى (ايىپپۇل, ءوسىمپۇل) مولشەرىن ارتتىرۋ, كرەديتتىك بيۋروعا قارىز الۋشى جونىندە دايەكسىز مالىمەت بەرۋ سەكىلدى ولقىلىقتارعا جول بەرگەن», - دەدى ۇب ءباسپاسوز قىزمەتى.
