كينو • 10 قازان، 2018

اپتا ءفيلمى: «ايداعى ادام»

321 رەتكورسەتىلدى

كينوسۇيەر قاۋىم 11 قازاننان باستاپ ەل كينوتەاترلارىنان كورە الادى.

فيلم ايعا العاش اياق باسقان ادام نيل ارمسترونگتىڭ ءومىربايانىنان سىر شەرتەدى. ونىڭ عارىش ەكيپاجىن باستاعان ءبىر قادامى وتكەن عاسىردىڭ الپىسىنشى جىلدارىنداعى ادامزات ءداۋىرىن جاڭا كەزەڭگە كوشىردى.

كارتينانىڭ قويۋشى رەجيسسەرى «لا-لا لەند» ميۋزيكلىمەن جارق ەتىپ، كوپتىڭ القاۋىنا يە بولعان دەمەن شازەلل. ءتىپتى سول ميۋزيكلدە باستى ءرولدى سومداعان رايان گوسلينگ بۇل جولى دا جاڭا تۋىندىدان شەت قالعان جوق. بارلىعىمىز ءسۇيىپ تىڭداعان سول «لا-لا لەند» سانۋدترەگىنىڭ اۆتورى دجاستين حۋرۆيتس اتالعان ءفيلمنىڭ مۋزىكاسىن باستان-اياق جازىپ شىقتى.

دەمەن شازەللدىڭ رەجيسسەرلىگىمەن تۇسىرىلگەن فيلم جەلىسى قاشانعىداي قاراپايىم كەلەدى. 1961 جىل. ارمسترونگ (رايان گوسلينگ) - ناسا-نىڭ قاراپايىم تاجىريبەلى ينجەنەرى، ۇنەمى سىناق رەيستەردى ورىنداپ ۇيرەنگەن. كىشى قىزىنىڭ قاتەرلى ىسىك اۋرۋىنان قايتىس بولۋى ۇشقىشتىڭ قابىرعاسىن قايىستىرىپ-اق كەتەدى. وسىدان سوڭ «ەگىزدەر» اتتى عارىشقا ۇشۋ باعدارلاماسىنا قاتىسۋدى ءجون كورىپ، ءوتىنىش تاستايدى. «ناعىز قىزىقتار ەندى باستالادى»، دەگەن ايەلىنىڭ (كلەر فوي) ءبىر اۋىز ءسوزى مەحناتتى ساپاردىڭ كىرىسپەسى سىقىلدى ەستىلىپ، جاڭا ءبىر ءداۋىردىڭ تۇبەگەيلى وزگەرىسىن قول قۋسىرا كۇتۋدەن باسقا امالىڭىز قالمايدى.

امەريكانىڭ عارىشتى جاۋالاپ الۋى تۋرالى ەپوسقا شازەلل قانداي دا ءبىر جاڭا كوزقاراس بىلدىرمەيدى. ماسەلەن، «اپوللون» ەكيپاجى مۇشەلەرى – رودجەر شافف، ەد ۋايت پەن گۋس گريسستىڭ قايتىس بولۋىن ادامزات دامۋىنا قاجەت قۇرباندىق رەتىندە كورسەتكەن. اقىر سوڭىندا، مۇنداي ماماندىق بار جانە تاريحي بەتبۇرىس ءۇشىن جانپيدا بولۋ دەپ تۇيىندەيدى.

سونداي-اق، رەجيسسەر ادەتتەگىدەي ارمانعا اپارار جولدىڭ بەينەتى مەن زەينەتىن قاتار كورسەتۋگە تىرىسادى. ياعني، عارىش عالاماتىمەن سالىستىرعاندا ەلەۋسىز نوقاتتاي بولعان ادامنىڭ ۇلكەن مۇراتىن ايگىلەۋگە كۇش سالعان.

ءتۇرلى سىناق ۇشۋلارى مەن ادامنىڭ ايدى باعىندىرۋى سىندى تۋربۋلەنتتى ساحنالاردىڭ شىنايى تۇسىرىلگەنى سونشالىقتى گولليۆۋد پاۆيلوندارىندا تۇسىرىلگەنىنە سەنگىڭىز كەلمەيدى.

Rotten Tomatoes شولۋ اگرەگاتورى بويىنشا، فيلم 7.9 / 10 بالعا يە بولعان. بەلگىلى كينوسىنشى ميشەل نوردين تۋىندىنى «مىقتى تاجىريبە» دەپ باعالاپ، B + دەڭگەيىندەگى فيلم ەكەنىن ايتتى. كارتينانىڭ اكتەرلەر قاتارىندا رايان گوسلينگ، كلەر فوي، پابلو شرايبەر، كريستوفەر ەببوتت، كيران حيندس، كايل چاندلەر جانە وزگە دە ارتيستەر بار.

ايا ءومىرتاي،

«ەگەمەن قازاقستان»

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار