ايتا كەتسەك, ءامىر بايعازين 2013 جىلى «اسلاننىڭ ساباقتارى» ءفيلمى ءۇشىن وسى اتالىمدا باق سىناپ, كينوجۇلدەنىڭ جوعارى باعاسىنا يە بولسا, ەندى مىنە, بۇل قاتارعا «وزەن» دە قوسىلدى.
– «وزەن» فيلمىنە قاتىستى جىلت ەتكەن جاڭالىقتىڭ بارلىعى مەنى جانە شىعارماشىلىق كوماندامدى قاتتى قۋانتادى. وسى ورايدا بىرلەسە جۇمىس ىستەگەن ارىپتەستەرىمە العىسىمدى بىلدىرگىم كەلەدى. سونداي-اق ماعان قولداۋ كورسەتىپ, سەنىم بىلدىرگەن مادەنيەت جانە سپورت مينيسترلىگىنە العىس ايتامىن. بولاشاقتا دا قارىم-قاتىناستارىمىز نىعايىپ, ورتاق تابىستارعا قول جەتكىزەتىنىمىزگە سەنىمدىمىن, – دەپ پىكىر ءبىلدىردى بۇل ايتۋلى ءسات جونىندە رەجيسسەردىڭ ءوزى.
تۇركىستان وبلىسى اۋماعىندا تۇسىرىلگەن كينوكارتينا رەجيسسەردىڭ بۇعان دەيىن جارىققا شىققان «اسلاننىڭ ساباقتارى» جانە ء«تورت وقيعا» فيلمدەرىنەن كەيىنگى تىڭ تۋىندىسى. ياعني, «وزەن» ءفيلمى – اسلان تۋرالى تريلوگيانىڭ سوڭعى ءبولىمى. وركەنيەتتەن الىس جەردە تۇراتىن اعايىندى بەس جىگىتتىڭ قالادان كەلگەن قوناقپەن تانىستىقتان كەيىنگى باسقا ارناعا بۇرىلىپ, كۇرت وزگەرگەن ءومىرى, تىرشىلىك تىنىسى جايلى باياندالاتىن كينوتۋىندى قازاقستان (مادەنيەت جانە سپورت مينيسترلىگى, ش.ايمانوۆ اتىنداعى «قازاقفيلم» اق, Emir Baigazin Production), نورۆەگيا (Norsk Filmproduksjon) جانە پولشا (Madants) سىندى بىرنەشە مەملەكەتتىڭ اتسالىسۋىمەن جارىققا شىققان بولاتىن.
كەزەكتى كينوبايقاۋدىڭ ىرىكتەۋ كەزەڭىندە تالقىلاۋسىز تاڭدالعان «وزەننىڭ» ەندىگى تاعدىرى اۋستراليانىڭ بريسبەن قالاسىندا وسى جىلدىڭ 29 قاراشاسىندا وتەتىن بايقاۋدىڭ قورىتىندى كەشىندە انىقتالاتىن بولادى. بۇعان دەيىن الەمنىڭ كوپتەگەن بەلدى كينوفەستيۆالدارىندا جوعارى باعاعا يە بولىپ جۇرگەن ءفيلمنىڭ بۇل جولى دا جۇلدىزى وڭىنان تۋىپ, ءححىى Asia Pacific Screen Awards جۇلدەسىنىڭ جەڭىمپازدارى قاتارىنان كورىنەتىندىگىنە سەنىم مول.
ەستەرىڭىزگە سالا كەتەيىك, اتالعان تۋىندى جاقىن كۇندەرى لوس-اندجەلەستە وتەتىن Asian World film festival كينوفەستيۆالىنىڭ كونكۋرستىق باعدارلاماسىنا قاتىسادى. سونداي-اق ۆارشاۆا مەن سان-پاولوداعى فەستيۆالدىڭ ارنايى باعدارلامالارىندا كورسەتىلەدى. بۇدان بولەك, ءفيلمىنىڭ ازيالىق تۇساۋكەسەرى 2018 جىلدىڭ 25 قازانى مەن 3 قاراشاسى ارالىعىندا توكيو حالىقارالىق كينوفەستيۆالىنىڭ كونكۋرستىق باعدارلاماسى شەڭبەرىندە وتەدى دەپ جوسپارلانۋدا.
نازەركە جۇماباي,
«ەگەمەن قازاقستان»
