العاش ءۇندىستاننىڭ كاشمير اۋدانىندا وندىرىلۋىنە بايلانىستى ماتا كاشەمير اتالىپ, كەڭ قولدانىسقا ەنگەن. ءتىپتى ورتا عاسىرلاردا ەۋروپادا ەرەكشە باعالانعاندىعى سونداي, اقسۇيەك وكىلدەرىنىڭ عانا قولى جەتەتىن بۇيىم سانالعان دەسەدى. اسىرەسە مال شارۋاشىلىعىمەن اينالىسقان كوشپەندى حالىق ءۇشىن جاتتىعى جوق, ەتەنە تانىس.
رەسەيلىك ءسان يندۋسترياسىنىڭ وزىق توپتامالارى ۇسىنىلعان استاناداعى اپتالىقتا بۇگىنگىنىڭ ارۋلارى ءۇشىن دە ساننەن تۇسپەي وتىرعانىن كوزىمىز كوردى. كاشەميردەن توقىلعان كيىمدەرىمەن تالاي جەردە توپ جارىپ جۇرگەن رەسەيلىك فابريكا سوڭعى سانمەن تىگىلگەن كيىم ۇلگىلەرىن تانىستىردى. اتالعان كومپانيانىڭ وكىلى ليۋدميلا لوزوۆيك بىزگە كاشەمير ءوندىرىسى مەن ماتانى كۇتىپ, ساقتاۋدىڭ جولدارى تۋرالى كەڭىنەن اڭگىمەلەپ بەردى.
ونىڭ ايتۋىنشا, ءبىر ەشكىدەن بار بولعانى 100 گرامم ءتۇبىت قانا الىناتىن كورىنەدى. ال ءبىر جەمپىر توقۋ ءۇشىن كەمى ءبىر كيلو ءتۇبىت كەرەك بولسا, پالتو توقۋ ءۇشىن 1 جارىم كيلودان كوپ ءتۇبىت قاجەت. ال ۇستىڭىزدەگى ءساندى كيىم ءۇشىن نەشە ەشكىنىڭ ءجۇنى قىرقىلعانىن ءوزىڭىز ەلەستەتە بەرىڭىز.
جىلىلىعى وتە جوعارى
ءجۇن كەز كەلگەن جانۋاردان الىنا بەرۋى مۇمكىن. ال كاشەمير موڭعوليا جەرىن مەكەندەيتىن ەشكى جۇنىنەن تۇتىلەدى. مۇنداي ەشكىلەردىڭ سانى كوپ تە ەمەس. ويتكەنى تسەلسي شكالاسىمەن جازدا +40, قىستا -50 گرادۋسقا دەيىن تومەندەيتىن قاتال تابيعاتتا ءوسىپ جەتىلگەن ەشكى ءجۇنى ەرەكشە قاسيەتكە يە بولادى. ياعني ۇزىندىعى 5 مم, جۋاندىعى 14 ميكرون بولاتىن ءتۇبىتتىڭ تەرميالىق قورعانىسى بەرىك كەلەدى. كاشەمير ادەتتەگى ءجۇن ماتالاردان 8 ەسە جىلى بولادى. قازىرگى ۋاقىتتا كاشەمير ماتالارى موڭعوليادا, قىتايدا, ءۇندىستاندا, يتاليادا وندىرىلەدى.
كاشەمير ماتالارى نەلىكتەن قىمبات؟
ءبىر ەشكىنىڭ جۇنىنەن ۇزاعاندا 200 گرامم عانا ءتۇبىت الۋعا بولادى. ودان بولەك ءتۇبىتتى ءتۇتۋدىڭ ارناۋلى ءتاسىلى بار. ماتانى كۇتىپ كيۋدىڭ, اقتاۋدىڭ, جۋدىڭ دا ءوز بابى بولعاندىقتان قىمباتقا تۇسەدى. ساپاسى مەن سالماعى دا كاشەميردىڭ باعاسىن انىقتاۋدا ۇلكەن ماڭىزعا يە. بۇرىن كاشەمير ساتىپ الىپ كورمەگەندەر ساپالى ماتا تاڭداۋدا الدانىپ قالۋى دا مۇمكىن. سوندىقتان نارىقتا اتى شىققان تانىمال برەندتەرگە سەنىم ارتقان ءجون.
كاشەميردەن تىگىلگەن كيىم ىستىقتاتپايدى دا, توڭدىرمايدى. اسىرەسە جازدىڭ سالقىن كەشتەرىندە جۇقا كاشەمير ءپالانتيندى ورانىپ الساڭىز, ودان ارتىعى جوق. مىسالى, كاشەمير ورامالىن يىعىنان تاستامايتىن اندجەلينا دجوليدى ايتۋعا بولادى.
2018-2019 جىلعى ءسان ۇلگىسى
ءبىزدىڭ تۇتىنۋشىلارىمىز تريكوتاجدى ەرەكشە جاقسى كورەدى. قازىر قوزعالىس كوپ بولعاندىقتان, كوپ جاعدايدا جايلىلىق ءۇشىن كەجۋال ستيلىندەگى كيىم ۇلگىلەرىن شىعارامىز. بۇل كەز كەلگەن جاستاعى ارۋلارىمىز ءۇشىن وتە ىڭعايلى.
بيىل تىك, ەركىن ۇلگىدەگى اشىق, سۋىق ءتۇستى كاشەمير پالتولار ساندە. اكسەسسۋار تاڭداۋدا دا وزىندىك ەرەكشەلىكتەرىن نازاردا ۇستاعان ءجون. مىسالى, تابيعي سۇر ءتۇستى پالتوعا قىزىل-سارى ءتۇستى مويىنوراعىش ۇيلەسىمدى كەلەدى. ۇزىن قونىشتى, وكشەسى بيىك اياق كيىمدەر بويىڭىزدى تىكتەپ, سىمباتىڭىزدى ايشىقتاي تۇسكەن بولار ەدى. اق, قارا ءتۇس اكسەسسۋار تالعامايدى. اق ءتۇستى پالتونى قانىق تۇستەرمەن ۇيلەستىرۋگە بولادى, مىسالى, اق مويىنوراعىش, قىزىل باتەڭكە. جالپى پالتو تاڭداردا ستيلىنەن بۇرىن, جاراسىمدى ءتۇستى وڭىڭىزگە ساي تاڭداعان دۇرىس. ادەتتەگى كلاسسيكالىق تۇستەردەن گورى قىزىل, كۇلگىن, سياكوك تۇستەردىڭ سۇرانىسى ارتىپ تۇر.
قالاي كۇتىم جاساعان ءجون؟
كاشەميردى سۋىق سۋعا ارنايى ماتاعا ارنالعان سۇيىقتىقپەن جۋ كەرەك. بولماي جاتقان كۇندە بالالارعا ارنالعان سۋسابىن دا جاراپ قالادى. وندا دا قارا كۇشكە سالماي, ەپپەن جۋماسا ماتانى ءبۇلدىرىپ الۋىڭىز وڭاي. سابىنىنان ابدەن ارىلتىپ, جاقسىلاپ شايۋ قاجەت. ماتانى جىلىتۋ باتارەيالارىنا قويىپ, فەنمەن كەپتىرۋگە بولمايدى. سوزىلىپ كەتپەس ءۇشىن جايىپ كەپتىرگەن دۇرىس سانالادى. ىستىق ەمەس, جىلى ۇتىكپەن ۇتىكتەۋ كەرەك, ەڭ ابزالى بۋ ۇتىكتەرى. كۇتىپ كيگەن كاشەمير جىلدار بويى ءوڭىن جوعالتپاي جاقسى ساقتالادى, ءتىپتى, وزىڭىزدەن كەيىن مۇراعا قالدىرۋعا بولادى. ارتىڭىزدان ەرگەن ۇرپاعىڭىزدىڭ «اجەمنەن قالعان ءشالى ەدى» دەپ جامىلىپ جۇرگەنىنە نە جەتەر؟!
ايا ءومىرتاي,
«ەگەمەن قازاقستان»
