فيلمگە بۇركىتتى قۇس پاتشاسى دەپ دارىپتەگەن كوشپەندى حالىقتىڭ قىران قۇسقا دەگەن سۇيىسپەنشىلىگى ارقاۋ بولعان. وقيعا جەلىسى بويىنشا ەرتە زاماندا ابجىلان ويانىپ, قازاق اۋىلىنا ۇلكەن اپات اكەلەدى. قارسى كەلگەندى جالماپ, جايپاپ كەلە جاتقان جىلانمەن قىران بۇركىت ايقاسىپ, ىنىنە قۋىپ تىعادى.
– ساحاراداعى قازاق العاش بولىپ قىران قۇستى قولعا ۇيرەتىپ, قاستەرلەپ, كيە تۇتقان. قازاقتار بەس جاسار بۇركىتتى مۇزبالاق دەپ اتايدى. فيلم ماعىناسى قىران تەكتى, قىران مىنەزدى ۇلتپىز دەگەن ماعىناعا سايادى. باس كەيىپكەر اقتاي مەن بۇركىت اراسىنداعى اجىراماس دوستىق تۋرالى باياندالادى, – دەيدى قوس رەجيسسەردىڭ ءبىرى تىلەك تولەۋعازى.
«مۇزبالاق» ءفيلمى تۇردىبەك مايدان مەن تىلەك تولەۋعازىنىڭ ۇلتتىق سالت-ءداستۇر تاقىرىبىنداعى ەكىنشى جۇمىسى. بۇعان دەيىن قوس رەجيسسەر قۇسبەگىلىك تاقىرىبىنداعى «تاستۇلەك» اتتى تاماشا ءمۋلتفيلمدى ەل نازارىنا ۇسىنىپ, زور قوشامەتپەن قابىلداعان بولاتىن.
– «تاستۇلەك» ءفيلمى شىققان سوڭ «قازاقفيلم» اق پرەزيدەنتى باقىت عافۋ ۇلى تولىقمەترلى فيلم تۇسىرسەڭدەر دەپ ۇسىنىس ايتتى. جاڭادان وقيعا ويلاستىرىپ, قۇسبەگىلىك تاقىرىبىنا ستسەناري قۇردىق. «تاستۇلەك» اۆتورلىق فيلم بولسا, «مۇزبالاق» كوممەرتسيالىق جوبا, – دەيدى تىلەك تولەۋعازى.
ەكى جىلدان استام ۋاقىت تۇسىرىلگەن بۇل فيلمگە 40-قا جۋىق كينەماتوگرافيانىڭ انيماتسيا جانرىندا ەڭبەك ەتىپ جۇرگەن وتاندىق مامان جۇمىلعان. ۇزاقتىعى 67 مينۋت بولاتىن ءمۋلتفيلمنىڭ 70 پايىزى 2D, 30 پايىزى 3D فورماتىندا جاسالىپ, باس-اياعى 96 500 سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى, جانات تىنىباەۆ, سامات قورداباي, تولەباەۆ ەرعالي دۇيسەن ۇلى, الما ادىلقىزى ەسىمدى تەاتر جانە كينو اكتەرلەرى قاتىسقان. فيلم قازاق تىلىندە ءتۇسىرىلىپ, ورىس تىلىنە دۋبلياجدالعان. 18 قازاننان باستاپ استانا, الماتى, شىمكەنت, اقتوبە, اقتاۋ, اتىراۋ قالالارىندا ەكى تىلدە كورسەتىلەتىن بولادى.
– ەلىمىزدەگى انيماتسيا سالاسى سوڭعى 5-6 جىلدا قارقىندى دامىپ كەلەدى. دەگەنمەن مەملەكەت تاراپىنان جۇيەلى جوسپارلار قۇرىلىپ, جوبالار جىل سايىن ءۇزىلىسسىز جۇرگىزىلىپ وتىرسا دەيمىز. الەمدىك دەڭگەيدەگى ستۋديالارىمەن تەڭ دارەجەدە جۇمىس ىستەۋگە قاۋقارىمىز بار. قازاقتىڭ ۇلتتىق اڭىز-ەرتەگىلەرى مەن باتىرلىق جىر-داستاندارىن زامانعا ساي ەتىپ جەتكىزگىمىز كەلەدى, – دەگەن رەجيسسەر قولداۋ بولسا, فيلم تۇسىرەم دەپ قۇلشىنىپ وتىرعان تالانتتى مامانداردىڭ كوپ ەكەنىن ايتادى.
ولاردىڭ ەندىگى ماقساتى «التىن ادام» انيماتسيالىق ءفيلمىن جارىققا شىعارۋ. بەلگىلى فولكلوريست-عالىم ۆيكتور گۋسەۆ «گەنەتيكالىق تۇرعىدان العاندا ادەبيەت قانا ەمەس, ونەردىڭ وزگە دە تۇرلەرى فولكلوردان باستاۋ الادى. دەمەك فولكلور – ونەردىڭ باستاۋ كوزى» دەيتىن. ەندەشە ۇلتتىق قۇندىلىقتاردى ۇلىقتاپ قانا قويماي, تاربيەنىڭ ءتۇپ قازىعى دەپ بىلەتىن جىگىتتەردىڭ مازمۇندى مۋلتفيلم تۇسىرە بەرۋىنە تىلەكشىمىز!
ايا ءومىرتاي,
«ەگەمەن قازاقستان»
