«نۋلەۆوي كۆارتال» كەشەنى مەن «روسسيا» قوناقۇيىندەگى جۇمىستارمەن تانىسقاننان كەيىن قازاقستان جاعىنان سالىنىپ جاتقان تۇرعىن ۇيلەردىڭ قۇرىلىس بارىسىن كوردى.
بايقوڭىر رەسەيگە جالعا بەرىلگەندىكتەن كۇنى كەشەگە دەيىن ەلىمىزدىڭ وگەي قالاسى سياقتى سەزىلىپ كەلگەن. مەملەكەت باسشىسىنىڭ تاپسىرماسىمەن قازىر مۇندا تۇرعىن ۇيلەر مەن باسقا دا نىساندار كوپتەپ سالىنىپ, قازاقستاندىقتاردىڭ ۇلەسى ەلۋ پروتسەنتكە جۋىقتاپ قالدى.
قازاقستان تاراپىنان سالىنىپ جاتقان كوپقاباتتى تۇرعىن ۇيلەردىڭ قۇرىلىسىمەن تانىستىرعان قارماقشى اۋدانىنىڭ اكىمى سۇلتان ماقاشەۆ ءبىراز تۇيتكىلدەر تۋرالى دا ايتىپ بەردى. ءاۋ باستا بۇل ۇيلەردى جىلۋمەن قامتاماسىز ەتۋ ءۇشىن قالالىق جىلۋ ورتالىعىنا قوسپاق بولعان. الايدا بۇل جوبا تىم قىمباتقا تۇسەتىن بولعاندىقتان كوگىلدىر وتىنمەن جىلىتىلاتىن جەكە ءمودۋلدى قازاندىقتار قويۋعا شەشىم قابىلدانعان ەكەن. ينجەنەرلىك ينفراقۇرىلىمدار رەسپۋبليكالىق بيۋدجەت ەسەبىنەن سالىنىپ جاتىر. بۇگىندە جىلۋ, سۋ جانە كارىز قۇبىرلارى تارتىلۋدا. جىل سوڭىنا دەيىن پايدالانۋعا بەرىلەدى دەپ جوسپارلانعان كوپقاباتتى تۇرعىن ۇيگە ەڭ الدىمەن حالىقتىڭ الەۋمەتتىك جاعىنان از قامتىلعان وتباسىلار كوشىپ كەلۋگە ءتيىس. وبلىس اكىمى قىرىمبەك كوشەرباەۆ تۇرعىن ءۇي كەزەگىندە تۇرعان بيۋدجەتتىك قىزمەتكەرلەردەن بولەك, «بايتەرەك» عارىشتىق زىمىران كەشەنىنىڭ ماماندارى دا باسپانا الا الاتىندىعىن ايتتى.
قالاعا قوسىمشا 20 كوپقاباتتى ءۇي سالىنباق. مەملەكەتتىك باعدارلاما «7-20-25» جوباسى دا جولعا قويىلادى.
سول كۇنى قالاداعى №277 ورتا مەكتەپتە ايماقتاعى ءبىلىم بەرۋ ماسەلەلەرى تالقىلاندى. وبلىستىق ءبىلىم باسقارماسىنىڭ باسشىسى مايرا مەلدەبەكوۆا كەشەگە دەيىن جابىق قالا بولىپ كەلگەن جۇلدىزدى قالاشىقتاعى جاعدايدى تارقاتىپ بەردى. وسىنداعى 13 بالاباقشانىڭ 12-ءسى رەسەيگە تيەسىلى ەكەن. تەك ءبىر بالاباقشا عانا قازاقستاندىق ءبىلىم ستاندارتى بويىنشا جۇمىس ىستەپ كەلەدى. كەلەر جىلى قازاقستاندىقتار تاراپىنان 3 بالاباقشا سالىنىپ, ەلىمىزدىڭ وقۋ باعدارلاماسىمەن جۇمىس جاساماق.
ورتا مەكتەپ جاعدايىندا دا شەشىلمەگەن ماسەلەلەر بار. ءبىلىم باسقارماسىنىڭ باسشىسى بايقوڭىردا 1500 قازاقستاندىق وقۋشى رەسەيدىڭ ءبىلىم ستاندارتى بويىنشا وقيتىنىنا توقتالعان م.مەلدەبەكوۆا بۇل وقۋشىلاردى ءوزىمىزدىڭ ءبىلىم بەرۋ جۇيەسىنە كوشىرۋگە ازىرلىك ءجۇرىپ جاتقاندىعىن ايتتى. بۇگىندە بۇل ماسەلە ءبىلىم جانە عىلىم مينيسترلىگىنىڭ قاراۋىندا ەكەندىگى, سونىمەن قاتار 600 ورىندىق جاڭا مەكتەپ سالىناتىندىعى قاپەرگە الىندى. ونىڭ ايتۋىنشا, بايقوڭىردا 8 مەكتەپ قازاقستاندىق ءبىلىم ستاندارتى بويىنشا قازاق تىلىندە وقىپ جاتىر.
پرەمەر-ءمينيستردىڭ ءبىرىنشى ورىنباسارى اسقار مامين جۇلدىزدى قالاشىقتا جاسالىپ جاتقان جۇمىستارعا وڭ باعاسىن بەردى. ال رەسەي ءبىلىم ستاندارتىمەن وقىتىلىپ جاتقان شاكىرتتەردى ءوزىمىزدىڭ ءبىلىم جۇيەسىنە كوشىرۋ ءىسى ۇكىمەتارالىق كەلىسىمدەر نەگىزىندە جۇزەگە اسىرىلماق.
قالىڭ قازاق كيىزدەي تۇتاسىپ وتىرعان وڭىردە وگەي بالاداي كۇي كەشىپ كەلگەن بايقوڭىر قالاسى تۇعىرى بيىك وتانىنا وسىلايشا ورالىپ جاتىر.
باقتيار تايجان,
«ەگەمەن قازاقستان»
قىزىلوردا وبلىسى
