قازان ايىنىڭ العاشقى سەنبىسىندە اتىراۋدا قالا كۇنى تويلانادى. بيىل دا مەرەكەگە وراي ۇيىمداستىرىلاتىن شارالاردىڭ جوسپارى جاسالدى. قالا كۇنى قارساڭىندا الەۋمەتتىك نىساندار پايدالانۋعا بەرىلىپ جاتىر. سولاردىڭ ءبىرى جەدەل جاردەم قىزمەتىنىڭ جاڭا بەكەتى. «نۇرسايا» شاعىن اۋدانىندا ورنالاسقان نىسان 75 مىڭ ادامدى قابىلداۋعا ارنالعان. شاقىرتۋلارعا سەگىز جەدەل جاردەم بريگاداسى شىعادى. قازىرگى زامانعى قۇرىلعىلارمەن جابدىقتالعان بەكەتتە العاشقى كومەك كورسەتۋدەن تاجىريبەلىك ترەنينگتەر وتەتىن وقۋ-جاتتىعۋ بولمەسى دە بار.
جاڭا نىساننىڭ اشىلۋ سالتاناتىنا اتىراۋ قالاسى اكىمىنىڭ ورىنباسارى پولىمبەت حاسانوۆ, وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆا قاتىستى. «جاقىندا «نۇرسايا» شاعىن اۋدانىندا مەملەكەت-جەكەمەنشىك ارىپتەستىگى اياسىندا 12 مىڭ تۇرعىنعا قىزمەت كورسەتەتىن جاڭا ەمحانا سالىنادى. وبلىس ورتالىعىندا تاعى دا ءبىر جەدەل جاردەم بەكەتى, ءۇش قوسالقى بەكەت اشىلادى, – دەيدى مانشۇك ايمۇرزيەۆا.
بيىل اۋدانداردا قوسىمشا توعىز بەكەت اشۋ كوزدەلۋدە. جالپى, ەلدى مەكەندەردى جەدەل جاردەممەن قامتۋ كورسەتكىشى – 91,4%. وتكەن جىلى اۆتوماتتاندىرىلعان ديسپەتچەرلىك اقپاراتتىق قىزمەت كەشەنى جاڭارتىلدى.
باقىتگۇل باباش,
«ەگەمەن قازاقستان»
اتىراۋ
