ساپار بارىسىندا توراعانىڭ ءبىرىنشى ورىنباسارى قولباسشى, اقىن, ءاز-تاۋكەنىڭ سەنىمدى سەرىكتەرىنىڭ ءبىرى, اتاقتى «ەلىم-اي» داستانىنىنىڭ اۆتورى قوجابەرگەن جىراۋ تولىباي ۇلىنا ارنالعان ەڭسەلى ەسكەرتكىشتىڭ اشىلۋ راسىمىنە قاتىستى. ماڭىزى زور جيىندا سويلەگەن سوزىندە ول ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا مادەني, رۋحاني قۇندىلىقتارىمىزدى قاستەرلەۋ, ۇلتتىق كودىمىزدى جاڭعىرتۋ, سانا-سەزىمىمىزدى تاپتاۋرىن قاعيدالاردان ارىلتۋ باعىتىندا اۋقىمدى جۇمىستار اتقارىلعانىن, ەرلىگى مەن ورلىگى , اقىلگويلىگى مەن پاراساتتىلىعى, ءومىرى مەن شىعارماشىلىعى جاس ۇرپاق ءۇشىن ۇلگى-ونەگە تۇلعانى ۇلىقتاۋ يگىلىكتى شارالاردىڭ زاڭدى جالعاسى بولىپ تابىلاتىنىن, اتىن ارداقتاپ, رۋحىنا تاعزىم ەتۋ قاسيەتتى بورىشىمىز ەكەنىن اتاپ كورسەتتى. ايماق باسشىسى قۇمار اقساقالوۆ ءبىر بويىنا باتىرلىق, قولباسشىلىق, اقىندىق, سازگەرلىك, كۇيشىلىك, كورەگەندىك اسىل قاسيەتتەردى توعىستىرعان بابامىزدىڭ باي مۇراسىن تەرەڭ زەرتتەپ, ناسيحاتتاۋ بولاشاق ۇرپاق الدىنداعى باستى پارىز بولۋ تيىستىلىگىن جەتكىزدى.
بۇدان كەيىن م. اشىمباەۆ 90 جىلدىق تاريحى بار س. كيروۆ اتىنداعى زاۋىتتىڭ ۇجىمىمەن كەزدەسىپ, ءوندىرىستى جاڭعىرتۋ, وزىق تەحنولوگيالاردى ەنگىزۋ بارىسىمەن تانىستى. ءبىر كەزدەرى «مەدەۋ» ماگنيتولاسىن, سونداي-اق ءتۇرلى راديوقۇرىلعىلار شىعارىپ, اتاعى شارتاراپقا تانىلعان كاسىپورىننىڭ قازىرگى اياقالىسى نارىق تالاپتارىمەن ۇندەس. باستاپقىدا گاز بەن ەلەكتر ەنەرگياسىن ەسەپتەگىش قۇرالدارى, توك ترانسفورماتورلارى,ەلەكترقوزعالتقىش قورعاۋ قوندىرعىلارى, اۆتوموبيل ناسوستارى مەن كوتەرگىشتەر, تاجىريبە جيناقتاي كەلە 3D پرينتەرلەرىن, بەسىنشى دارەجەلى باسپا پلاتالارىن, ساندىق تەلەۆيزيا جانە ۇيالى بايلانىس كەشەندەرىن وندىرە باستادى. توراعانىڭ ءبىرىنشى ورىنباسارى جۇمىسشى-قىزمەتكەرلەردىڭ نازارىن جولداۋدىڭ نەگىزگى باعىتتارىنىڭ ءبىرى ەكونوميكانىڭ يننوۆاتسيالىق جانە قىزمەت كورسەتۋ سەكتورىن دامىتۋ ماسەلەسىنە اۋداردى. سىزدەر يننوۆاتسيالىق بەلسەندىلىك جاعىنان الدا ەكەنسىزدەر.مۇنىڭ ءوزى جۇمىستىڭ ءتيىمدى ۇيىمداستىرىلعانىن كورسەتەدى, دەدى.
ەلباسى تالاپتارىنىڭ ءبىرى حالىق تۇتىناتىن تاۋارلاردىڭ اۋقىمدى نومەنكلاتۋراسىن يگەرىپ, «قاراپايىم زاتتار ەكونوميكاسىن» دامىتۋ ءۇشىن كاسىپورىندارعا كومەكتەسۋ ماڭىزدى. بۇل يدەيانى «رادۋگا» جشس-ءى تابىستى جۇزەگە اسىرىپ كەلەدى. كاسىپكەر دميتري شاراپاەۆ «بيزنەستىڭ جول كارتاسى–2020» مەملەكەتتىك باعدارلاماسى بويىنشا ەكى ميلليارد تەڭگە سۋبسيديا راسىمدەپ, قۇرعاق تاڭعى اس, جۇگەرى تاياقشالارى, تەز دايىندالاتىن كەسپە, پلاستيك ىدىس-اياقتار, نە كەرەك, تاۋارلار مەن تاعامداردىڭ 500- دەن استام ءتۇرى شىعارىلادى. 400 ادام تۇراقتى جۇمىسپەن قامتاماسىز ەتىلگەن. ىشكى سۇرانىستان ارتىلعانى رەسەي مەن قىتايعا جونەلتىلەدى. الداعى ۋاقىتتا قۇنى 10 ميلليارد تەڭگە بولاتىن ءتورت وزىق جوبا يگەرىلمەك. ناتيجەسىندە جۇزدەگەن جۇمىس ورىندارى قۇرىلادى. ماۋلەن ساعاتحان ۇلى «بيزنەستىڭ جول كارتاسى–2020» باعدارلاماسىنىڭ تيىمدىلىگى ەسكەرىلىپ, ەلباسى قولدانىلۋ مەرزىمىن 2025 جىلعا دەيىن ۇزارتۋعا شەشىم العانىن, جىل سايىن قوسىمشا 30 ميلليارد تەڭگە قاراستىرۋعا تاپسىرما جۇكتەگەنىن, وسىنداي قولداۋدىڭ ارقاسىندا ءۇش جىلدىڭ ىشىندە 22 مىڭ ادامدى ەڭبەككە تارتۋعا, 224 ميلليارد تەڭگە سالىق جيناۋعا , 3 تريلليون تەڭگەنىڭ ءونىمىن وندىرۋگە مۇمكىندىك بەرەتىنىن ايتتى.
پارتيانىڭ وڭىرلىك اكتيۆىمەن وتكەن كەڭەستە جولداۋ تالاپتارىن ساپالى ءارى ۋاقىتىلى ورىنداۋدىڭ تەتىكتەرى قاراستىرىلىپ, تالقىلاندى. «نۇر وتان» پارتياسى وبلىستىق فيليالىنىڭ جەتەكشىسى, ايماق باسشىسى قۇمار اقساقالوۆ «قازاقستان-2021: بىرلىك, تۇراقتىلىق. جاسامپازدىق» اتتى سايلاۋالدى تۇعىرنامانىڭ ورىندالۋ بارىسىمەن تانىستىردى.
توراعانىڭ ءبىرىنشى ورىنباسارى پرەزيدەنتتىڭ ستراتەگيالىق باستامالارىن ىسكە اسىرۋعا بارلىق نۇروتاندىقتار بولىپ جۇمىلا اتسالىسۋعا شاقىردى. اتقارىلعان جۇمىستاردىڭ ساپاسىنا قوعامدىق مونيتورينگ پەن باقىلاۋ جۇرگىزۋ ساياسي ۇيىمنىڭ باستى مىندەتىنە اينالۋى ءتيىس. پارتيالىق جوبالار «تسيفرلى قازاقستان» مەن «رۋحاني جاڭعىرۋ» باعدارلامالارىن ورىنداۋعا ۇلەس قوسۋعا باعىتتالۋى كەرەك.
م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە ستۋدەنت-جاستارمەن وتكەن جۇزدەسۋدە جاستار مەن وتباسى ينستيتۋتىن كەشەندى قورعاۋ مەملەكەتتىك ساياساتتىڭ باسىم باعىتى بولىپ تابىلاتىنى ايتىلدى. ەلباسى جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋدى تاپسىردى. كەلەسى جىل «جاستار جىلى» دەپ جرايالاندى. حالىقارالىق تالاپتارعا ساي وقۋعا, ءبىلىم الۋعا, ەڭبەك ەتۋگە زور مۇمكىندىكتەر بەرىلىپ وتىر. قوسىمشا گرانتتار ءبولۋ, جاتاقحانالار سالۋ سەكىلدى ماڭىزدى جوبالار رەت-رەتىمەن جۇزەگە اسىرىلادى. جاڭا مازمۇنمەن ودان ءارى تولىقتىرىلا تۇسەدى. ءاربىر قازاقستاندىق جۇرگىزىلىپ جاتقان رەفورمالاردىڭ ءمانى مەن ماڭىزىن جەتە تۇسىنگەندە عانا قوعامداعى جاڭعىرۋ زور سەرپىنگە يە بولادى, دەدى م. اشىمباەۆ.
ءومىر ەسقالي,
«ەگەمەن قازاقستان»
