رۋحاني ءمان-ماعىناسى تەرەڭ بۇل پوەزيا بايقاۋىنا ءوڭىردىڭ اۋىل, قالالارىنان 31 وقۋشى قاتىستى.
وسى ايتۋلى شاراعا قاتىسۋشى قالقامان اۋىلى مەكتەبىنەن كەلگەن ايتولعان ء جۇنىسحان, اققۋلى اۋدانى تىلەكتەس ورتا مەكتەبىنىڭ شاكىرتى ماقپال حايراتبەك, شارباقتى اۋدانى ەسىلباي ورتا مەكتەبىنىڭ نامىسىن قورعاعان ايدانا قايكەن, اقسۋ قالاسىنىڭ گيمنازيا وقۋشىسى جانسايا جانىبەك, وبلىس ورتالىعىنداعى گيمنازيا-ينتەرنات وكىلى رامازان داۋرەنبەك ۇلى, ەكىباستۇزداعى №36 مەكتەپ-ليتسەيى ۇكىلەپ قوسقان قازىنا تىنىبەك جانە باسقالار تۋعان تىلدەرىن قۇدىرەت كورگەن ءور مىنەزدى ورەندەر ەكەندەرىن كورسەتتى.
تاعى ءبىر بايقالعانى – «مۇقاعالي وقۋلارىنا» وزگە ۇلت وكىلدەرىنىڭ بالالارى, اتاپ ايتقاندا, وبلىس ورتالىعىنداعى №3 گيمنازياسىنىڭ 8-سىنىپ وقۋشىسى داريا لانگولف پەن №8 ليتسەي-مەكتەبىنىڭ 8-سىنىپ وقۋشىسى ەكاتەرينا سوكولوۆا قاتىستى.
ورتالىق ماماندارىنىڭ ايتۋىنشا, «مۇقاعالي وقۋلارىنىڭ» ماقساتى – جاس ۇرپاقتىڭ ادەبيەتكە, قازاق پوەزياسىنا دەگەن قۇشتارلىعىن ارتتىرۋ, ولاردى ولەڭ قۇدىرەتى مەن قۋاتىن جانىمەن سەزىنىپ, جۇرەگىمەن تۇسىنە بىلۋگە ۇيرەتۋ.
ەكىنشىدەن, ەلىمىزدەگى مەكتەپ وقۋشىلارى اراسىندا قازاق اقىندارىنىڭ, مۇقاعالي ماقاتاەۆتىڭ دا شىعارمالارىن ناسيحاتتاۋ, بالعىن تالانتتاردىڭ شىعارماشىلىق قابىلەتتەرىن, تابيعي دارىندارىن ۇشتاۋ بولىپ تابىلادى.
ۇشىنشىدەن, جاڭادان ولەڭ جازۋعا تالپىنىپ جۇرگەن وقۋشىلارعا قولداۋ كورسەتىپ, ولارمەن جۇرگىزىلەتىن شىعارماشىلىق جۇمىس تۇرلەرىن جانداندىرۋ.
وقۋشىلار «ولەڭ ءپىرى – مۇقاعالي» اتالاتىن نەگىزگى ءبولىم شارتى بويىنشا اقىننىڭ جىرلارىن جاتقا وقىپ بەردى. ونىڭ ىشىندە اقىننىڭ ولەڭدەرىمەن بىرگە «اققۋلار ۇيىقتاعاندا» جانە «رايىمبەك, رايىمبەك!» سياقتى پوەمالارى دا بار. اقيىق اقىننىڭ ءومىرى مەن شىعارماشىلىعىنان قانشالىقتى حاباردار ەكەندىكتەرىن ۇمىتكەرلەر «مۇقاعالي جايلى كىم كوپ بىلەدى؟» دەگەن بولىمدە 10 سۇراققا جاۋاپ بەرۋ ارقىلى بايقاتتى.
«جاۋقازىن جىر جانىمدى ءجۇر مازالاپ» دەگەن بولىمدە قالامىنىڭ جەلى بار جەتكىنشەكتەر وزدەرى جازعان ولەڭدەرىن دە وقىپ بەردى. قاۋىرسىن قانات ولەڭدەر جۇرەك تەربەپ, ساناعا ءتۇرلى وي سالادى ەكەن.
قاتىسۋشىلار ولەڭنىڭ يدەياسىن اشىپ, مانەرلەپ, كورەرمەنگە اسەرلى ەتىپ وقىپ بەرۋلەرى كەرەك. قازىلار القاسى وقۋشىنىڭ ولەڭدى مانەرلەپ وقۋ شەبەرلىگىنە, ديكتسياسىنا, داۋىس بوياۋىنا, ارتىستىك قابىلەتىنە ەرەكشە ءمان بەردى.
وسىنداي تالاپقا وقۋشىلاردىڭ اراسىنان يامىشەۆ اۋىلى ورتا مەكتەبىنىڭ 11-سىنىپ وقۋشىسى ايكەرىم حاۋمەتقالي ساي كەلىپ, قاتارىنان قارا ءۇزىپ شىقتى.
ال ونى وسى بايقاۋعا ازىرلەگەن ۇستازى, قازاق ءتىلى مەن ادەبيەتى ءپانىنىڭ مۇعالىمى تولەۋ كاۋكەردىڭ ايتۋىنشا, اتا-اناسى, مەكتەبى ۇلكەن ءۇمىت كۇتەتىن ايكەرىم وتە تالاپتى قىز. ولەڭ دە جازادى. يامىشتىڭ مەكتەبىندە تاۋەلسىزدىكتەن كەيىن تاريحي وتانىنا ورالعان اعايىنداردىڭ 80 بالاسى وقىپ ءبىلىم الۋدا. ء سويتىپ «مۇقاعالي وقۋلارىنىڭ» وبلىستىق كەزەڭىنىڭ قورىتىندىسى بويىنشا باس جۇلدەنى ايكەرىم حاۋمەتقالي يەلەندى. ايكەرىم ەندى الماتى وبلىسى, رايىمبەك اۋدانى, قاراساز اۋىلىندا وتەتىن رەسپۋبليكالىق كەزەڭدە سىنعا تۇسەدى.
فاريدا بىقاي,
«ەگەمەن قازاقستان»
پاۆلودار
